香港哺乳動物
From Wikipedia, the free encyclopedia
本頁——香港哺乳動物,介紹響20世紀至今香港境內(原生及外來)嘅野生哺乳動物,品種近百。
![]() |
香港喺面積同物種比例上,其實可以同海南島、台灣等大島相比。而家住嘅香港響市區之外有好多郊外同水域,由於大部份嘅哺乳動物都係夜晚先出動、響山頭野嶺搵食四圍走,佢哋好驚人,所以都好難搵到佢哋。一啲個別品種:例如馬騮、中華白海豚等,因為出現範圍同時間都較為固定,成為少數可以被一般市民發現嘅野生哺乳動物。
香港響1000年前係熱帶雨林[1],加上位於華南一帶同埋有好多唔同形式嘅生態環境,所以估計一啲源自中國同東南亞嘅野生哺乳動物都應該曾經喺香港出現,東南亞例子就好似有亞洲象、犀牛、水鹿、老虎、豹、亞洲豺犬等,中國品種例如赤狐、鬣羚、貉、亞洲黑熊等。而海洋裏面除咗擱淺或途經香港嘅鯨豚類外,可能都係儒艮嘅原生分佈地。但有好多品種都經唔起香港社會的發展壓力同人為因素,數量開始減少甚至已經喺本地絕種,而過往的文獻亦只有零星嘅記載,所以我哋好難估計香港以前嘅野生哺乳動物究竟有幾多種。雖然過去都有人從事研究香港野生哺乳動物嘅文獻,但真正作出有系統嘅研究都只係近幾年嘅事。
喺20世紀60到70年代,豪豬、豹貓同野豬呢啲中至大型哺乳類動物亦瀕臨本地絕種,好彩香港政府響受影響嘅保護區內大量植林,同保護海洋嘅資源,依啲哺乳動物群落先可以喺香港再次繁衍落嚟。