From Wikipedia, the free encyclopedia
Si Alice Leal Guo[3] (Tsino: 郭華萍; pinyin: Guō Huápíng) ay isang negosyanteng babae at politiko sa Pilipinas na nagsisilbing kasalukuyang alkalde ng munisipalidad ng Bamban, Tarlac, mula noong Hunyo 30, 2022 hanggang Agosto 13, 2024.[4] Noong Hunyo 2024, sinuspinde siya hanggang sa anim na buwan bilang alkalde pagkatapos maghain ang Kagawaran ng Interyor at Pamahalaang Lokal ng kaso laban sa kanya dahil sa diumanong koneksyon niya sa mga aktibidad ng POGO (Philippine Offshore Gaming Operator o Mga Operador ng Pagpapalaro sa Ibayong-dagat sa Pilipinas) sa kanyang munisipalidad.[5] Siya ay pinaalis sa kanyang tungkuli noong Agosto 13, 2024 ng Tanod-bayan.[6]
Alice Guo | |||||||||||||
---|---|---|---|---|---|---|---|---|---|---|---|---|---|
郭華萍 | |||||||||||||
![]() | |||||||||||||
Alkalde ng Bamban, Tarlac | |||||||||||||
Nasa puwesto 30 Hunyo 2022 – 13 Agosto 2024 | |||||||||||||
Bise-alkalde | Leonardo Anunciacion | ||||||||||||
Nakaraang sinundan | Jose Antonio Feliciano | ||||||||||||
Personal na detalye | |||||||||||||
Isinilang | Guō Huápíng 31 Agosto 1990 Fujian, Tsina | ||||||||||||
Partidong pampolitika | Indipendiyente (2023; 2024–kasalukuyan)[1] | ||||||||||||
Ibang ugnayang pampolitika | NPC (2023–2024)[2] | ||||||||||||
Trabaho | Negosyante, politiko | ||||||||||||
Kilala bilang | Alice Leal Guo | ||||||||||||
Pangalang Tsino | |||||||||||||
Tradisyunal na Tsino | 郭華萍 | ||||||||||||
Pinapayak na Tsino | 郭华萍 | ||||||||||||
|
Sa isang pagsisiyasat sa Komite ng Senado, pinaratangan nina Senador Risa Hontiveros at Senador Win Gatchalian si Guo na may kaugnayan sa mga ilegal na aktibidad ng mga POGO, kasunod ng mga pagsalakay sa Bamban noong 2023 at 2024. Kinuwestyon din ang kanyang pagkamamamayang Pilipino at iniimbestigahan dahil hindi magkakatugma ang kanyang mga dokumento sa kanyang mga testimonya.[7][8][9]
Noong Agosto 2024, iniulat na umalis na si Guo sa Pilipinas noong Hulyo 17 patungong Malaysia, at pagkatapos ay bumiyahe sa Singapura.[10] Noong Agosto 18, naniniwala ang pamahalaan ng Pilipinas na kasalukuyang nasa Indonesya si Guo.[11]
Pinagtatalunan ang mga detalye tungkol sa unang yugto ng buhay at pinag-aralan ni Guo. Ayon kay Guo, isinilang siya sa kanyang tahanang hindi niya maalala kung saan, o ayon sa kanyang sertipiko ng kapanganakan, sa Barangay Matatalaib sa noo'y munisipalidad ng Tarlac, noong Agosto 31, 1990, na orihinal na inakala na Hulyo 12, 1986.
Nakalagay sa mga dokumento ng aplikasyon ng Special Investors Resident Visa (SIRV, Bisang Pangresidente ng mga Natatanging Mamumuhunan) kanyang pamilya na sa Fujian, Tsina ang kanyang lugar ng kapanganakan.[12][13][14][15][16] Inihayag din ng Pambansang Kawanihan ng Pagsisiyasat (NBI) ang pagkakaroon ng tatlong indibiduwal na nagngangalang Alice Leal Guo, na pawang ipinanganak noong Hulyo 12, 1986.[17] Iba ang itsura ng isa sa mga indibiduwal na ito sa kanya.[18] Nagpahayag ang mga residente sa iniulat na kinatatahanan ng pangalawang Alice Guo sa Lungsod Quezon na hindi nila alam na mayroong nagngangalang Alice Guo na naninirahan doon.[19]
Nang maglaon, kinumpirma ng NBI na magkatugma ang tatak-daliri ng aklaldeng si Alice Guo at Guo Hua Ping, na nagpapahiwatig na iisang tao sila.[20]
Iginiit ni Guo ang etnisidad ng kanyang ama bilang Tsino at sinabing may gulang na 70 taon noong 2024, ngunit makikita ang mga hindi pagkakaayon tungkol sa pagkamamamayan ng sinasabi niyang ama sa iba't ibang mga dokumento. Kinalala ang sinasabing ama ni Alice sa sertipiko ng kapanganakan bilang Pilipino, na nagngangalang Angelito Guo, habang nilista siya sa kanyang talaang negosyo bilang isang mamamayang Tsino na nagngangalang Jian Zhong Guo, na ipinanganak noong 1958.[21][22][23]
Pinag-uusapan din ang pagkakakilanlan ng ina ni Guo; maaring siya isang kasambahay na Pilipinang nagngangalang Amelia Leal Guo, ayon sa pahayag at sertipiko ng kapanganakan ni Guo, o isang negosyanteng Tsino na nagngangalang Lin Wen Yi (ipinanganak 1971), batay sa mga sanggunian sa Valenzuela at mga dokumento ng aplikasyon ng SIRV ng pamilya Guo.[16][24][25] Iginiit ni Guo na anak siya sa labas ng kanyang ama kay Amelia, na nagresulta sa pagpapalaki sa kanya ng kanyang ama ng mag-isa sa isang babuyan sa isang bukid sa Lungsod ng Tarlac. Gayunpaman, lumitaw ang mga pagkakaiba nang naisiwalat ang mga sertipiko ng kapanganakan nina Guo, Shiela Leal Guo (ipinanganak 1984) at Seimen Leal Guo (ipinanganak 1988 o 1990) na may pagkakaiba sa gulang nina Angelito at Amelia Guo sa mga kapanganakan ng kanilang mga anak, kasama ang dalawang magkaibang petsa ng kasal sa Tarlac.[26] Higit pa rito, napag-alamang walang umiiral na mga talaan ng kapanganakan at kasal ang mag-asawa sa Pangasiwaan ng Estadistika ng Pilipinas (PSA).[13][27] Noong una, itinanggi ni Guo na kilala niya sina Shiela at Seimen Guo, ngunit iminumungkahi ng mga talaan ng Kawanihan ng Imigrasyon na magkasama silang naglakbay sa ibang bansa.[28] Kalaunan, kinumpirma niya na mga kapatid niya sila sa ama, sa kabila ng kanilang mga sertipiko ng kapanganakan na nagsasabing ganap na silang magkakapatid.[29] Nang maglaon, nabunyag na si Guo ay may isa pang buong kapatid na nagngangalang Wesley (ipinanganak 1990, kilala rin bilang Guo Xiang Dian ayon sa NBI)[30] at iniulat na lima pang kapatid.[31][32] Sina Jian Zhong Guo at Lin Wen Yi ay mga kasamang-ingkorporador sa maraming negosyo kasama si Guo, na inaangkin ang parehong kinatatahanan sa Lungsod Quezon ayon sa mga talaan ng Komisyon sa mga Panagot at Palitan (SEC) at Kawanihan ng Rentas Internas (BIR).[25][33][34] Iginiit ni Guo na si Lin ang karelasyon at kasosyo sa negosyo ng kanyang ama, hindi ang kanyang biyolohikal na ina, at na totoo na mayroong Amelia Guo.[35][36]
Noong Hulyo 2024, nagsampa ng petisyon si Solisitor Heneral Menardo Guevarra para kanselahin ang sertipiko ng kapanganakan ni Guo na inisyu ng Pangasiwaan ng Estadistika ng Pilipinas, kasunod ng mga pagdududa sa kanyang pinagmulan at pagkamamamayan.[37]
Ipinihayag ng ilang mga residente ng Bamban, kabilang ang mga taga-barangay Virgen de los Remedios, na doon nakatira at lumaki si Guo,[22] idinagdag pa nila na mayroon din siyang kapatid.[38] Ipinahayag ni Guo na nag-aalaga ng baboy ang kanyang pamilya at lumaki siya sa isang bukid.[39] Sinabi rin niya na ginugol niya ang kanyang pagkadalaga sa Concepcion, Tarlac.[38] Bukod dito, pinapakita ng mga talaan ng pagpaparehistro ng kanyang mga kumpanya na siya ay may tirahan sa Marilao, Bulacan, at Valenzuela, Kalakhang Maynila, na binanggit ang negosyo ng kanyang mga magulang sa pagbuburda sa huli.[12] Gayunpaman, ibinunyag na walang ganoong negosyo, at ang kanyang nakalistang tirahan sa Valenzuela ay pag-aari ng isang pamilyang Bayle, ayon kay Senador Win Gatchalian.[13]
Sinabi ni Guo sa isang testimonya sa isang pinagsamang pagsisiyasat sa Komite ng Senado ng Pilipinas na nag-aaral siya sa bahay.[40] Gayunpaman, ang kanyang kapanganakan, nairehistro lamang noong Nobyembre 22, 2005,[41][42][43] na nag-udyok sa pagdududa sa kanyang maagang buhay dahil sa kawalan ng mga rekord ng kapanganakan sa ospital, ang kanyang kawalan ng kakayahan na kilalanin ang kanyang tagapagbigay sa pag-aaral sa tahanan, at tradisyonal na mga rekord sa edukasyon, na nag-uudyok ng mga pagtatanong sa kalikasan ng kanyang pag-aaral.[44]
Nang maglaon, ipinahayag na si Guo ay nag-aral sa Grace Christian High School (Grace Christian College ngayon) mula 2000 hanggang 2003, na sumasaklaw sa Una hanggang Ikatlong Baitang, ayon sa kanyang mga papeles sa pagpapatala sa nasabing paaralan.[45] Natapos niya ang kurikulum ng Tsino sa kabila ng paghihirap sa Ingles, dahil sinabi ng isa sa kanyang mga kaklase doon na dumalo siya sa mga espesyal na klase para sa mga asignaturang Filipino at kilala sa kanyang pangalang Tsino.[46]
Ayon sa Sertipiko ng Pagkakandidato para sa pagka-alkalde na inihain ni Guo sa Komisyon sa Halalan (COMELEC) noong 2021, idineklara niya ang kanyang sarili na walang asawa at inangkin ang habambuhay na paninirahan sa Pilipinas, na naninirahan sa kanyang rehistradong kinatatahanan sa Bamban sa loob ng labinwalong taon noong panahong iyon. Nabatid na siya ay nagparehistro bilang botante ng Bamban noong Abril 2021, labintatlong buwan lamang bago ang pangkalahatang halalan noong 2022, habang ipinahayag ng tagapagsalita ng COMELEC na si John Rex Laudiangco na nagparehistro siya noong 2018.[47][48] Inangkin din niya na may hawak siyang pasaporte ng Pilipinas, ang tanging hawak niya, mula noong siya ay nasa pagitan ng labimpito at labinsiyam na taong gulang, mga taong 2003 hanggang 2005.[49] Ipinapahiwatig ng mga dokumento ng aplikasyon ng SIRV ng kanyang pamilya na, bilang Guo Hua Ping, siya ay may hawak din na pasaporte ng Tsina at lumipat sa Pilipinas noong Enero 12, 2003, sa edad na labindalawa.[16]
Ayon sa kanyang Pahayag ng Ari-arian, Utang at Kabuuang Halaga (SALN) noong Disyembre 2023, nag-ulat si Guo ng netong halaga na ₱177.5 milyon, kasama ang mga propyedad na may halaga na ₱367 milyon, at mga pananagutan na lampas sa ₱189 milyon. Kabilang sa kanyang mga ari-arian ang siyam na ari-arian sa Marilao, Bamban, at Capas, na nakuha sa halagang mahigit ₱20 milyon mula noong 2008, tatlong dump truck (o trak na pantapon) na nagkakahalaga ng ₱2 milyon bawat isa, at isang helikopter, na kamakailan ay naibenta sa isang hindi kilalang kompanyang Britaniko, na nagkakahalaga ng ₱60 milyon. Nagdeklara rin si Guo ng mga bahagi sa ilang kumpanya, alahas na nagkakahalaga ng ₱1.5 milyon, at ₱198 milyon sa bangko at hawak na kuwarta.[50]
Gayunpaman, lumitaw ang mga pagkakaiba sa mga deklarasyon sa pananalapi ni Guo. Iniulat ng GMA Integrated News Research ang kanyang mga propyedad na humigit-kumulang ₱429.6 milyon sa kanyang SALN noong Hunyo 30, 2022. Ipinakita ng isang inamyendang SALN noong Hulyo 1, 2022 na ang kanyang netong halaga ay bumaba sa eksaktong ₱286 milyon, inalis ang mga ari-ariang lupain at bahay, mga bahagi sa klub, at isang ₱138 milyon na deposito sa pagkuha ng lupa na kalaunan ay naibalik noong Disyembre 31, 2022.[36] Isiniwalat din ng mga dokyumento ng Anti-Money Laundering Council na bilyun-bilyong piso ang idineposito sa mga account sa bangko ni Guo.[51]
Ibinunyag din na may hawak na tatlumpu't-isa o tatlumpu't-anim na account sa bangko si Guo sa ilalim lamang ng kanyang pangalan at nagmamay-ari ng labindalawang ari-ariang lupain at bahay, labindalawang sasakyan, at isang helikopter, ayon sa Hukuman ng Apelasyon, na naglabas ng freeze order sa mga propyedad na ito noong Hulyo 11, 2024.[52][53][54]
Lumitaw din ang mga magkasalungat na mga detalye tungkol sa mga relasyon ni Guo. Sa pagdinig sa kanya ng Senado, sinabi ni Senador Jinggoy Estrada na may live-in partner si Guo na namamahala sa operasyon ng POGO, habang ang sinabi ni Guo ay wala itong kinakasama.[55]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.