క్రికెట్ ప్రపంచ కప్ రికార్డుల జాబితా
From Wikipedia, the free encyclopedia
క్రికెట్ ప్రపంచ కప్ అనేది పురుషుల క్రికెట్లో ఒక రోజు అంతర్జాతీయ (వన్డే) పోటీ. ఇంటర్నేషనల్ క్రికెట్ కౌన్సిల్ (ఐసిసి)చే నిర్వహిస్తున్న ఈ టోర్నమెంటు 1975 లో ఇంగ్లాండ్లో మొదలై, ప్రతి నాలుగు సంవత్సరాలకు ఒకసారి జరుగుతోంది. అప్పటి నుండి జట్ల సంఖ్య, మ్యాచ్ల సంఖ్య పెరిగింది. కానీ, ఐసిసి 2007 ప్రపంచ కప్పై వచ్చిన విమర్శల నేపథ్యంలో [1] పరిమాణాన్ని తగ్గించే ఆలోచన ఉన్నట్లు ప్రకటించింది. [2]
భారత బ్యాట్స్మెన్ సచిన్ టెండూల్కర్ ప్రపంచకప్లో వ్యక్తిగత రికార్డుల శ్రేణిని కలిగి ఉన్నాడు. 1997లో విస్డెన్ క్రికెటర్స్ ఆఫ్ ది ఇయర్, "ప్రపంచంలో అత్యధిక ఫాలోవర్స్ ఉన్న క్రికెటరు" అయిన [3] టెండూల్కర్, ప్రపంచ కప్లో యాభైకి పైగా స్కోర్లు గానీ, మొత్తం పరుగులు గానీ మరే ఇతర క్రికెటర్ కంటే ఎక్కువ చేశాడు. ఆస్ట్రేలియాకు చెందిన గ్లెన్ మెక్గ్రాత్ వ్యక్తిగత బౌలింగు రికార్డులలో ఆధిపత్యం చెలాయించాడు. నాలుగు ప్రపంచ కప్లలో తన దేశం తరపున ఆడి,[4] స్ట్రైక్ రేట్, పొదుపులలో, అత్యుత్తమ బౌలర్లలో ఒకడుగా నిలిచాడు. అత్యుత్తమ వ్యక్తిగత బౌలింగు గణాంకాలు, టోర్నమెంట్ చరిత్రలో అత్యధిక వికెట్లు అతని పేరిట ఉన్నాయి.
ఆస్ట్రేలియా ఆటగాడు రికీ పాంటింగ్, శ్రీలంక ఆటగాడు కుమార సంగక్కరలు వ్యక్తిగత ఫీల్డింగ్ రికార్డులలో ముందున్నారు. పోటీల చరిత్రలో క్యాచ్ల పరంగా పాంటింగ్ అగ్రస్థానంలో ఉన్నాడు. సంగక్కర ప్రపంచ కప్ చరిత్రలో అత్యధిక ఔట్లు చేసిన వికెట్ కీపరు. ఒకే మ్యాచ్లోను (సర్ఫరాజ్ అహ్మద్తో ఉమ్మడిగా), ఒక టోర్నమెంట్లోనూ (టామ్ లాథమ్తో ఉమ్మడిగా) అత్యధిక అవుట్లు చేసిన వికెట్ కీపరుగా ఆడమ్ గిల్క్రిస్టు రికార్డు స్థాపించాడు. ఆస్ట్రేలియాకు అనేక జట్టు రికార్డులున్నాయి. అత్యధిక కప్ విజయాలు, అత్యధిక విజయాల శాతం, అత్యధిక వరుస విజయాలు ఉన్నాయి; వారు 2003, 2007 క్రికెట్ ప్రపంచ కప్ ప్రచారాలలో ఒక్క ఓటమి కూడా పొందలేదు.
విజయవంతం కాని ప్రదర్శనల రికార్డులు కూడా ఇందులో ఉన్నాయి. వీటిలో టోర్నమెంట్ చరిత్రలో కెనడా అత్యల్ప స్కోరు, జింబాబ్వే రికార్డు సంఖ్యలో ఓడిపోయిన మ్యాచ్లు, కెనడియన్ నికోలస్ డి గ్రూట్ వరుసగా మూడు డకౌట్లు వగైరా రికార్డులను కూడా ఈ పేజీలో చూడవచ్చు.