![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/a/a1/GitaUpadeshTirumala.jpg/640px-GitaUpadeshTirumala.jpg&w=640&q=50)
மகாபாரதத்தில் கிருஷ்ணன்
From Wikipedia, the free encyclopedia
மகாபாரதத்தில் கிருட்டிணன், பண்டைய பரத கண்டத்தின் காவியமான மகாபாரதத்தில், கிருட்டிணரின் அரசியல் தந்திரங்கள், பகவத் கீதை உபதேசம் மற்றும் குருச்சேத்திரப் போரில் பாண்டவர்களுக்கு ஆற்றிய உதவிகள் குறித்து கூறப்படுகிறது.
![Thumb image](http://upload.wikimedia.org/wikipedia/commons/thumb/a/a1/GitaUpadeshTirumala.jpg/640px-GitaUpadeshTirumala.jpg)
மதுராவை தலைநகராக் கொண்ட சூரசேன நாட்டின் கொடுங்கோல் மன்னரும், சொந்த தாய்மாமனுமாகிய கம்சனை கொன்று, தன் தாய்வழி தாத்தாவும், யது குல மன்னருமான உக்கிரசேனரை மீண்டும் மதுராவின் அரியணையில் அமர்த்தியதில் பாலகிருட்டிணரின் பங்கு முக்கியமானதாகும்.
வலுமிக்க மகத நாட்டு மன்னன் செராசந்தனின் மற்றும் காலயவனின் தொடர் அச்சுறுத்தல் காரணாமாக யது குலத்தின் பிரிவினர்களான விருட்சிணிகள், போசர்கள், குக்குரர்கள், அந்தகர்கள் உள்ளிட்ட 18 கிளைக் குழுவினர்கள், பரத கண்டத்தின் மேற்கிலும், மத்தியப் பகுதிகளிலும் குடியேறி, போச நாடு, ஆனர்த்தம், விதர்ப்பம், மத்சயம், சால்வம், சேதி நாடு போன்ற பகுதிகளை ஆண்டனர். கிருட்டிணரின் ஆலோசனைப்படி, சௌராட்டிரா தீபகற்பத்தின் கடற்கரையில் துவாரகை எனும் புதிய நகரை நிறுவி கிருட்டிணரைச் சார்ந்த விருட்சிணிகள் ஆண்டனர்.
குரு குல குரு நாட்டின் கௌரவர்களின் பங்காளிகளும், இந்திரப்பிரசத நாட்டு ஆட்சியாளர்களுமான பாண்டவர்களுடன் கிருஷ்ணர் நல்லுறவை வளர்த்துக் கொண்டதால் யாதவர்களின் அரசியல் பாதுகாப்பு உறுதி செய்யப்பட்டது. கிருட்டிணன், தனது அத்தை குந்தியின் மகன்களாக பாண்டவர்களில் வீமன் மற்றும் அருச்சுனன் ஆகியவர்களின் துணையுடன், யாதவர்களின் பெரும் பகைவனும், மகத நாட்டின் மன்னருமான செராசந்தனைக் கொன்றார். குருச்சேத்திரப் போரில் கௌரவர்களை வீழ்த்த கிருட்டிணன், பாண்டவர்களுக்கு அரசியல் மற்றும் போர்த் தந்திரங்களை கற்றுக் கொடுத்தார். மேலும் அருச்சுனனுக்கு பகவத் கீதை உபதேசித்தார்.
தீர்த்த யாத்திரையின் பொருட்டு துவாரகைக்கு வந்திருந்த பாண்டவ அருச்சுனனுக்கு, தன் தங்கையான சுபத்திரையை திருமணம் செய்து வைத்ததன் மூலமும், துரியோதனனின் மகள் இலக்கனையை தனது மகன் சாம்பனுடன் மணம் செய்து வைத்தன் மூலமும், யது குலம் மற்றும் குரு குலத்திற்கு இடையே ஏற்பட்ட பிணைப்பு, இரு குலத்தினரின் அரசியல் மற்றும் சமூகப் பாதுகாப்பு உறுதி செய்யப்பட்டது. பாண்டவர்களுக்குப் பின்னர், கிருட்டிணனின் தங்கை சுபத்திரையின் மகன் அபிமன்யுவின் வழித்தோன்றல்களான பரிட்சித்து மற்றும் சனமேசயன் குரு நாட்டின் அரியணை ஏறினர்.
காந்தாரியின் சாபத்தின் படி, குருச்சேத்திரப் போர் முடிந்த 36 ஆண்டுகளுக்குப் பின்னர், துவாரகையில் யாதவ குலத்தினர் தங்களுக்குள் நடந்த மௌசலப் போரில், கிருட்டிணன், பலராமன், உத்தவர், பெண்கள், குழந்தைகள் மற்றும் முதியோர் தவிர யாதவர்களில் அனைவரும் ஒருவருக்கொருவர் சண்டையிட்டு மடிந்தனர். யாவர்கள் போரிட்டு அழிவதற்கு முன்னர் உத்தவருக்கு பகவான் கிருட்டிணர், கீதா உபதேசம் செய்தார்.
துவாரகை நகரம் கடலில் மூழ்கியதை கண்ட பிறகு கிருட்டிணர், செரன் எனும் வேடுவனால் தவறாக அம்பெய்தப்பட்டதால் சட உடலை நீக்கி விட்டு வைகுந்தம் எழுந்தருளினார்.