Per er ei nordisk form av mannsnamnetPeter med opphav i det greske Petros, som tyder 'stein' eller 'klippe'. Per er også ein bretonsk variant av det franske namnet Pierre, som har same opphav. Per har namnedag den 29. juni i Noreg og Finland og 1. august i Sverige.
Det nordiske namnet er utvikla frå den gamle svenske forma av Peter, Pädher (sjå Peder).
Andre skrivemåtar for namnet er Pehr, Peer eller Pär.
Per er eit svært vanleg namn i Noreg, Sverige og Danmark. I 2006 var Per det nest mest brukte mannsnamnet i Noreg og det tredje mest brukte personnamnet uavhengig av kjønn, etter Anne og Jan.
Per er opphav til patronym-etternamn som Persen, Person og Persson. Sjølv om Per er eit særs vanleg førenamn i Noreg er ikkje Persen eit på langt nær like utbreidd etternamn. Dette fordi Peder, og ikkje Per, var den vanlege forma av namnet då overgangen frå patronymikon til etternamn kom. Pedersen er difor eit vanleg norsk etternamn. Mange av dei som heiter Persen i Noreg har samisk opphav.
Som personnamn er Per ofte brukt samansett med andre førenamn. Dei vanlegaste kombinasjonane var i 2005 Per Arne/Per-Arne, Per Kristian/Per Christian, Per Olav, Per Erik/Per-Erik og Per Gunnar.
