മേളകർത്താരാഗം
From Wikipedia, the free encyclopedia
കർണ്ണാടക സംഗീതത്തിലെ അടിസ്ഥാനരാഗങ്ങളായി കണക്കാക്കുന്ന രാഗങ്ങളാണ് മേളകർത്താരാഗങ്ങൾ അഥവാ ജനകരാഗങ്ങൾ എന്നു അറിയപ്പെടുന്നത്. രാഗാംഗരാഗങ്ങൾ എന്നും ഇതിനെ പറയാറുണ്ട്. ജനകരാഗങ്ങളുടെ എണ്ണം ക്ലിപ്തമാണ്. എന്നാൽ ജന്യരാഗങ്ങളുടെ എണ്ണം എത്രയും ആകാം. കനകാംഗി, രത്നാംഗി എന്നിങ്ങനെ തുടങ്ങുന്ന രാഗങ്ങളാണ് കർണ്ണാടകസംഗീതത്തിലെ അടിസ്ഥാനരാഗങ്ങൾ. ഇവയാണ് ജനകരാഗങ്ങൾ. ഇവയിൽ നിന്നും ജനിച്ചവ എന്ന അർത്ഥത്തിൽ മറ്റുള്ള രാഗങ്ങളെ ജന്യരാഗങ്ങൾ എന്നാണു വിളിക്കുന്നത്. ആരോഹണത്തിലും അവരോഹണത്തിലും 7 സ്വരങ്ങളും ഉണ്ട് എന്നതിനാൽ മേളകർത്താരാഗങ്ങൾ സമ്പൂർണ്ണരാഗങ്ങൾ എന്നും അറിയപ്പെടുന്നു. കാരണം അവയുടെ ആരോഹണാവരോഹണങ്ങൾ സമ്പൂർണ്ണങ്ങളായിരിക്കും. അതു ക്രമസമ്പൂർണ്ണങ്ങളുമായിരിക്കും. ആരോഹണത്തിൽ വരുന്ന അതേ സ്വരസ്ഥാനങ്ങൾ തന്നെയാണ് അവരോഹണത്തിലും വരുന്നത്. ഇവയിൽ ശുദ്ധമധ്യമം ഉപയോഗിക്കുന്ന 36 രാഗങ്ങളെ ശുദ്ധമധ്യമരാഗങ്ങൾ എന്നും പ്രതിമധ്യമം ഉപയോഗിക്കുന്ന ബാക്കി 36 രാഗങ്ങളെ പ്രതിമധ്യമരാഗങ്ങൾ എന്നും രണ്ടായി തിരിച്ചിരിക്കുന്നു.