Пена

Пена, во постарата книжевност Тетовска Бистрица, Тетовска Река (во некои пишани извори позната и како Шарска Река.^[1]) — најголемата шарпланинска река после Вардар во Полошката Котлина. Таа е и воедно најголема вардарска притока од шарпланинските реки. Во подалечното минато била нарекувана Хтетовчица

Пена
Пена во Тетово
Местоположба
Држава	Македонија
Физички особености
Извор	Чабриолица/кај Џинибег, Шар Планина
Устие	Вардар, кај Сараќино
• координати	41°59′00″N 21°03′03″E
Должина	29,7 км
Големина на сливот	192 км2
Особености на сливот
Течение	Вардар→ Егејско Море

Извор и устие

Реката југозападно од Бозовце.

Камен мост на реката Пена во Тетово.

Извориштето на реката започнува кај месноста Чабриолица и Борислоица,^[2] на јужната страна на циркот Џинибег, на некаде околу 2.400 метри надморска висина, во ливадеста зарамнина на височина.^[3] Највисокиот извор (41.967096°N 20.769833°E / 41.967096; 20.769833) понекогаш пресушува, додека подолниот извор е повеќесезонски (41.972882°N 20.765493°E / 41.972882; 20.765493).

Од нејзина десна страна, во неа се вливаат водотеците на Кривошијска и Лешничка Река.^[3] Горниот тек на реката е месно наречен Бозовска Река.^[4]

Таа тече непосредно јужно од селата Бозовце, Вешала и Бродец.

Следни други притоки на Пена се: Чепеновска, Скакалска, Караниколска, Бродечка,^[3] Пржина, Вејчка, и уште други 4 реки^[5].

Поминувајќи низ самото средиште на Тетово, таа се спушта во полошкото поле, и кај селото Сараќино се влева во Вардар.

Особености

Извориштата на реката се на околу 2.500 метри надморска висина и со висинска разлика од околу 1.914 м. Реката е долга 29,7 км.

Значење

Пена има големе значење за градот Тетово и како симбол, а и како објект од голем економски потенцијал. Од туристичка гледна точка, реката со својот див планонски тек и прекрасни водопади, мами голем број на туристи. Од економски аспект реката е важна, бидејќи на неа се наоѓаат 4 мали хидроцентрали, од кои едната е прва хидроцентрала во Македонија.

Во 1979 година, по поројните дождови реката има надојдено и поплавено голем дел од Тетово, при што нанела големи штети.^[6]

Галерија

• 
  Реката по вливот на Кривошијска Река
• 
  Реката по вливот на Лешничка Река
• 
  Реката во средиштето на Тетово
• 
  Реката во средиштето на Тетово

Поврзано

• Клисура на Пена
• Шарски хидроцентрали
• Шарпланински реки

Наводи

1. Петров, Гьорче. Материали по изучванието на Македония. Печатница Вълковъ, Софија. стр. 264
2. Душан Кривокапиќ: „Шар-Планина“, издание на „Туристичка Штампа“, Белград, 1969 г.
3. „ХИДРОЛОГИЈА“. sharplanina.com.mk. Архивирано од изворникот 2014-05-31. Посетено на 28 јули 2023.
4. „с. Бозовце – Долна Лешница – Кривошијски Водопад“. turnimedakinisam.mk. Архивирано од изворникот 2023-07-28. Посетено на 28 јули 2023.
5. Живко Стефановски, Напредок Тетово, Шар Планина, стр. 68-70
6. Кузман Најденоски: „Тетово во минатото“, издание од 1964 година. Печатница „Напредок“ Тетово

Надворешни врски

„Пена“ на Ризницата ?