Lazarôsy avy any Betania

I Lazarôsy na Lazara dia olona nifanerasera tamin' i Jesoa, izay tantaraina ao amin' ny Testamenta Vaovao, araka ny Evanjelin' i Joany (Joa. 11), fa maty nandritra ny efatra andro sady efa nalevina tany am-pasana, ka novohana dia nitsangan-ko velona araka ny baikon' i Jesoa.

Ny fananganana an' i Lazarôsy tamin' ny maty, sary nataon' i Duccio di Buoninsegna.

Araka ny Evanjelin' i Joany dia sakaizan' i Jesoa i Lazarôsy, sady anadahin' i Marta sy i Maria avy any Betania. Nonina tao Betania, izay tanàna kely niorina teo amin' ny ilany atsinan' ny tendrombohitra Analanôliva (na Tendrombohitra Ôliva), izy ireo. Araka ny Evanjelin' i Joany ihany (Joa 12.10), taorian' ny nananganana azy tamin' ny maty dia nikasa ny hamono azy indray ny mpisoron-dehibe (i Kaiafa sy i Anàna).

Ny anarany dia avy amin' ny anarana arameana sy hebreo hoe אלעזר / Elʿāzār ("nanampy Andriamanitra). Io anarana io ihany koa no gasina hoe Eleazara.

Fitantarana ao amin' ny Baiboly

Ao amin' ny Filazantsara araka an' i Joany no misy io tantara io, ao amin' ny toko faha-11, andininy 1 - 45.

  ¹Nisy lehilahy anankiray narary, dia Lazara avy any Betania, vohitr' i Maria sy Marta rahavaviny. ²Maria dia ilay vehivavy nanosotra diloilo manitra ny Tompo sy namaoka ny tongony tamin' ny volon-dohany; ary Lazara anadahiny no narary. ³Dia naniraka tany amin' i Jesoa ireto anabaviny hilaza hoe: Tompo, marary ilay tianao. ⁴Nony ren' i Jesoa izany dia hoy izy: Aretina tsy ho fahafatesana ity, fa ho voninahitr' Andriamanitra, sy hahazoan' ny Zanak' Andriamanitra voninahitra. ⁵Ary tian' i Jesoa i Marta sy Maria rahavaviny ary Lazara. ⁶Nefa nony reny hoe marary Lazara, dia mbola nitoetra indroa andro tamin' izay nitoerany ihany izy. ⁷Nony afaka izany vao hoy izy tamin' ny mpianany: Andeha isika ho any Jodea indray. ⁸Ka hoy ny mpianany taminy: Raby ô, vao haingana teo no nitady hitora-bato anao ny Jody, ka dia hankany indray ve hianao?[...] ¹¹Nony voalazany izany dia nampiany hoe: Matory Lazara sakaizantsika, fa ndeha hamoha azy aho. ¹²Ka hoy ny mpianany: Raha matory izy, Tompoko, dia ho sitrana. ¹³Ny fahafatesany no nolazain' i Jesoa, nefa torimaso tsotra izao kosa no nampoizin' izy ireo.

      ¹⁴Izay Jesoa vao nilaza tsotra tamin' izy ireo hoe: Maty Lazara, ¹⁵ary noho hianareo dia faly aho satria tsy tao, mba hinoanareo; koa andeha isika hankany aminy. ¹⁶Dia hoy Tomà izay atao hoe Didimo tamin' ny mpianatra namany: Andeha koa isika mba hiara-maty aminy. ¹⁷Nony tonga tany Jesoa, dia hitany fa efa nilevina hefarana izy. ¹⁸Ary Betania dia tao akaikin' i Jerosalema tokony ho dimy ambin' ny folo stady, ¹⁹ka maro tamin' ny Jody no tonga tao amin' i Marta sy Maria mba hitsapa alahelo azy noho ny nahafatesan' ny anadahiny.

      ²⁰Vantany vao ren' i Marta fa hoe tamy Jesoa, dia nandeha nitsena azy izy, fa Maria no nijanona tao an-trano. ²¹Dia hoy Marta tamin' i Jesoa: Raha tatý hianao, Tompoko, dia tsy maty ny anadahiko. ²²Ary na dia izao aza, dia fantatro fa na inona na inona hangatahinao amin' Andriamanitra, dia homen' Andriamanitra anao. ²³Hoy Jesoa taminy: Hitsangana ny anadahinao. ²⁴Fa hoy Marta taminy: Fantatro fa hitsangana izy amin' ny farandro fitsanganan' ny maty. ²⁵Hoy Jesoa taminy: Izaho no fananganana sy fiainana; izay mino ahy, na dia maty aza, dia ho velona indray; ²⁶ary izay rehetra velona ka mino ahy dia tsy ho faty mandrakizay. Mino izany va hianao? ²⁷Eny, Tompoko, hoy izy taminy, mino aho fa hianao no Kristy Zanak' Andriamanitra velona, ilay hoe ho tonga amin' izao tontolo izao. ²⁸Ary rahefa nilaza izany izy, dia lasa niantso mangingina an' i Maria rahavaviny nanao hoe: Ao ny Tompo, ka miantso anao izy.

      ²⁹Vao nandre izany kosa Maria, dia nitsangana niaraka tamin' izay, ka nankao aminy. ³⁰Fa mbola tsy tonga tao an-tanàna Jesoa, fa mbola teo amin' izay nitsenan' i Marta azy ihany. ³¹Nony hitan' ny Jody izay tao amin' i Maria tao an-trano sy nitsapa alahelo azy fa nitsangana haingana izy ka nivoaka, dia nanaraka azy izy ireo, fa nihevitra hoe: Lasa hitomany any amin' ny fasana izy. ³²Maria kosa, nony tonga teo amin' izay nitoeran' i Jesoa ka nahita azy, dia niankohoka tamin' ny tongony sy nanao taminy hoe: Raha tatý hianao, Tompoko, dia tsy maty ny anadahiko.

      ³³Nony nahita azy nitomany Jesoa sy ireto Jody niara-nitomany taminy koa, dia nandevy ny fony ary nientana iray ihany ny tenany rehetra. ³⁴Aiza no nandevenanareo azy, hoy izy? Dia hoy ireo taminy: Andeha hianao hizaha, Tompoko. ³⁵Ary nitomany Jesoa. ³⁶Dia hoy ny Jody: Akory ity haben' ny fitiavany azy! ³⁷Fa hoy kosa ny sasany tamin' izy ireo: Tsy azony natao va re ny nisakana an-dralehilahy ity tsy ho faty, nefa ny mason' ilay teraka jamba nampahiratiny? ³⁸Dia niontana indray ny fon' i Jesoa, ary lasa izy nankeo amin' ny fasana, izay zohy norakofana vato. ³⁹Esory ny vato, hoy izy. Ka hoy Marta anabavin' ny maty taminy: Efa maimbo izy, Tompoko, fa efa hefarana izay. ⁴⁰Ary hoy Jesoa taminy: Tsy efa voalazako taminao va fa raha mino hianao, dia hahita ny voninahitr' Andriamanitra? ⁴¹Dia nesorina ny vato, ka niandrandra Jesoa sy nanao hoe: Misaotra anao aho, Raiko, satria efa nihaino ahy hianao. ⁴²Raha izaho, dia fantatro fa mihaino ahy mandrakariva hianao; fa noho ireto vahoaka manodidina ahy kosa no nilazako izany, mba hinoany fa hianao no naniraka ahy. ⁴³Rahefa nilaza izany izy dia niantso tamin' ny feo mahery hoe: Mivoaha, ry Lazara. ⁴⁴Ka niaraka tamin' izay dia nivoaka ny maty, ny tongotra aman-tànany nisy fehim-paty, ary ny tavany nisarona lamba. Dia hoy Jesoa tamin' ny olona: Vahao izy ka avelao handeha. ⁴⁵Ary maro tamin' ny Jody izay tonga tao amin' i Maria sy Marta sy nahita ny nataon' i Jesoa no nino azy. (Joany 11.1-45, Ny Baiboly Masina)

Jereo koa

• Marta

• Maria avy any Betania

• Fahagagana natan' i Jesoa
• Betania
• Eleazara

Fitsanganan' i Lazarôsy tamin' ny maty avy ao am-pasany