From Wikipedia, the free encyclopedia
Leo Allatius (Λιωνής Αλάτζης, Lione Allacci; natus anno circiter 1586 in urbe Chio; mortuus Patavii die 19 Ianuarii 1669)[1] fuit eruditus linguarum Graecae et Latinae, theologus, philologus et bibliothecarius papalis.
Patre Nicolao Alatze, matre Sebaste Neuride, natus est in insula Chio anno 1586 (ita Karen Hartnup aliique) vel 1588 (ita Thomas Papadopulus); an religioni Catholicae aut Orthodoxae a principio haerebat incertum est. Scholam in urbe nativa intravit, avunculo Michaele Neuride praeceptore; is autem iuvenem in Italiam anno 1596 removit, qui duos annos Messanae degit, unum Neapoli, moxque ab anno 1500 Romae ubi in Collegium Graecum introductus est. Post undecim annos nuper graduatus Anglonam petivit ubi episcopo Anglonensi Bernardo Giustiniani ministravit. Anno 1615 ad insulam nativam reditus est, sed brevissimo spatio. Collegii Graeci mox lector artis rhetoricae factus est et bibliothecaeque Vaticanae scriptor. Anno 1622, bibliotheca Palatina ab electore Maximiliano Bavarensi papae data, Allatius ipse Heidelbergam missus est (petente cardinale bibliothecario Scipione Cobellutio) ut transportationem librorum manu scriptorum fere 3 500 curaret. Allatius postea bibliothecarius meruit iuxta cardinalem Franciscum Barberini; sed ab anno 1661 a papa Alexandro VII bibliothecae Vaticanae praepositus est, quod officium usque ad mortem retinuit. Libros manu scriptos Graecos et Syriacos a se collectos in bibliothecam Orientalem a Gregorio XV inceptam adiunxit.
Opera Allatii Ioannes Albertus Fabricius in Bibliotheca Graeca et post eum E. Legrand in Bibliographie hellénique du XVIIe siècle enumeraverunt. In scriptis suis saepe unitatem ecclesiarum Romanae et Graecae suadebat, brevius in dissertatione "De Georgiis eorumque scriptis" quam editioni Georgii Acropolitae praefixit, evolutissime in libris De Ecclesiae Occidentalis atque Orientalis perpetua consensione quos anno 1648 edidit. Musicologis utilissimum inter omnia opera Allatii est Drammaturgia, anno 1666 editum; in quo opere historiam et bibliographiam theatri lyrici Italiani digerit. Philologi citant editionem principem quam anno 1629 curavit commentarii in Hexahemeron saeculo VI ab ignoto quodam Graece scripti, falso Eustathio Antiocheno attributi.
Schedaria locupletissima et epistolaria Allatii in bibliotheca Oratorianorum reperiuntur; opera eius nondum edita in bibliotheca Vallicelliana servantur.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
