Historia Caribica
From Wikipedia, the free encyclopedia
Historia Caribica partes magni momenti in regione in colonicis potestatum Europaearum certaminibus ex saeculo quinto decimo actas retegit. Prima Christophori Columbi navigatio anno 1492 ad mare Caribicum pervenit, cum Columbus omnem regionem Hispanicam vindicaret. Primae coloniae Hispanicae in regione ex anno 1493 deducebantur. Quamquam victoriae Hispanicae de imperio Azteco et imperio Incarum saeculo sexto decimo ineunte fecerunt ut Mexicum et Peruvia essent desiderabiliores explorationis et colonizationis Hispanicae loci, regio Caribica magnopere apportuna manebat.
Ex annis 1620 et 1630, praedatores maritimi, negotiatores, et coloni non Hispanici novas colonias et stationes commerciales in insulis ab Hispania neglectis constituerunt. Quae coloniae per regionem extendebantur, a Bahamis in septentrione et occidente ad Tabacum in meridie et oriente. Praeterea, ex annis 1620, piratae Francici Anglicique Tortugae in insula propinqua, in septentrionalibus occidentalibusque Hispaniolae litoribus (nunc a Haitia et Republica Dominicana rectis), et deinde in Iamaica se conlocabant.
Bellis libertatis Hispano-Americanis saeculo undevicensimo ineunte confectis, solum insulae Cuba et Portus Dives partes Imperii Hispanici in Novo Mundo manebant. Saeculo vicensimo, regio Caribica iterum locus magni momenti erat per secundum bellum mundanum, in serie decolonizationum post bellum, et in certamine inter Cubam communisticam et Civitates Foederatas. Genocidium, servitus, immigratio, aemulatioque inter magnas potestates historiam Caribicam affecerunt regionis magnitudini inaequales.