ಅಡೋಲ್ಫ್ ಹಿಟ್ಲರ್
From Wikipedia, the free encyclopedia
ಅಡಾಲ್ಫ್ ಹಿಟ್ಲರ್ , (೨೦ ಏಪ್ರಿಲ್ ೧೮೮೯ - ೩೦ ಏಪ್ರಿಲ್ ೧೯೪೫) ಆಸ್ಟ್ರಿಯಾದಲ್ಲಿ ಜನಿಸಿದ ಜರ್ಮನ್ ರಾಜಕಾರಣಿ ಹಾಗೂ ನಾಜಿ ಪಕ್ಷವೆಂದೇ ಖ್ಯಾತವಾದ ನ್ಯಾಶನಲ್ ಸೋಶಿಯಲಿಸ್ಟ್ ಜರ್ಮನ್ ವರ್ಕರ್ಸ್ ಪಾರ್ಟಿಯ (ಸಂಕ್ಷಿಪ್ತ ರೂಪ NSDAP) ನೇತಾರನಾಗಿದ್ದವನು. ಈತನು ೧೯೩೩ರಿಂದ ೧೯೪೫ರ ವರೆಗೆ ಜರ್ಮನಿಯನ್ನು ಆಳಿದನು. ೧೯೩೩ರಿಂದ ೧೯೪೫ರವರೆಗೆ ಚಾನ್ಸೆಲರ್ ಆಗಿ ಹಾಗೂ ೧೯೩೪ರಿಂದ ೧೯೪೫ರವರೆಗೆ ರಾಷ್ಟ್ರದ ಮುಖ್ಯಸ್ಥನಾಗಿ ಆಡಳಿತ ನಡೆಸಿದನು. ಮೊದಲನೇ ವಿಶ್ವಯುದ್ಧದ ಅನುಭವದಲ್ಲಿ ಪಳಗಿದ್ದ ಹಿಟ್ಲರನು ೧೯೧೯ರಲ್ಲಿ ನಾಝಿ ಪಕ್ಷವನ್ನು ಸೇರಿಕೊಂಡನು ಮತ್ತು ೧೯೨೧ರಲ್ಲಿ NSDAPಯ ಅಧ್ಯಕ್ಷನಾದನು.೧೯೨೩ರಲ್ಲಿ ಗುರಿತಲುಪಲು ವಿಫಲನಾಗಿ ಬವೇರಿಯಾದಲ್ಲಿ ಬಂಧನಕ್ಕೊಳಗಾದ ಅನಂತರದ ದಿನಗಳಲ್ಲಿ ಆತನು, ಜರ್ಮನ್ ರಾಷ್ಟ್ರೀಯವಾದ, ಸೆಮಿಟಿಸಮ್ ವಿರೋಧಿ ನಿಲುವು, ಹಾಗೂ ಕಮ್ಯುನಿಸಮ್ ವಿರೋಧೀ ನಿಲುವುಗಳನ್ನು ರಮಣೀಯವಾಗಿ ನಿರೂಪಿಸುತ್ತ, ತನ್ನ ಮಾತುಗಾರಿಕೆ ಹಾಗೂ ಪ್ರಚಾರ ಕಾರ್ಯಗಳಿಂದ ಜನಬೆಂಬಲ ಗಳಿಸಿಕೊಂಡನು.ಆತನು ೧೯೩೩ರಲ್ಲಿ ಚಾನ್ಸೆಲರ್ ಆಗಿ ನೇಮಕೊಂಡು, ಅತ್ಯಲ್ಪಾವಧಿಯಲ್ಲಿಯೇ ರಾಷ್ಟ್ರೀಯ ಸಮಾಜವಾದದ ಸಂಪೂರ್ಣಾಧಿಕಾರ ಹಾಗೂ ನಿರಂಕುಶ ಪ್ರಭುತ್ವ ಗಳ ಬಲದಿಂದ ಏಕಪಕ್ಷೀಯ ಸರ್ವಾಧಿಕಾರವನ್ನು ಸ್ಥಾಪಿಸಿದನು. ಹಿಟ್ಲರನು ಆರ್ಯಜನಾಂಗೀಯರಿಗಾಗಿ ಲೇಬನ್ಸ್ರಾವ್ಮ್ (``ಬದುಕುವ ಅವಕಾಶ") ಕಿತ್ತುಕೊಳ್ಳುವ ಘೋಷಿತ ಉದ್ದೇಶದ ವಿದೇಶೀನೀತಿಯನ್ನು ಬೆನ್ನತ್ತಿದನು ಮತ್ತು ರಾಷ್ಟ್ರದ ಸಂಪನ್ಮೂಲಗಳನ್ನು ಈ ಉದ್ದೇಶದತ್ತ ತಿರುಗಿಸಿಕೊಂಡನು. ಹಿಟ್ಲರನು ಜರ್ಮನಿಯನ್ನು ಯುದ್ಧಸನ್ನದ್ಧಗೊಳಿಸಿದನು, ಮತ್ತು ೧೯೩೯ರಲ್ಲಿ ಜರ್ಮನ್ ಸೇನೆಯು (ವೆಹ್ರ್ಮ್ಯಾಚ್) ಪೋಲ್ಯಾಂಡ್ ಮೇಲೆ ಆಕ್ರಮಣ ಮಾಡುವ ಮೂಲಕ ಯುನೈಟೆಡ್ ಕಿಂಗ್ ಡಮ್ ಹಾಗೂ ಫ್ರಾನ್ಸ್ಗಳು ನಾಝಿ ಜರ್ಮನಿಯ (ಥರ್ಡ್ ರೀಚ್) ವಿರುದ್ಧ ಯುದ್ಧ ಘೋಷಿಸುವಂತಾಗಿ, ಈ ಘಟನೆಯು ಯುರೋಪಿನಲ್ಲಿ ಎರಡನೆ ಮಹಾಯುದ್ಧಕ್ಕೆ ದಾರಿ ಮಾಡಿಕೊಟ್ಟಿತು.[1] ಮೂರು ವರ್ಷಗಳೊಳಗಾಗಿ ಜರ್ಮನಿ ಮತ್ತು ಆಕ್ಸಿಸ್ ಶಕ್ತಿಗಳು (ಮಿಲಿಟರಿ ಒಪ್ಪಂದ ಮಾಡಿಕೊಂಡಿದ್ದ ರಾಷ್ಟ್ರಗಳು) ಯುರೋಪಿನ ಬಹುಭಾಗವನ್ನು, ಉತ್ತರ ಆಫ್ರಿಕಾದ ಬಹುಭಾಗವನ್ನು ಹಾಗೂ ಪೂರ್ವ ಮತ್ತು ಆಗ್ನೇಯ ಏಷ್ಯಾ ಮತ್ತು ಪೆಸಿಫಿಕ್ ಸಮುದ್ರವನ್ನು ಆಕ್ರಮಿಸಿದವು.೧೯೪೨ರ ಅನಂತರದ ದಿನಗಳಲ್ಲಿ ಮಿತ್ರ ರಾಷ್ಟ್ರಗಳು ಮೇಲುಗೈ ಸಾಧಿಸತೊಡಗಿದ್ದವು ಮತ್ತು ೧೯೪೫ರಲ್ಲಿ ಮಿತ್ರ ರಾಷ್ಟ್ರಗಳ ಸೇನೆಗಳು ಜರ್ಮನಿಯನ್ನು ಎಲ್ಲ ದಿಕ್ಕುಗಳಿಂದಲೂ ಮುತ್ತಿಗೆ ಹಾಕಿದವು. ಆತನ ಸೇನೆಯು ಯುದ್ಧ ಸಂದರ್ಭದಲ್ಲಿ ಸುಮಾರು 1.7 ಕೋಟಿ ನಾಗರಿಕರನ್ನು,[2] ಅವರಲ್ಲಿ ಅಂದಾಜಿನ ಪ್ರಕಾರ ಆರು ಮಿಲಿಯನ್ ಯಹೂದಿಗಳನ್ನು, ಹಾಲೋಕ್ಯಾಸ್ಟ್ ಎಂದು ಕುಖ್ಯಾತವಾದ ಯೋಜಿತ ನರಮೇಧದ ಮೂಲಕ ವ್ಯವಸ್ಥಿತವಾಗಿ ಕೊಲ್ಲುವುದು ಮತ್ತಿತರ ಹಲವು ಬಗೆಯ ದೌರ್ಜನ್ಯಗಳನ್ನು ಎಸಗಿತ್ತು. ೧೯೪೫ರಲ್ಲಿ, ಯುದ್ಧದ ಕೊನೆಯ ದಿನಗಳಲ್ಲಿ ಹಿಟ್ಲರನು ತನ್ನ ದೀರ್ಘಕಾಲದ ಪ್ರೇಯಸಿ ಎವಾ ಬ್ರೌನ್ ಳನ್ನು ವಿವಾಹವಾದನು.ಅನಂತರ ಎರಡು ದಿನಗಳೊಳಗಾಗಿ ಅವರಿಬ್ಬರೂ ಆತ್ಮಹತ್ಯೆ ಮಾಡಿಕೊಂಡರು.[3]
ಅಡೋಲ್ಫ್ ಹಿಟ್ಲರ್ | |
೧೯೩೪ ಭಾವಚಿತ್ರ | |
ಜರ್ಮನಿಯ ಫ್ಯೂರರ್ | |
ಅಧಿಕಾರದ ಅವಧಿ ೨ ಆಗಸ್ಟ್ ೧೯೩೪ – ೩೦ ಏಪ್ರಿಲ್ ೧೯೪೫ | |
ಪೂರ್ವಾಧಿಕಾರಿ | ಪಾಲ್ ವಾನ್ ಹಿಂಡೆನ್ಬರ್ಗ್ (ಅಧ್ಯಕ್ಷರಾಗಿ) |
---|---|
ಉತ್ತರಾಧಿಕಾರಿ | ಕಾರ್ಲ್ ಡೋನಿಟ್ಜ್ (ಅಧ್ಯಕ್ಷರಾಗಿ) |
ರೀಚ್ಸ್ಕಾಂಜ್ಲರ್ (ಚಾನ್ಸೆಲರ್) | |
ಅಧಿಕಾರದ ಅವಧಿ ೩೦ ಜನವರಿ ೧೯೩೩ – ೩೦ ಏಪ್ರಿಲ್ ೧೯೪೫ | |
ಪೂರ್ವಾಧಿಕಾರಿ | ಕರ್ಟ್ ವಾನ್ ಷ್ಲೀಚರ್ |
ಉತ್ತರಾಧಿಕಾರಿ | ಜೋಸೆಫ್ ಗೋಬೆಲ್ಸ್ |
ಜನನ | ೨೦ ಏಪ್ರಿಲ್ ೧೮೮೯ ಬ್ರೌನೌ ಆಮ್ ಇನ್, ಆಸ್ಟ್ರಿಯಾ- ಹಂಗೇರಿ |
ಮರಣ | 30 April 1945(1945-04-30) (aged 56) ಬರ್ಲಿನ್, ಜರ್ಮನಿ |
ರಾಜಕೀಯ ಪಕ್ಷ | ರಾಷ್ಟ್ರೀಯ ಸಮಾಜವಾದಿ ಜರ್ಮನ್ ವರ್ಕರ್ಸ್ ಪಾರ್ಟಿ (NSDAP) |
ಜೀವನಸಂಗಾತಿ | ಇವಾ ಬ್ರೌನ್ (೨೯ ಏಪ್ರಿಲ್ ೧೯೪೫ ರಂದು ವಿವಾಹವಾದರು) |
ಹಸ್ತಾಕ್ಷರ |