From Wikipedia, the free encyclopedia
ლინკინ პარკი (ინგლ. Linkin Park) — ამერიკული როკ-ჯგუფი აგურა-ჰილზიდან (კალიფორნია). ჩამოყალიბდა 1996 წელს და საერთაშორისო წარმატებას მიაღწია სადებიუტო ალბომით Hybrid Theory (2000), რომელმაც 2005 წელს RIAA-ს ალმასის სერტიფიცირება მიიღო და მრავალი გზის პლატინიანი გახდა სხვადასხვა ქვეყანაში.[1] შემდეგი ალბომით Meteora (2003) ჯგუფის წარმატება გამყარდა. იგი 2003 წელს მოხვდა Billboard 200-ში, რასაც მოჰყვა მსოფლიო ტურნე და საქველმოქმედო საქმიანობა.[2]
ლინკინ პარკი | |
---|---|
ჯგუფის გამოსვლა 2010 წელს, ბერლინში | |
ბიოგრაფია | |
აგრეთვე ცნობილი როგორც |
|
წარმოშობა | აგურა-ჰილზი, კალიფორნია, აშშ |
ჟანრ(ებ)ი |
|
აქტიური | 1996–დღემდე |
ლეიბლ(ებ)ი |
|
წევრები |
|
ყოფილი წევრები |
|
საიტი | linkinpark.com |
ლინკინ პარკი ვიკისაწყობში |
პირველ ორ ალბომში ნიუ-მეტალის და რეპ-მეტალის რადიოსთვის ადაპტირებით,[3][4][5] ჯგუფმა შემდგომ დისკზე Minutes to Midnight (2007) მიმართა სხვა ჟანრებს.[6][7] ეს ალბომი Billboard-ის სათავეში მოხვდა და იმ წელს გამოსული ალბომების დებიუტებს შორის წარმატებით მესამე იყო.[8][9] ჯგუფმა განაგრძო სხვადასხვა ჟანრთან ექსპერიმენტები მეოთხე ალბომში A Thousand Suns (2010), მიანიჭა რა მუსიკას უფრო მეტად ელექტრონული ჟღერადობა. მეხუთე ალბომში Living Things (2012) ყველა წინა ალბომის მუსიკალური ელემენტები გამოიყენეს. The Hunting Party (2014) იყო დაბრუნება ჯგუფისთვის უფრო ტრადიციულ როკ-ჟღერადობასთან. მეშვიდე ალბომი, One More Light (2017) კვლავ ელექტრონული და პოპ-მუსიკის ელემენტებით გაჯერებულია.[10] ჯგუფის ლიდერმა, ჩესტერ ბენინგტონმა თავი მოიკლა ამ ალბომის გამოცემიდან ორი თვის შემდეგ.[11]
წლების განმავლობაში ლინკინ პარკი აგრეთვე თანამშრომლობდა სხვა შემსრულებლებთან. რეპერ ჯეი-ზისთან ერთად მან ჩაწერა EP Collision Course, სხვა შემსრულებლების მონაწილეობით შექმნეს რემიქსული Reanimation და Recharged.[4]
2003 წელს MTV2-მა ლინკინ პარკი დაასახელა მუსიკალური ვიდეოების ეპოქის რიგით მეექვსე უდიდეს ჯგუფად და ახალ ათასწლეულში - მესამედ.[12] „ბილბორდმა“ ლინკინ პარკს მიანიჭა #19 პოზიცია ათწლეულის საუკეთესო შემსრულებლების სიაში.[13] 2012 წელს VH1-ის გამოკითხვაში ლინკინ პარკი 2000-იანების უდიდესი შემსრულებლის რეპუტაციას ფლობდა.[14] 2014 წელს Kerrang!-მა იგი „ამჟამად მსოფლიოს უდიდეს როკ-ჯგუფად“ დაასახელა.[15][16] მსოფლიოში გაყიდულია ლინკინ პარკის 68 მილიონზე მეტი ალბომი. ჯგუფს მიღებული აქვს გრემის ორი ჯილდო.[17][18][19]
ლინკინ პარკი ჩამოყალიბდა სკოლის სამი მეგობრის - მაიკ შინოდას, რობ ბურდონის და ბრედ დელსონის მიერ.[20] სამივე დადიოდა აგურას უმაღლეს სკოლაში. მათ შეუერთდნენ ჯო ჰენი, დეივ „ფინიქს“ ფარელი და მარკ უეკფილდი. ჯგუფს თავდაპირველად Xero ეწოდებოდა. მიუხედავად შეზღუდული ტექნიკური საშუალებებისა, მათ სტუდიად გადაკეთებულ შინოდას ოთახში ჩაწერა 1996 წელს დაიწყეს, რაც შემდგომში იქცა დემო-ფირ Xero-დ.[20][21] უთანხმოებები წარმოიშვა მას შემდეგ, რა ლეიბლთან კონტრაქტი ვერ მოიპოვეს.[20] წარმატების არარსებობის და სტაგნაციის ფონზე უეიკფილდმა, რომელიც წამყვან ვოკალს ასრულებდა, ჯგუფი სხვა პროექტების ძიებაში დატოვა.[20][21] ფარელი გადავიდა Tasty Snax-ში, რომელიც ქრისტიანული პანკის და სკას ჟანრის მუსიკას ასრულებდა.[22][23]
უეიკფილდის შემცვლელის ხანგრძლივი დროის განმავლობაში ძიების შემდეგ Xero-მ 1999 წლის მარტში აიყვანა არიზონელი ჩესტერ ბენინგტონი, რომელიც მათ ურჩია ჯეფ ბლუმ, Zomba Music-ის ვიცეპრეზიდენტმა.[24][25] ბენინგტონი, პოსტ-გრანჟ ჯგუფ Grey Daze-ის ყოფილი მონაწილე, სხვა კანდიდატებთან შედარებით გამოირჩეოდა ვოკალურ შესრულებაში დინამიურობით.[20] კოლექტივმა სახელი Hybrid Theory-ზე შეცვალა. შინოდას და ბენინგტონს შორის წარმოშობილი ვოკალური კავშირით ჯგუფი გამოცოცხლდა და გაუჩნდა ახალ მასალაზე მუშაობის მოტივაცია.[20] 1999 წელს მათ სასათაურო EP გამოსცეს, რომელიც ვრცელდებოდა ინტერნეტის ჩატ-კონფერენციებში და ფორუმებში, რაშიც ცალკე პრომო-ჯგუფი ეხმარებოდა.[26][27] შემადგენლობის რენესანსი დასრულდა სახელწოდების ცვლილებით. „ლინკინ პარკი“ აირჩიეს სანტა-მონიკაში მდებარე ლინკოლნ პარკის პატივსაცემად.[20] თავდაპირველად მათ ამ უკანასკნელის გამოყენება სურდათ, მაგრამ ინტერნეტ-დომენის „linkinpark.com“ მოსაპოვებლად საბოლოო ვარიანტზე შეთანხმდნენ.[28] თუმცა, ლეიბლთან კონტრაქტის მოპოვების სირთულე აქტუალური დარჩა. მათ კვლავ ჯეფ ბლუს მიმართეს, მას შემდეგ, რაც რამდენიმე ლეიბლმა უარი უთხრა. ბლუ, რომელმაც მანამდე Warner Bros. Records-ისგან მათ მიმართ კეთინგანწყობა უკვე სამჯერ ვერ მოიპოვა, იმ პერიოდში ლეიბლის პრეზიდენტი იყო და 1999 წელს ლინკინ პარკმა, საბოლოოდ, Warner-თან კონტრაქტიც მიიღო. წარმატებული დისკი Hybrid Theory მათ შემდეგ წელს გამოუშვეს.[24]
სადებიუტო ალბომი Hybrid Theory ჯგუფმა 2000 წლის 24 ოქტომბერს გამოსცა.[29][30] მასში შეტანილია ნახევარი ათწლეულის განმავლობაში შექმნილი მასალა, ჩაწერილი პროდიუსერ დონ გილმორის თანაშემწეობით.[20] Hybrid Theory-ს წილად ხვდა დიდი კომერციული წარმატება. პირველ წელს იგი გაიყიდა 4.8 მილიონი ასლის ოდენობით, იყო 2001 წლის ბესტსელერი, ხოლო სინგლებმა „Crawling“ და „One Step Closer“ ალტერნატიულ როკ-რადიოებში ადგილი დაიმკვიდრეს.[22] ამასთან, ალბომიდან გამოცემული სინგლები მოხვდა ფილმებში „დრაკულა 2000“, „ნიკი, უმცროსი ეშმაკი“ და „ვალენტინობა“.[22] Hybrid Theory-მ მიიღო გრემის ჯილდო საუკეთესო მძიმე როკის კატეგორიაში სიმღერისთვის „Crawling“ და წარდგენილი იყო კიდევ ორ, საუკეთესო ახალი შემსრულებლის და საუკეთესო როკ-ალბომის ნომინაციებში.[31] MTV-მ ჯგუფს მიანიჭა ჯილდო საუკეთესო როკ-ვიდეოსთვის და საუკეთესო რეჟისურისთვის, „In the End“-ისთვის.[20] გრემიზე გამარჯვების შედეგად ლინკინ პარკმა პოპულარობა მთელ მსოფლიოში მოიპოვა.
ამ პერიოდში ლინკინ პარკს იწვევდნენ მრავალი სხვა ტურნეს და კონცერტის შემადგენლობაში - ასეთები იყო Ozzfest, Family Values Tour და KROQ Almost Acoustic Christmas.[22][32] ჯესიკა სკლართან ერთად 2001 წლის ნოემბერში ჯგუფმა ჩამოაყალიბა ოფიციალური ფან-კლუბი და მოხალისეთა გუნდი „Linkin Park Underground“.[33] ლინკინ პარკმა აგრეთვე დააარსა საკუთარი ტურნე, Projekt Revolution, რომელშიც მონაწილეობდნენ Cypress Hill, Adema და სნუპ დოგი.[24] ერთი წლის განმავლობაში კოლექტივმა 320-ზე მეტი გამოსვლა გამართა.[20] ამ პერიოდის საკონცერტო ვიდეოები შეტანილია ლინკინ პარკის პირველ DVD-ზე Frat Party at the Pankake Festival, რომელიც 2001 წლის ნოემბერში გამოვიდა. ყოფილ ბასისტ ფინიქსთან ერთად ჯგუფმა დაიწყო მუშაობა რემიქსულ ალბომზე Reanimation, რომელშიც შეტანილია ნამუშევრები Hybrid Theory-დან და მის მიღმა დარჩენილი სიმღერები.[22] Reanimation 2002 წლის 30 ივლისს გამოვიდა. მის ჩაწერაში აგრეთვე მონაწილეობდნენ Black Thought, ჯონათან დეივისი, აარონ ლუისი და სხვები.[34] დისკი გამოსვლისთანავე Billboard 200-ის მეორე პოზიციაზე მოხვდა და უმალვე გაიყიდა თითქმის 270 000 ასლის სახით.[35] Hybrid Theory კი მოხვდა RIAA-ს „100 საუკეთესო ალბომს“ შორის.[36]
Hybrid Theory-ს და Reanimation-ის წარმატების შემდეგ ჯგუფმა დროის დიდი ნაწილი დაუთმო აშშ-ში ტურნეს. ახალ მასალაზე მუშაობა ამავე პერიოდში, ტურნეს პარალელურად დაიწყეს, როდესაც თავისუფალ დროს ავტობუსში ატარებდნენ.[37] ახალ სტუდიურ დისკზე მუშაობის შესახებ ოფიციალურად გახდა ცნობილი 2002 წლის დეკემბერში. ლინკინ პარკმა განაცხადა, რომ ახალი ნამუშევარი შთაგონებული იყო მეტეორას რეგიონით (საბერძნეთი), ადგილით, სადაც კლდეებში უამრავი მონასტერი აშენდა.[38] Meteora-ში ერთმანეთთან არეულია ნიუ-მეტალი, რეპ-მეტალი, ნოვატორული ეფექტები, სიაკუჰატის და სხვა ინსტრუმენტების გამოყენება.[20] ლინკინ პარკის მეორე ალბომი გამოვიდა 2003 წლის 25 მარტს და უმალვე მსოფლიო აღიარება მოიპოვა[20]. ბრიტანეთის და აშშ-ის ჩარტში მან #1 პოზიცია დაიკავა, ავსტრალიაში – #2.[21]
Meteora დებიუტის კვირაში გაიყიდა 800 000 ასლის ოდენობით და „ბილბორდის“ ჩარტებში იმ დროისთვის აღინიშნა, როგორც ყველაზე გაყიდვადი დისკი.[39] ალბომის ოთხმა სინგლმა, „Somewhere I Belong“, „Breaking the Habit“, „Faint“ და „Numb“ რადიოების მხრიდან მნიშვნელოვანი ყურადღება მიიქცია.[40] 2003 წლის ოქტომბრისთვის Meteora გაყიდული იყო თითქმის სამი მილიონი ასლის ოდენობით.[41] ალბომის წარმატების ფონზე შეიქმნა კიდევ ერთი Projekt Revolution - Mudvayne-ის, Blindside-ის და Xzibit-ის მონაწილეობით[20]. ამასთან, მეტალიკამ ლინკინ პარკი მიიწვია ტურნეში Summer Sanitarium Tour 2003, რომელშიც აგრეთვე მონაწილეობდნენ ლიმპ ბიზკიტი, Mudvayne და Deftones.[42] მოგვიანებით გამოვიდა ალბომი და ვიდეო Live in Texas, რომლებშიც მოხვდა რამდენიმე აუდიო და ვიდეო ჩანაწერი ჯგუფის ტეხასში გამოსვლიდან.[20] 2004 წლის დასაწყისში დაიწყო ტურნე Meteora World Tour. ლინკინ პარკის მხარდამჭერების სახით გამოდიოდნენ Hoobastank, P.O.D., Story of the Year დ Pia.[43]
Meteora-მ ლინკინ პარკს მოუპოვა მრავალი ჯილდო და აღიარება. MTV-ის დაჯილდოებაზე „Somewhere I Belong“-ს მიენიჭა საუკეთესო როკ-ვიდეოს წოდება, ხოლო „Breaking the Habit“-მა მაყურებელთა არჩევანის ჯილდო მიიღო.[44] Radio Music Award-ზე, 2004 წელს, ლინკინ პარკმა მიიღო წლის შემსრულებლის და წლის სიმღერის („Numb“) ჯილდოები.[44] მიუხედავად იმისა, რომ Meteora წარმატებით Hybrid Theory-სგან შორს იყო, აშშ-ში იგი 2003 წელს რიგით მესამე ყველაზე გაყიდვად ალბომად იქცა.[22] 2004 წლის პირველი თვეები ლინკინ პარკმა ტურნეს დაუთმო - როგორც Projekt Revolution-ის, ასევე ცალკე, ევროპული კონცერტების სახით.[22] Warner Bros. Records-თან მათი ურთიერთობა ამ პერიოდში შეირყა, ფინანსური საკითხების გამო.[45] მრავალთვიანი დავის შემდეგ, შეთანხმებას 2005 წლის დეკემბერში მიაღწიეს.
Meteora-ს წარმატების შემდეგ ჯგუფმა რამდენიმე გარე პროექტზეც იმუშავა.[46] ბენინგტონი გამოჩნდა DJ Lethal-ის „State of the Art“-ზე და Dead by Sunrise-ის ნამუშევრებში, ხოლო შინოდამ Depeche Mode-თან ითანამშრომლა.[22] 2004 წელს ჯგუფმა ჯეი-ზისთან ალბომ Collision Course-ის ჩაწერა დაიწყო. მასში ერთმანეთში აღრეულია ორი შემსრულებლის ტექსტები და მელოდიები ჯგუფის წინა ალბომებიდან. დისკი 2004 წლის ნოემბერში გამოიცა. შინოდას გარე პროექტი აგრეთვე იყო Fort Minor. ჯეი-ზის დახმარებით მან გამოსცა სადებიუტო და შემდგომში კრიტიკოსების მიერ აღიარებული ალბომი The Rising Tied.[47][48]
ლინკინ პარკი აგრეთვე მონაწილეობდა საქველმოქმედო ღონისძიებებში, რომელთა შორის აღსანიშნავია 2004 წელს ქარიშხალ ჩარლისგან, ხოლო 2005 წელს - ქარიშხალ კატრინასგან დაზარალებულთა მხარდასაჭერი პროექტები.[22] 2004 წლის მარტში ჯგუფმა 75 000 აშშ დოლარი გადასცა სპეცოპერაციების მონაწილეთა ფონდს.[49] 2004 წელს ინდოეთის ოკეანეში მომხდარი მიწისძვრის შედეგად დაზარალებულებს ლინკინ პარკი დაეხმარა რამდენიმე საქველმოქმედო კონცერტის გამართვით და ფონდის Music for Relief დაარსებით.[50] ყველაზე აღსანიშნავია მათი მონაწილეობა გლობალურ Live 8-ში, რომელიც აფრიკის ქვეყნებისთვის საგარეო ვალების გაუქმებას ითხოვდა.[51] ამ ღონისძიებაზე ჯეი-ზისთან ერთად ლინკინ პარკი ფილადელფიაში გამოვიდა.[51] რეპერთან კიდევ ერთი გამოსვლა შედგა გრემის 2006 წლის დაჯილდოებაზე, სადაც ერთად შეასრულეს „Numb/Encore“ და მოგვიანებით მიიღეს საუკეთესო რეპი /ვოკალური თანამშრომლობის ჯილდო.[52] სცენაზე მათ შეუერთდა პოლ მაკ-კარტნი, რომელმაც გამოსვლას დაურთო „Yesterday“-ს ტექსტი. 2006 წელს ისინი აგრეთვე გამოვიდნენ მეტალიკის მიერ ორგანიზებულ ფესტივალ Summer Sonic-ზე, იაპონიაში.[53]
ლინკინ პარკი ხმისჩამწერ სტუდიას დაუბრუნდა 2006 წელს და დაიწყო ახალ მასალაზე მუშაობა. ალბომის პროდიუსერად რიკ რუბინი აირჩიეს. მიუხედავად დაპირებისა, რომ დისკი 2006 წელს გამოიცემოდა, ჩანაფიქრი 2007 წლამდე გადაიდო.[6] 2006 წლის აგვისტოსთვის, როდესაც შინოდამ ახსენა, რომ ალბომი ნახევრად დასრულებული იყო, კოლექტივმა უკვე 30-50 სიმღერა ჩაიწერა.[54] ბენინგტონმა მოგვიანებით დაამატა, რომ მომავალი ნამუშევარი წინა ალბომების მეტალ-ჟღერადობისგან სხვა მიმართულებით გადადგმული ნაბიჯი იქნებოდა.[55] Warner Bros. Records-მა ალბომის Minutes to Midnight გამოცემა დაგეგმა 2007 წლის 15 მაისისთვის.[56] 14 თვიანი მუშაობის შემდეგ გადაწყდა 17 სიმღერიდან ხუთის ამოღება. თავად დისკის სახელწოდება, „განკითხვის დღის საათით“ შთაგონებული, უკვე წარმოდგენას ქმნიდა ლინკინ პარკის ახალი სიმღერების თემებზე.[57] Minutes to Midnight გამოცემის პირველ კვირაში 625 000 ასლის ოდენობით გაიყიდა და უკანასკნელ წლებში სადებიუტო კვირების სტატისტიკაში ყველაზე წარმატებული ალბომი იყო. მან აგრეთვე „ბილბორდის“ პირველი პოზიციები დაიკავა.
ალბომის პირველი სინგლი, „What I've Done“ 2 აპრილს გამოვიდა, ვიდეოს პრემიერა კი იმავე კვირაში MTV-ზე Fuse-ზე გაიმართა.[58] მსმენელებმა სიმღერა მოიწონეს და წარმატებამ „ბილბორდის“ ჩარტებში Modern Rock Tracks და Mainstream Rock Tracks მისი უმაღლესი შეფასება უზრუნველყო.[59] ამასთან, ნომერი მოხვდა 2007 წლის მოქმედებით ფილმში „ტრანსფორმერები“. ამავე ფილმში შეტანილი Styles of Beyond-ის სიმღერის „Second to None“ ჩაწერაში შინოდა მონაწილეობდა. წლის ბოლოს ამერიკული მუსიკის დაჯილდოებაზე ლინკინ პარკმა მიიღო „საყვარელი ალტერნატიული შემსრულებლის“ წოდება.[60] წარმატება იქონიეს ალბომის სხვა სინგლებმაც, „Bleed It Out“, „Shadow of the Day“, „Given Up“ და „Leave Out All the Rest“, რომლებიც 2007-2008 წლებში გამოიცა. ლინკინ პარკი აგრეთვე გამოჩნდა ბასტა რაიმზის „We Made It“-ში, რომელიც 2008 წლის 29 აპრილს გამოვიდა.
ტურნეს Minutes to Midnight World Tour ფარგლებში ლინკინ პარკმა Projekt Revolution-ის მორიგი შემადგენლობა ჩამოაყალიბა - My Chemical Romance-ის, Taking Back Sunday-ის, HIM-ის, პლასიბოს და სხვების მონაწილეობით. ევროპაში, აზიაში და ავსტრალიაში უამრავი კონცერტი გაიმართა, რასაც აგრეთვე დაერთო 2007 წლის 7 ივლისს Live Earth-ზე იაპონიაში[61], ინგლისში, დონინგტონში Download Festival-ზე და ტორონტოში Edgefest-ზე გამოსვლები. Projekt Revolution-ის შემდეგ აგრეთვე გაიმართა კონცერტები ნოტინგემში, შეფილდში და მანჩესტერში. ტურნე დასრულდა ლონდონის The O2 Arena-ზე კონცერტით. მოგვიანებით ბენინგტონმა ახსენა, რომ ჯგუფი აპირებდა Minutes to Midnight-ის შემდგომ დისკზე მუშაობას.[62] თუმცა, აგრეთვე ცნობილი გახდა, რომ ლინკინ პარკი აშშ-ში ტურნეს გეგმავდა, რათა შთაგონება მიეღო.[62] მეხუთე Projekt Revolution დაიწყო 2008 წელს და, ყველაფერთან ერთად, ეწვია გერმანიას, სამი კონცერტით და ბრიტანეთსაც. აშშ-ში ანალოგიური ტურნე გაიმართა, კრის კორნელის, The Bravery-ს, Ashes Divide-ის, Street Drum Corps-ის და სხვების მონაწილეობით. ტურნე დასრულდა ტეხასში გამართული კონცერტით. შინოდამ გამოაცხადა, რომ გამოიცემოდა CD/DVD Road to Revolution: Live at Milton Keynes, Projekt Revolution-ის ბაკინგემშირში, მილტონ კინზში 2008 წლის 29 ივნისს გამართული კონცერტის ჩანაწერით. ალბომი ოფიციალურად გამოვიდა 2008 წლის 24 ნოემბერს.[63]
2009 წლის მაისში ლინკინ პარკმა გამოაცხადა, რომ მუშაობდა მეოთხე ალბომზე, რომელსაც 2010 წელს გამოსცემდა. შინოდამ IGN-ს განუცხადა, რომ ახალი ალბომი რამდენიმე ჟანრის გადაკვეთა იქნებოდა, თუმცა Minutes to Midnight-ის სტილს დაიცავდა.[64] აგრეთვე აღინიშნა, რომ დისკი უფრო ექსპერიმენტული და, „იმედია, უფრო დახვეწილი“ იქნებოდა.[65] ბენინგტონმა აგრეთვე ხაზი გაუსვა, რომ რიკ რუბინი ამ დისკის პროდიუსერიც იქნებოდა. მოგვიანებით გამოაცხადეს ალბომის სახელწოდება A Thousand Suns.[66] ამავე დროს, მასზე მუშაობისას, კოლექტივი მუშაობდა ჰანს ციმერთან, ფილმის „ტრანსფორმერები: დაცემულების შურისძიება“ საუნდტრეკზე.[67] საუნდტრეკიდან აგრეთვე გამოვიდა სინგლი „New Divide“. ჯო ჰენმა შექმნა მისი თანხმლები ვიდეოც, რომელშიც მოხვდა კადრები თავად ფილმიდან.[68] 22 ივნისს ლინკინ პარკი უესტვუდ-ვილიჯში, ფილმის პრემიერის შემდეგ, გამოვიდა ხანმოკლე პროგრამით.[69] საუნდტრეკზე მუშაობის დასრულების შემდეგ ისინი დაბრუნდნენ სტუდიაში, რათა დაესრულებინათ საკუთარი დისკი.[70]
26 აპრილს iPhone-ისთვის, iPod Touch-ისთვის და iPad-ისთვის გამოვიდა თამაში 8-Bit Rebellion!, რომლის პერსონაჟები თავად ჯგუფის წევრები იყვნენ, ხოლო თანმხლებ მუსიკალურ ნაწილს წარმოადგენდა ახალი სიმღერა „Blackbirds“, რომელიც თამაშში გამარჯვების შემთხვევაში ჟღერდა. მოგვიანებით სიმღერა აგრეთვე გამოვიდა A Thousand Suns-ის iTunes-ის გამოცემასთან ერთად.[71]
ალბომი, საბოლოოდ, 14 სექტემბერს გამოვიდა. მისი პირველი სინგლი „The Catalyst“ 2 აგვისტოს გამოიცა. ალბომი მხარდაჭერილი იქნა საკონცერტო ტურნეთი, რომელიც ლოს-ანჯელესში 7 სექტემბერს დაიწყო.[72][73][74] ჩანაწერის სარეკლამო კამპანიის ფარგლებში ჯგუფის MySpace-გვერდზე 8 სექტემბერს განთავსდა სიმღერები „Waiting for the End“ და „Blackout“.[75][76][77][78] ამასთან, იგივე გვერდზე გამოქვეყნდა დოკუმენტური ფილმი ალბომის შექმნის შესახებ, Meeting of A Thousand Suns. 31 აგვისტოს ცნობილი გახდა, რომ „Waiting for the End“ პირველად შესრულდებოდა MTV-ის მუსიკალური ვიდეოების 2010 წლის დაჯილდოებაზე, 12 სექტემბერს.[79] სიმღერა ჯგუფმა დაუკრა გრიფითის ობსერვატორიაში, რომელსაც ხშირად იყენებენ ჰოლივუდურ ფილმებში.[80][81][82] „Waiting for the End“ გამოვიდა ალბომის მეორე სინგლის სახით.
„ბილბორდის“ Social 50-ში, ჩარტში, რომელიც აღრიცხავს სოციალურ ქსელებში აქტიურ შემსრულებლებს, ჯგუფმა მერვე ადგილი დაიკავა.[83] სხვა ჩარტებში ლინკინ პარკს ერგო 92-ე (საუკეთესო შემსრულებლების),[84] და 53-ე (A Thousand Suns წლის საბოლოო ჩარტში)[85], #7 2010 წლის საბოლოო ჩარტში და #40 („The Catalyst“) წლის სიმღერების საბოლოო ჩარტში. [86]
2011 წელს ჯგუფი ნომინირებული იქნა „ბილბორდის“ ჯილდოზე, საუკეთესო დუეტის ან ჯგუფის, საუკეთესო როკ-ალბომის, საუკეთესო როკ-შემსრულებლის, საუკეთესო ალტერნატიული შემსრულებლის, საუკეთესო ალტერნატიული სიმღერის („Waiting for the End“) და საუკეთესო ალტერნატიული ალბომის კატეგორიებში, მაგრამ არც ერთში გაუმარჯვია.[87] ამასთან, 2011 წელს კოლექტივი „ბილბორდის“ სხვადასხვა წლის შემაჯამებელ ჩარტში კვლავ წარმატებული იყო. ეს იყო #39 (საუკეთესო შემსრულებლების ჩარტი),[88] #84 („ბილბორდის“ 200 შემსრულებელი),[89] #11 (Social 50),[90] #6 (საუკეთესო როკ-შემსრულებლები),[91] #9 (საუკეთესო როკ-სიმღერების შემსრულებლები),[92] #16 (როკ-ალბომები),[93] #4 (მძიმე-როკ ალბომები) [94] და #7 (ალტერნატიული სიმღერები).[95]
2011 წლის ივლისში ბენინგტონმა Rolling Stone-ს უამბო, რომ ლინკინ პარკი აპირებდა ახალი ალბომის ყოველ 18 თვეში გამოცემას და მისთვის უცნაური იქნებოდა, თუ შემდეგი დისკი არ გამოვიდოდა 2012 წელს. მოგვიანებით, 2011 წლის კიდევ ერთ ინტერვიუში ახსენა, რომ ჯგუფი ახალი მასალის ჩაწერას იწყებდა - „ჯერჯერობით მხოლოდ დავიწყეთ. გვსურს, შევინარჩუნოთ შემოქმედებითი ენერგია ... მოგვწონს ეს მიმართულება.“[96] მოგვიანებით, 28 მარტს, შინოდამ დაადასტურდა, რომ „Burn It Down“-ისთვის ოფიციალურ ვიდეოს იღებდნენ.[97][98] რეჟისორი იყო ჯონ ჰენი.[99] შინოდა Co.Create-თან ალბომის გარეკანზე საუბრობდა და ამბობდა: „მსმენელებს გააოცებს...რიგითი ადამიანი ვერ ჩაუვლის ისე, რომ არ შეხედავს. მესმის, რომ ეს სრულიად ახალია, ანუ, არა მხოლოდ ნახატია, მაგრამ ის, თუ როგორ შექმნეს ეს ნახატი, სრულიად ახალია. ასე, რომ ეს იქნება.“[100]
2012 წლის 15 აპრილს შინოდამ გამოაცხადა, რომ მომავალი ალბომის სახელწოდება იქნებოდა Living Things.[101] მანვე თქვა, რომ სახელწოდება იმიტომ აირჩიეს, რომ დისკი უფრო მეტად ხალხზე, პირად ურთიერთობაზეა და უფრო პირადულია, ვიდრე მათი სხვა ალბომები.[102] ალბომის პრომოკამპანიის ფარგლებში ლინკინ პარკი 2012 წელს Honda Civic Tour-ში გამოვიდა, Incubus-თან, როგორც ტურნეს ერთ-ერთ წამყვან შემსრულებელთან ერთად. „ბილბორდის“ 2012 წლის დაჯილდოებაზე მათ დაუკრეს „Burn It Down“. 25 მაისს გამოვიდა ამ სიმღერის მუსიკალური ვიდეო, ხოლო BBC Radio 1-ზე გაიმართა „Lies Greed Misery“-ის პრემიერა. „Powerless“-ის, ალბომის მეთორმეტე და უკანასკნელი სიმღერის მოსმენა შესაძლებელი გახდა ფილმის „აბრაამ ლინკოლნი: ვამპირებზე მონადირე“ ტიტრების სცენის დროს.[103]
Living Things გამოცემის პირველ კვირაში გაიყიდა 223 000 ასლის სახით და აშშ-ის ალბომების ჩარტში #1 პოზიცია დაიკავა.[104] სინგლი „Castle of Glass“ ნომინირებული იყო „ვიდეო თამაშის საუკეთესო სიმღერის“ კატეგორიაში, Spike Video Game Awards-ზე. ჯგუფი აგრეთვე გამოვიდა ამ დაჯილდოებაზე 7 დეკემბერს, მაგრამ ჯილდო მიიღო ბეკის „Cities“-მა.[105] ლინკინ პარკი ამასთან გამოჩნდა ავსტრალიურ ფესტივალ Soundwave-ზე, სადაც აგრეთვე გამოვიდნენ მეტალიკა, Paramore, სლეიერი და Sum 41.[106] 2013 წლის 10 აგვისტოს ჯგუფმა სტივ აოკისთან ერთად ჩაწერა „A Light That Never Comes“, ლინკინ პარკის ონლაინ-თავსატეხი თამაშისთვის LP Recharge, რომელიც Facebook-ზე და ცალკე საიტზე 2013 წლის 12 სექტემბერს გამოჩნდა. თამაშის გამოცემის დღეს ლინკინ პარკმა Facebook-ზე განმარტა, რომ სიმღერა, რომელიც ალბომის პრომოკამპანიისას გამოიყენებოდა, შევიდოდა ახალ რემიქსულ ალბომში Recharged, რომელიც 2013 წლის 29 აგვისტოს გამოვიდოდა. ისევე, როგორც Reanimation, ისიც შეიცავს, ამჯერად Living Things-ის ათი სიმღერის რემიქსს, რომელთა ავტორები არიან რიუ ჯგუფიდან of Styles of Beyond, Pusha T, Datsik, KillSonik, Bun B, Money Mark და რიკ რუბინი.[107][108] ჯგუფმა აგრეთვე იმუშავა ჯო შენის ფილმ „მოლის“ საუნდტრეკზე.[109]
ინტერვიუში Fuse-თან შინოდამ დაადასტურა, რომ ლინკინ პარკმა დაიწყო მეექვსე ალბომის 2013 წლის მაისში ჩაწერა.[110] პირველი სინგლი ამ დისკიდან, „Guilty All the Same“ 2014 წლის 6 მარტს Shazam-ზე განთავსდა.[111] მეორე დღეს იგი Warner Bros. Records-მა გამოსცა. სინგლი „ბილბორდის“ Rock Airplay-ს ჩარტში გამოსვლისთანავე 28-ე ადგილზე მოხვდა, მოგვიანებით კი მეინსტრიმული როკის ჩარტში #1 გახდა.[112][113] სინგლის გამოსვლის შემდეგ ჯგუფმა გამოაცხადა, რომ ალბომის სახელწოდება იქნებოდა The Hunting Party. ჩანაწერის პროდიუსერები იყვნენ შინოდა და დელსონი, რომლებმაც სცადეს Hybrid Theory-ს და ჯგუფის ადრეული მასალის ჟღერადობასთან დაბრუნება.[114] შინოდამ განაცხადა, რომ ალბომი „როკ-ჩანაწერის 90-იანების სტილშია“ და დაამატა: „როკ-ალბომია. ხმაურიანია და როკია, მაგრამ არა ისეთი, როგორიც ადრე მოგისმენიათ, რაც ნიშნავს იმას, უფრო 90-იანების ჰარდკორ-პანკ-თრეშია.“[115] დისკის ჩაწერაში მონაწილეობდნენ რეპერი რაკიმი, პეიჯ ჰამილტონი (Helmet), ტომ მორელო (Rage Against the Machine) და დარონ მალაქიანი (System of a Down).[116][117] The Hunting Party გამოიცა რამდენიმე ქვეყანაში 2014 წლის 13 ივნისს, ხოლო აშშ-ში – 17 ივნისს.[118]
ჯგუფი 2014 წლის 14 ივნისს გამოვიდა Download Festival-ზე, სადაც მთლიანი სახით შეასრულა სადებიუტო ალბომი Hybrid Theory.[19][119][120] იმავე წელს იგი გამოვიდა Rock am Ring-ის და Rock im Park-ის ღონისძიებებზე (მათ გარდა, გამოდიოდნენ მეტალიკა, Kings of Leon და Iron Maiden).[121][122] უკანასკნელის სოლოკონცერტზე მხარდამჭერი ჯგუფის სახით ლინკინ პარკი Greenfield Festival-ზე, ივლისში გამოჩნდა.[123] 22 ივნისს ისინი მოულოდნელად გამოვიდნენ Vans Warped Tour-ის შემადგენლობაში, ჯგუფების Issues, The Devil Wears Prada, A Day To Remember, Yellowcard, Breathe Carolina, Finch და რეპერ Machine Gun Kelly-ს თანამონაწილეობით.[124] 2015 წლის იანვარში დაიწყო The Hunting Party-ს მხარდასაჭერი ტურნე, 17 კონცერტით, რომლებსაც უნდა მოეცვა აშშ და კანადა. თუმცა, იგი შეწყდა, როდესაც ბენინგტონმა დაიზიანა მუხლი.[125][126] 9 მაისს ლინკინ პარკი, მეტალიკის მხარდამჭერის სახით გამოვიდა პირველი Rock in Rio-ს ფარგლებში.[127]
2014 წლის 9 ნოემბერს MTV ევროპის მუსიკალური დაჯილდოების ფარგლებში ლინკინ პარკი დასახელდა „საუკეთესო როკ-ჯგუფად“.[128] იგივე, ისევე, როგორც საუკეთესო საკონცერტო შემსრულებლის წოდება ჯგუფს მიენიჭა Loudwire-ის მუსიკალურ დაჯილდოებაზე.[129] Revolver-ის 2014 წლის საუკეთესო ალბომების სიაში The Hunting Party-ს მეოთხე ადგილი ეკავა.[130] ინტერვიუში AltWire-თან, 4 მაისს, შინოდამ ისაუბრა The Hunting Party-ზე და ლინკინ პარკის მომავალზე: „მოხარული ვარ The Hunting Party-ზე ასეთი რეაქციით და ვფიქრობ, მზად ვართ, შემდეგ, 2016 წლისთვის დაგეგმილ ალბომზე სხვა მიმართულებით ვიმოძრაოთ“.[131]
2015 წელს გამოცემულ სტივ აოკის ალბომზე Neon Future II ჯგუფმა დაუკრა სიმღერაში „Darker Than Blood“.[132] ამ უკანასკნელის მცირე მაგალითმა გაიჟღერა აოკის 2015 წლის 28 თებერვლის კონცერტზე, ჩიკაგოში.[133] სიმღერის პრემიერა გაიმართა Twitch.tv-ზე, 14 აპრილს.[134]
2015 წელს ლინკინ პარკი აგრეთვე გამოვიდა Blizzard-ის ვიდეო თამაშების კონვენცია Blizzcon-ის ფინალურ ცერემონიაზე.[135]
ახალ მასალაზე მუშაობა ჯგუფმა 2015 წლის ნოემბერში დაიწყო.[136] ჩესტერ ბენინგტონი ახალი ალბომის მუსიკალურ მიმართულებაზე ასე საუბრობდა: „მრავალი შესანიშნავი მასალა გვაქვს, რომელიც, იმედია, დააფიქრებს ჩვენს მოყვარულებს და, ამავე დროს, მოეწონება ისევე, როგორც ჩვენ.“[137] 2017 წლის თებერვალში ლინკინ პარკმა სოციალურ გვერდებზე პრომოვიდეოები გაავრცელა, რომლებშიც შინოდა და ბენინგტონი სიმღერებს იწერდნენ.[138] მაიკმა განაცხადა, რომ ალბომის შექმნისას კოლექტივი ახალ პროცესს მიჰყვებოდა. ბრედ დელსონი - „იმდენი ალბომი ჩავწერეთ, რომ ნამდვილად ვიცით, როგორ ჩავწეროთ და ამჯერად მარტივად გამოძრომას არ ვაპირებთ.“[139]
ალბომის პირველი სინგლი იყო „Heavy“, მომღერალ კიიარასთან ერთად ჩაწერილი (პირველი შემთხვევა, როდესაც ჯგუფმა გამოიყენა ქალი ვოკალისტი სტუდიური სიმღერის ორიგინალურ ვერსიაში). სიმღერის ტექსტის თანაავტორები არიან ჯულია მაიკლზი და ჯასტინ ტრენტერი. [140] სინგლის ჩამოსატვირთი ვერსია გამოვიდა 16 თებერვალს.[141][142] ისევე, როგორც წარსულში, ჯგუფი ამჯერადაც ინტერნეტში იდუმალ გზავნილებს ავრცელებდა. ალბომის გარეკანიც სოციალურ მედიაში გავრცელებული თავსატეხებით იყო დაშიფრული. მასზე გამოსახულია ექვსი ბიჭუნა, რომელიც ოკეანესთან თამაშობს.[143] One More Light, ლინკინ პარკის მეშვიდე ალბომი, გამოვიდა 2017 წლის მაისში.[10]
2017 წლის 20 ივლისს ბენინგტონმა სიცოცხლე თვითმკვლელობით დაასრულა.[144] შინოდამ ეს დაადასტურა Twitter-ზე: „შოკირებული და გულგატეხილი ვარ, მაგრამ სიმათლეა. ოფიციალური განცხადება მოგვიანებით გამოქვეყნდება, როდესაც მომზადდება.“[145] იმავე დღეს, ბენინგტონის თვითმკვლელობამდე რამდენიმე საათით ადრე გამოვიდა მუსიკალური ვიდეო სიმღერისთვის „Talking to Myself“.[146] ერთი დღის შემდეგ ჯგუფმა გააუქმა ჩრდილოეთ ამერიკაში ტურნეს One More Light ფარგლებში დაგეგმილი ყველა გამოსვლა.[147] 24 ივლისს, ბენინგტონისთვის მიძღვნის სახით, ლინკინ პარკის საიტზე გამოქვეყნდა ოფიციალური განცხადება.[148]
22 აგვისტოს ლინკინ პარკმა გამოაცხადა, რომ ლოს-ანჯელესში ბენინგტონის ხსოვნისადმი კონცერტს გამართავდა. ჯგუფმა მადლობა გადაუხადა მსმენელებს მხარდაჭერისთვის: „ხუთივე მადლობელი ვართ მხარდაჭერისთვის. ჩვენ გამოვკეთდებით და ლინკინ პარკის მომავალზე ვიზრუნებთ.“[149] მოგვიანებით ცნობილი გახდა, რომ კონცერტი ჰოლივუდ-ბოულში, 27 ოქტომბერს გაიმართებოდა. ეს უნდა ყოფილიყო კოლექტივის პირველი საკონცერტო გამოსვლა ბენინგტონის გარეშე.[150][151] მასში მონაწილეობაზე დათანხმდნენ Blink-182 და ჯგუფების System of a Down, Korn, Avenged Sevenfold, Bring Me the Horizon, Yellowcard წევრები, ისევე, როგორც მომღერალი კიიარა.[152] ღონისძიების ეწოდა Linkin Park and Friends - Celebrate Life In Honor of Chester Bennington. კონცერტი სამ საათზე მეტი ხანგრძლივობის იყო და YouTube-ზე გადაიცემოდა.[153]
2017 წლის ნოემბერში ცნობილი გახდა, რომ ჯგუფი 15 დეკემბერს გამოუშვებს საკონცერტო ალბომს One More Light: Live, რომელშიც შეტანილი იქნება ბენინგტონთან ერთად ჩატარებული უკანასკნელი ტურნეს ჩანაწერები.[154]
2010 წლის 19 იანვარს ლინკინ პარკმა გამოსცა სიმღერა „Not Alone“, რომელიც შევიდა ჰაიტის მიწისძვრისგან დაზარალებულთა მხარდამჭერ საქველმოქმედო ალბომში Download to Donate for Haiti. 2010 წლის 10 თებერვალს სიმღერის ოფიციალური ვიდეო ჯგუფის საიტზე განთავსდა. 2011 წლის 21 ოქტომბერს გამოვიდა თავად სინგლი.
11 იანვარს გაშვებული იქნა Download to Donate for Haiti-ს განახლებული ვარიანტი Download to Donate for Haiti V2.0, უფრო მეტი ჩამოსატვირთი სიმღერით. მათ შორის აღსანიშნავია კიტონ ჰაშიმოტოს მიერ კონკურსის „Linkin Park featuring YOU“ ფარგლებში შექმნილი „The Catalyst“-ის რემიქსი.[155]
შინოდას მიერ შეიქმნა ორი მაისურის დიზაინი. ამ მაისურების გაყიდვების შემოსავალი ტოჰოკუს 2011 წლის მიწისძვრისგან და ცუნამისგან დაზარალებულთა დასახმარებლად ირიცხება.[156][157] Music for Relief-მა გამოსცა Download to Donate: Tsunami Relief Japan, კიდევ ერთი კომპილაცია, რომლის გაყიდვების შემოსავალი Save the Children-ს გადაეცემა.[158] კოლექტივის სიმღერა „Issho Ni“ 2011 წლის 22 მარტს გამოვიდა, კამპანიის Download to Donate: Tsunami Relief Japan ფარგლებში. 2013 წელს, ტაიფუნ ჰაიანის მოვლენების შემდეგ ჯგუფმა დაუკრა Club Nokia-ში, ლოს-ანჯელესში, „Music for Relief: Concert for the Philippines“-ის ფარგლებში და მრავალი მსხვერპლის დასახმარებელი თანხები შეაგროვა. კონცერტი 15 თებერვალს AXS TV-ის ეთერში გავიდა. მასში აგრეთვე მონაწილეობდნენ The Offspring, Bad Religion, Heart და The Filharmonic.[159][160]
ლინკინ პარკის მუსიკაში გაერთიანებულია როკ-მუსიკის, ჰიპ-ჰოპის და ელექტრონიკის ელემენტები. AllMusic მათ მიაკუთვნებს ალტერნატიული მეტალის და რეპ-როკის ჟანრებს.[161] უკანასკნელ ვერსიას აგრეთვე ემხრობა About.com.[162] მიუხედავად იმისა, რომ მათ აგრეთვე ნიუ-მეტალის მიმართულებას მიაკუთვნებენ,[163][164] ჯგუფი თავს ასეთი მიმდინარეობის ნაწილად არ თვლის.[165] MusicMight-ზე გამოქვეყნებულ ჯგუფის ბიოგრაფიაში მითითებულია ალტერნატიული როკი, ნიუ-მეტალი და რეპ-მეტალი.[22] WatchMojo.com-ზე მითითებულია ალტერნატიული როკი, ელექტრონული როკი და ინდუსტრიული როკი.[166] „ბილბორდი“ მათ ალტერნატიულ მეტალ და ელექტრონულ როკ ჯგუფად თვლის.[167]
როგორც Hybrid Theory, ასევე Meteora შეიცავენ ალტერნატიული მეტალის,[5][168] ნიუ-მეტალის,[169][170][171] და რეპ-როკის[170][172] ელემენტებს, ჰიპ-ჰოპის, ალტერნატიული როკის[173] და ელექტრონიკის დამატებით, მუსიკალური ინსტრუმენტების დაპროგრამების და სინთეზატორების გამოყენებით. უილიამ რულმენი, AllMusic-იდან, ყოველივე ამას უწოდებს „დაგვიანებულს, უკვე გადაჭარბებით დამუშავებულ სტილში“.[174], ხოლო Rolling Stone-ის აზრით, სიმღერა „Breaking the Habit“ „სარისკო, მშვენიერი ხელოვნებაა“.[175]
ალბომში Minutes to Midnight ჯგუფმა ჩაატარა ექსპერიმენტები უკვე არსებულ ჟღერადობასთან და შთაგონება მიიღო უფრო მეტი ჟანრიდან და სტილიდან. ამ განვითარებას Los Angeles Times ადარებს ეტაპს U2-ს შემოქმედებაში.[7] აღინიშნება, რომ მასში მხოლოდ ორი სიმღერა შეიცავს რეპ-ვოკალს, ხოლო დანარჩენები შეიძლება ჩაითვალოს ალტერნატიულ როკად.[176][177] NME-ს დენ სილვერი აკრიტიკებს ლინკინ პარკის მიდგომას, უწოდებს რა „ჟღერადობას ჯგუფის, რომელიც წარუმატებლად ცდილობს, შექმნას ახალი ინდივიდუალურობა“. აქ იგი უთითებს სიმღერაზე „Hands Held High“, ტერორისტული თავდასხმების და ომის თემით, რასაც აღწერს, როგორც „ყველაზე სასაცილო რამეს, რასაც ამ წელს მოისმენთ“.[178]
ჩესტერ ბენინგტონის და მაიკ შინოდას ვოკალური გადაძახილები ლინკინ პარკის მუსიკის მნიშვნელოვან ნაწილს წარმოადგენს. ბენინგტონი აქ წამყვანი ვოკალისტია, ხოლო შინოდა რეპს ასრულებს. მესამე ალბომზე Minutes to Midnight შინოდა წამყვან ვოკალს ასრულებს სიმღერებში „In Between“, „Hands Held High“ და B-მხარეზე „No Roads Left“. მეოთხე ალბომის A Thousand Suns მრავალ სიმღერაში, მაგალითად – სინგლებში „The Catalyst“, „Waiting for the End“, „Burning in the Skies“ და „Iridescent“, მღერიან შინოდაც და ბენინგტონიც. ამავე ალბომის სიმღერების უმეტესობაში აღსანიშნავია ჯგუფის მიერ ელექტრონული დასარტყმელი საკრავების გამოყენება. ეს ალბომი ლინკინ პარკის კარიერაში გარდატეხვად ითვლება, ელექტრონიკაზე დიდი აქცენტის გაკეთებით.[179][180] ჯეიმზ მონტგომერი, MTV-დან, ალბომს ადარებს Radiohead-ის Kid A-ს[181], ხოლო ჯორდი კასკო, Review, Rinse, Repeat-იდან, უთითებს როგორც Kid A-ს, ასევე პინკ ფლოიდის The Dark Side of the Moon-ს.[182] შინოდა ამბობს, რომ მასზე და ჯგუფის სხვა წევრებზე გავლენა მოახდინეს Chuck D-მ და Public Enemy-მ. იგი განმარტავს ამ შეხედულებას: „Public Enemy ალბომებზე ყოველთვის სამგანზომილებიანი იყო, იმიტომ, რომ, მიუხედავად პოლიტიკურობისა, იქ იყო ბევრი სხვა რამეც. მაშინ ვფიქრობდი, როგორ შემექმნა ჩვენი სამგანზომილებიანი ალბომი, რა თქმა უნდა, მათი იმიტირების გარეშე და მეჩვენებინა, შემოქმედებითად რა სტადიაში ვიმყოფებოდით.“[183] A Thousand Suns-ის ერთ-ერთი პოლიტიკური თემაა სხვადასხვა ამერიკელი პოლიტიკოსის ფრაზების ჩანაწერების აქა-იქ გამოყენება.[184]
ჯგუფის მეხუთე ალბომი Living Things ასევე გაჯერებულია ელექტრონიკით, მაგრამ შეიცავს სხვა ჟანრების გავლენასაც, რაც, საბოლოო ჯამში, ქმნის მძიმე ჟღერადობას.[185][186] წინა სამ ალბომთან შედარებით უფრო მძიმე ჟღერადობას ლინკინ პარკი დაუბრუნდა The Hunting Party, რომელიც არის ალტერნატიული მეტალის და მძიმე როკის შერწყმა.[187][188] მეშვიდე ალბომი One More Light არის პოპის,[189][190] პოპ-როკის[191][192] და ელექტროპოპის ჟანრის.[193]
ლინკინ პარკის მუსიკაზე ზოგადი გავლენა იქონიეს Nine Inch Nails-მა, Deftones-მა, The Roots-მა და Aphex Twin-მა.[194]
მსოფლიო მასშტაბით ჯგუფს გაყიდული აქვს 70 მილიონი ალბომი.[17][195] მისი პირველი სტუდიური დისკი Hybrid Theory აშშ-ში (10 მილიონი გაყიდული ასლით) და მსოფლიოში (27 მილიონი გაყიდული ასლით) ბესტსელერია.[196] „ბილბორდის“ გამოთვლებით, ლინკინ პარკის შემოსავალმა 2011 წლის მაისიდან 2012 წლის მაისამდე 5 მილიონი აშშ დოლარი შეადგინა, რამაც კოლექტივს მსოფლიოს ყველაზე შემოსავლიანი შემსრულებლების სიაში #40 პოზიცია მოუპოვა.[197] ჯგუფის 11 სინგლი „ბილბორდის“ ალტერნატიული სიმღერების ჩარტში #1 პოზიციას იკავებდა, რაც ამ ჩარტის ისტორიაში რიგით მეორე შემთხვევა იყო.[198]
2003 წელს MTV2-მა ლინკინ პარკი მუსიკალური ვიდეოების ეპოქის რიგით მეექვსე უდიდეს ჯგუფად დაასახელა და ათასწლეულის რიგით მესამედ.[12] „ბილბორდმა“ ჯგუფი ათწლეულის საუკეთესო შემსრულებლებში მე-19 პოზიცია მიანიჭა.[13] VH1-ის Bracket Madness-ის გამოკითხვაში პინკ ფლოიდმა 2000-იანი წლების უდიდესი შემსრულებლის სტატუსი მოიპოვა.[14] 2014 წელს Kerrang!-მა იგი „ამჟამად მსოფლიოს უდიდეს როკ-ჯგუფად“ დაასახელა.[15][16] 2015 წელს ამავე გამოცემაში „In the End“ და „Final Masquerade“ იკავებდნენ სიის Rock 100 ორ უმაღლეს პოზიციას.[199]
ლინკინ პარკი პირველი როკ-ჯგუფია, რომლის ვიდეოების ნახვების რაოდენობამ YouTube-ზე მილიარდს გადააჭარბა.[200] ჯგუფის გვერდი Facebook-ზე სტატისტიკით არის რიგით მეთხუთმეთე ყველაზე მოწონებულთა შორის, მუსიკალურ შემსრულებლებში - მეათე, ხოლო თავად ლინკინ პარკი ჯგუფებს შორის ყველაზე მოწონებულია The Black Eyed Peas-ის შემდეგ.[201] Spotify-ზე „Numb“ არის მესამე, ხოლო „In The End“ – მეექვსე „უკვდავ სიმღერებში“, ამით კი ლინკინ პარკი სერვისის საუკეთესო ათეულის ერთადერთი შემსრულებელია, რომელსაც ორი „უკვდავი სიმღერა“ აქვს.[202]
ალბომი Hybrid Theory ნახსენებია წიგნში „1001 ალბომი, რომელიც უნდა მოისმინო, სანამ ცოცხლობ“. იგი აგრეთვე შეტანილია „ბილბორდის“ „ათწლეულის ცხელ 200-ეულში“.[203] ამასთან, ალბომი მოხვდა Record Collector-ის 2001 წლის საუკეთესო ალბომების, Rock Sound-ის „თაობის 150 საუკეთესო ალბომის“ და Kerrang!-ის „50-იანების საუკეთესო როკ-ალბომების“ სიებში. ალბომი Meteora „ბილბორდის“ მიერ შეტანილია „ათწლეულის 200 საუკეთესო ალბომის“ სიაში, #36 პოზიციაზე. მსოფლიოში მისი 20 მილიონი ასლი გაიყიდა. დამატებითი EP, Collision Course, ჩაწერილი ჯეი-ზისთან, იქცა რიგით მეორე EP-დ, რომელიც „ბილბორდის“ 200-ეულის სათავეებში მოხვდა, გაიყიდა რა 300 000 ასლის ოდენობით ერთი კვირის განმავლობაში - მსგავს შედეგს მიაღწია Alice in Chains-ის 1994 წლის Jar of Flies-მა. Minutes to Midnight აშშ-ში, 2007 წელს, იყო რეკორდსმენი სადებიუტო კვირაში გაყიდვების მხრივ - 625 000 გაყიდული ასლით.[204] კანადაში ალბომი პირველივე კვირაში 50 000 ასლის სახით გაიყიდა და ალბომების ადგილობრივ ჩარტში გამოსვლისთანავე #1 გახდა. მსოფლიოში იგი გამოცემიდან პირველი ოთხი კვირის განმავლობაში 3.3 მილიონი ასლის სახით გაიყიდა.[205]
The New York Times-ის ჯონ კარამანიკა წერდა, რომ ლინკინ პარკმა 2000-იანების დასაწყისში „მძიმე როკის და ჰიპ-ჰოპის შერწყმა აიყვანა კომერციულ და ესთეტიურ მწვერვალზე“.[206] რამდენიმე როკ და სხვა ჟანრების შემსრულებელმა ლინკინ პარკი შთაგონების წყაროდ დაასახელეს. მათ შორის არიან Of Mice & Men,[207] One Ok Rock,[208] ბიშოპ ნერუ,[209] Misono, ევანესენსი,[210] From Ashes to New,[211][212][213][214] ჯოშ დევინი (One Direction-ის საკონცერტო დრამერი),[215] Bring Me the Horizon,[216] Red, Girl on Fire, Manafest, Silentó,[217] ტონი დუგარდი,[218] 3OH!3,[219] The Prom Kings,[219] ეიჯეი ტრეისი,[220] კიიარა,[221] კევინ რუდოლფი,[219] Blackbear,[222] Tokio Hotel,[219] Stormzy[223] და Emery. პრინცი უილიამი, ამბობდა, რომ ლინკინ პარკი მისთვის Coldplay-სთან ერთად ყველა დროის საყვარელი ჯგუფია.[224]
ამჟამინდელი წევრები
|
ყოფილი წევრები
|
როგორც წამყვანი შემსრულებელი
სხვა შემსრულებლებთან
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.