Las Vegas

Las Vegas er stærsta borg Nevada-fylkis í Bandaríkjunum. Borgin er aðallega þekkt fyrir fjölda spilavíta. Í borginni búa um 645.000 (2018) en ef nærliggjandi svæði eru talin með búa þar um 2,2 milljón manns. Las Vegas er stjórnaraðsetur Clark-sýslunnar. Las Vegas er einn af vinsælustu ferðamannastöðum heims.

Nafnið Las Vegas er oft látið ná yfir önnur svæði Clark-sýslunnar sem umlykja borgina. Þannig er hin 7,25 km langa aðalgata borgarinnar, Las Vegas Boulevard, að mestu utan borgarmarka Las Vegas eða í bænum Paradise.

Fyrir utan spilavítin eru það aðallega hinar mörgu sýningar sem eru einkennandi fyrir borgina. Listamenn sem starfa eða störfuðu í Las Vegas eru m.a. Elvis Presley, Tom Jones, Frank Sinatra og Céline Dion. Þá eru margar brúðkaupskapellur í borginni, sem orsakast af því að lög um hjúskaparstofnun (og hjúskaparslit) eru sérlega einföld.

Borgin er stundum kölluð Sin City vegna mikilla (löglegra) fjárhættuspila, mikils framboðs á áfengum drykkjum allan sólarhringinn, fíkniefna, margvíslegs framboðs á erótískum skemmtunum og lögleiðingu vændis í nærliggjandi sýslu. Stjórnvöld og ferðamálafrömuðir svæðisins styðja aftur á móti nafngiftina The Entertainment Capital of the World (skemmtanahöfuðborg heimsins).

Bein þýðing á nafninu yfir á íslensku úr spænsku væri eiginlega "Túnin" eða engin.

Saga borgarinnar

Fyrsta byggðin á Las Vegas svæðinu komst á fót árið 1854 fyrir tilstuðlan mormónakirkjunnar, en byggðin var yfirgefin þremur árum seinna. Um miðjan 7. áratug 19. aldar byggði bandaríski herinn Fort Baker virkið á þeim stað sem Las Vegas er nú. Vegna vatnslinda sinna varð Las Vegas að mikilvægum áningarstað fyrir vagnlestir og lestir á leið milli Kaliforníu í vestri og New Mexico í austri. 1903 seldi ekkjan Helen Stewart fyrir 55 þúsund dollara stóran hluta af búgarði sínum til járnbrautafyrirtækis, sem aftur á móti seldi sama landið 15. maí 1905 fyrir 265 þúsund dollara til áhættufjárfesta. Borgin Las Vegas telst opinberlega stofnuð þennan dag. Hornsteinar hins hraða vaxtar Las Vegas voru lögleiðing fjárhættuspils 1931 og bygging Hoover stíflan 1931-1935. Mafíuforinginn Bugsy Siegel byrjaði á 5. áratugnum að byggja hótel með innbyggðu spilavíti og setti þar með af stað þróun sem hefur haldist fram til dagsins í dag. Athafnamaðurinn Howard Hughes bolaði mafíunni burt úr borginni milli þess sem hann keypti upp eignir í borginni.

Þekkt hótel og kennileiti

Hótel setja mikinn svip á Las Vegas og eru þau gjarnan samtvinnuð við spilavítin.

Aladdin Hotel
Bellagio
- Hótel Bellagio er aðallega þekkt fyrir Fountains of the Bellagio, stóran gosbrunn sem gýs á hálftíma fresti með meðfylgjandi tónlist. Þá var hótelið aðalvettvangur kvikmyndarinnar Ocean's Eleven.
Caesars Palace
Circus Circus Hotel
Excalibur Hotel
Golden Gate Hotel
Golden Nugget
Luxor
Mandalay Bay
Mirage
MGM Grand Hotel
- MGM Grand Hotel er næststærsta hótel heims.
Monte Carlo Resort
New York New York Hotel
Paris Las Vegas
- Við hótelið Paris Las Vegas stendur mjög nákvæm eftirgerð í hálfri upprunalegri stærð af Eiffelturninum í París.
Stratosphere Las Vegas (Stratosphere Tower)
Treasure Island
Venetian Resort Hotel
Wynn Las Vegas
Hótel Wynn

Þekktir einstaklingar frá Las Vegas

Andre Agassi, tennisspilari
Charisma Carpenter, leikkona
Daveigh Chase, leikkona
Thomas Alexander Dekker, leikari
Veronica Hart, klámmyndaleikkona, leikkona, framleiðandi, handritahöfundur og leikstjóri
Jenna Jameson, klámmyndaleikkona og klámmyndaframleiðandi
Jack Kramer, fyrrv. tennisspilari
Pat Morita, leikari
Ne-Yo, R&B söngvari og lagahöfundur
Panic! At The Disco, rokkhljómsveit
Killers, indie-rokkhljómsveit

Mannfjöldaþróun

Las Vegas Fólksfjöldaþróun Geymt 15 mars 2007 í Wayback Machine
1930	5.165
1940	8.422
1950	24.624
1960	64.405
1970	125.787
1980	164.674
1990	258.295
2000	478.434
2010	583.756

Tenglar

Opinber síða Las Vegas
Ferðamanna- og ráðstefnuyfirvöld í Las Vegas
Upplýsingar um Las Vegas Geymt 11 febrúar 2006 í Wayback Machine