Ռոստիսլավ Պինկավա
ռուս խորհրդային գեղանկարիչ, գրաֆիկ և մանկավարժ From Wikipedia, the free encyclopedia
ռուս խորհրդային գեղանկարիչ, գրաֆիկ և մանկավարժ From Wikipedia, the free encyclopedia
Ռոստիսլավ Բոգուսլավովիչ Պինկավա (ռուս.՝ Ростислав Богуславович Пинкава, նոյեմբերի 28, 1925, Մոսկվա, ԽՍՀՄ), ռուս խորհրդային գեղանկարիչ, գրաֆիկ և մանկավարժ, Ռուսաստանի Դաշնության վաստակավոր նկարիչ (2001)[1], Սանկտ Պետերբուրգի Շտիգլիցի անվան գեղարվեստաարդյունաբերական ակադեմիայի պրոֆեսոր, Սանկտ Պետերբուրգի նկարիչների միության անդամ (մինչև 1992 թվականը՝ ՌԽՖՍՀ նկարիչների միության Լենինգրադի կազմակերպություն)[2]։
Ռոստիսլավ Պինկավա | |
---|---|
Ծնվել է | նոյեմբերի 28, 1925 (98 տարեկան) |
Ծննդավայր | Մոսկվա, ԽՍՀՄ |
Քաղաքացիություն | ԽՍՀՄ և Ռուսաստան |
Կրթություն | Ի. Ե. Ռեպինի անվան գեղանկարչության, քանդակագործության և ճարտարապետության ինստիտուտ |
Մասնագիտություն | նկարիչ |
Ժանր | դիմապատկեր |
Պարգևներ | |
Անդամակցություն | ԽՍՀՄ նկարիչների միություն |
Ռոստիսլավ Պինկավան ծնվել է 1925 թվականի նոյեմբերի 28-ին Մոսկվայում։ 1939 թվականին ընդունվել է Համառուսաստանյան գեղարվեստի ակադեմիային առընթեր գեղարվեստի միջնակարգ դպրոց։ 1942 թվականի փետրվարին դպրոցի աշակերտների հետ միասին Լենինգրադից տարահանվել է Սամարղանդ։
1943 թվականին զորակոչվել է Կարմիր բանակ, մասնակցել մարտերի 3-րդ Ուկրաինական ճակատում։ Կապի գվարդիական առանձին գումարտակի կազմում մասնակցել է Բուլղարիայի, Հարավսլավիայի, Հունգարիայի, Ավստրիայի ազատագրմանը։ Պարգևատրվել է «Մարտական ծառայության», «Գերմանիայի նկատմամբ հաղթանակի համար» մեդալներով[3]։
Զորացրվելուց հետո 1950 թվականին վերադարձել է Լենինգրադ և շարունակել սովորել գեղարվեստի միջնակարգ դպրոցում, որն ավարտել է 1952 թվականին։ Նույն թվականին ընդունվել է Լենինգրադի Ի․ Ռեպինի անվան գեղանկարչության, քանդակագործության և ճարտարապետության ինստիտուտ, որն ավարտել է 1958 թվականին Յուրի Նեպրինցևի արվեստանոցում՝ նկարչի որակավորման շնորհմամբ։ Դիպլոմային աշխատանքը եղել է «Ս. Կիրովը որսի ժամանակ» (ռուս.՝ «С. Киров на охоте») նկարը[4]։
1960 թվականից մասնակցել է ցուցահանդեսների՝ ցուցադրելով իր աշխատանքները Լենինգրադի կերպարվեստի առաջատար վարպետների ստեղծագործությունների հետ միասին։ Ստեղծել է բնանկարներ, նատյուրմորտներ, դիմանկարներ։ 1972 թվականին ընդունվել է Լենինգրադի նկարիչների միության անդամ։ 1966 թվականից դասավանդել է Լենինգրադի Վ․ Մուխինայի անվան բարձրագույն գեղարվեստա-արդյունաբերական ուսումնարանի ընդհանուր գեղանկարչության ամբիոնում, պրոֆեսոր, Ռուսաստանի Դաշնության վաստակավոր նկարիչ[5]։ Ռոստիսլավ Պինկավայի ստեղծագործությունների թվում են՝ «Նատյուրմորտ»[6] (1964), «Մոր դիմանկարը»[7] (1967), «Նատյուրմորտ»[8] (1968), «Քանդակագործ Ն. Դոլինսկայայի դիմանկարը»[9], «Ինքնաեռ և խնձորներ։ Նատյուրմորտ» (երկուսն էլ 1971), «Պատուհան»[7], «Նատյուրմորտ խնձորներով» (երկուսն էլ 1973), «Արևածագ»[10] (1975), «Դաշտային ծաղիկներ»[11] (1979), «Օքսանա» (1983), «Նևրոպաթոլոգ Կ․ Վեսելովայի դիմանկարը», «Նավակների կայան» (ռուս.՝ «Лодочная станция»)[7] (երկուսն էլ 1987) և այլն։
Ռոստիսլավ Պինկավայի ստեղծագործությունները գտնվում են թանգարաններում և մասնավոր հավաքածուներում Ռուսաստանում, Գերմանիայում, Մեծ Բրիտանիայում, Ֆրանսիայում, Դանիայում, Ավստրիայում, ԱՄՆ-ում, Բուլղարիայում և այլ երկրներում։
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.