Ռիֆաա Ռաֆի ալ-Տահտաուի

Ալ-Տահտաուին (ամբողջական անուն՝ արաբ․՝ رفاعة رافع الطهطاوي‎‎, Ռիֆա՛ա Ռաֆի՛ ալ-Տահտաուի, հոկտեմբերի 15, 1801(1801-10-15)^[1][2], Tahta, Եգիպտոս, Օսմանյան կայսրություն - մայիսի 27, 1873(1873-05-27)^[1][2], Կահիրե, Եգիպտոսի խեդիվատ, Օսմանյան կայսրություն), արաբ գրող, թարգմանիչ և եգիպտագետ, համարվում է նահդայի հիմնադիրներից մեկը։

Ռիֆաա Ռաֆի ալ-Տահտաուի رفاعة رافع الطهطاوي
Ծնվել է	հոկտեմբերի 15, 1801(1801-10-15)[1][2]
Ծննդավայր	Տահտա  Եգիպտոս
Վախճանվել է	1873 / 1290 Հիջ.
Վախճանի վայր	Կահիրե  Եգիպտոս
Մասնագիտություն	(գրող, թարգմանիչ)
Ազգություն	արաբ
Քաղաքացիություն	Օսմանյան կայսրություն
Կրթություն	ալ-Ազհար համալսարան
Ուշագրավ աշխատանքներ	«Մաքուր ոսկու հայտնաբերումը Փարիզ այցելության ընթացքում»
Ազգականներ	Mohamed Fathi Rifaa al-Tahtawi?
Rifa'a el-Tahtawi Վիքիպահեստում

Կենսագրություն

Ալ-Տահտաուին ծնվել է Տահտայում, Վերին Եգիպտոսում։ Ավարտել է ալ-Ազհարի համալսարանը։ Ավարտելուց հետո Մուհամմադ Ալին նրան նշանակում է հոգևոր առաջնորդ՝ իմամ, ով պետք է ուղեկցեր 1826 թ. Ֆրանսիա ուղարկված 44 անդամներին։ 6 տարի անցկացնելով Ֆրանսիայում, հենց այստեղ գրում է իր ճամփորդության մասին, սակայն այն հրատարակվում է 1834 թվականին, Ֆրանսիայից Եգիպտոս վերադառնալուց հետո։ Գիրքն իրենով նորություն էր արաբ հասարակության համար։ Ալ-Տահտաուին այն անվանել է «Մաքուր ոսկու հայտնաբերումը Փարիզ այցելության ընթացքում» ( արաբերեն՝ تخليص الإبريز في تلخيص باريز) , որը հաճախ անվանում են նաև Ռիֆայի ճամփորդություն։ Նրա ստեղծագործության մեջ Ֆրանսիան ներկայացվում է որպես բազմաթիվ բարիքների աղբյուր։ Մանրամասն պատմվում է ֆրանսիական կարգուկանոնի և սովորույթների մասին։

Ըստ նրա հատկապես ընդօրինակման են արժանի կրթական և գիտական համակարգերը, հասարակության քաղաքական կազմակերպման ձևերը։ Չնայած կյանքի նկատմամբ ունեցած իր ավանդական մոտեցմանը՝ ալ-Տահտաուին ոչ միայն ընդունում է, այլ նաև ապացուցում է ֆրանսիացիների առավելությունը կրթական ոլորտում։ Նա կարծում էր, որ պետք է ընդօրինակել ֆրանսիական կրթական համակարգը, որպեսզի համակողմանի զարգանան գիտությունները՝ առանց որոնց անհնար է հզոր բանակի և նավատորմի ստեղծումը։ Նրա ստեղծագործության մեջ բավական շատ նկարագրություններ կան Ֆրանսիայի քաղաքական ինստիտուտների վերաբերյալ։ Հեղինակը մեծ համակրանքով գրում է լիբերալ շարժումների, սահմանադրական կառավարման մասին։ Պատմում է նաև 1830 թ. տեղի ունեցած հուլիսյան շարժման մասին։ Նրա գրքում շատ մեծ տեղ են գրավում նրա գաղափարները անկախության և ազատության մասին։ Ալ-Տահտաուին նշում է, որ ֆրանսիացիների համար ազատությունը նույնն է, ինչ եգիպտացիների համար արդարությունը, քանի որ իշխանությունը ազատության պայմաններում նշանակում է բոլոր մարդկանց հավասարությունը օրենքի առջև։ Ընդունելով բոլոր մարդկանց հավասարությունը, ալ-Տահտաուին չի ընդունում արևելյան ղեկավարների անսահմանափակ իշխանությունը։ Նա կարծում է, որ լիակատար իշխանությունը պատկանում է Աստծուն։ Իր մտածմունքների վերջում ալ-Տահտաուին գալիս է այն եզրահանգման, որ լիակատար արդարություն աշխարհում չկա և որ այն հարաբերական երևույթ է։

Պետք է նշել նաև, որ ալ-Տահտաուին եկել է այն եզրահանգման, որ ազատությունը, հավասարությունը և արդարությունը համահավասար են։ Նրա կարծիքով մեծ տարբերություն չկա բնական իրավունքի և շարիաթի միջև։ Հասարակության կառուցվածքի եվրոպական ձևերը հնուց հայտնի են մուսուլմանական աշխարհում։ Եվ դրանք չեն հակազդում իսլամին։ Նրա գործունեությունը առաջին խոշոր ներդրումն էր արաբների մեջ ֆրանսիական լուսավորիչների հասարակական-քաղաքական հայացքների պրոպագանդումը։

Աղբյուրներ

• Долинина А.А. Очерки истории арабской литературы нового времени. Египет и Сирия. Публицистика 1870-1914. М., 1968.
• Борисов В.М. Современная египетская проза. М„ 1961.
• Крымский А.Е. История новой арабской литературы (XIX - начало XX века). М, 1971.
• Сафронов В.В. Новая арабская литература. М., 1996. Արխիվացված 2016-03-05 Wayback Machine

Ծանոթագրություններ

1. Encyclopædia Britannica
2. AlKindi (Դոմինիկյան Արևելագիտության ինստիտուտի առցանց կատալոգ)

Վիքիպահեստն ունի նյութեր, որոնք վերաբերում են «Ռիֆաա Ռաֆի ալ-Տահտաուի» հոդվածին։