![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/c/c5/%25D4%25BD%25D5%25A1%25D5%25B2%25D5%25A1%25D5%25B2_.png/640px-%25D4%25BD%25D5%25A1%25D5%25B2%25D5%25A1%25D5%25B2_.png&w=640&q=50)
Խաղաղ օվկիանոս
օվկիանոս / From Wikipedia, the free encyclopedia
Խաղաղ օվկիանոս (լատին․՝ Oceanus Pacificus), ջրային խոշորագույն ավազան, որը Երկրագնդի ամենամեծ մակերես ունեցող և ամենախորը օվկիանոսն է։ Տարածվում է Եվրասիա և Ավստրալիա մայրցամաքների արևելքում, Հյուսիսային և Հարավային Ամերիկա մայրցամաքների արևմուտքում, Անտարկտիդայի հյուսիսում։ Հնում հայտնի է եղել «Մեծ օվկիանոս» անվանումով։
![Thumb image](http://upload.wikimedia.org/wikipedia/commons/thumb/c/c5/%D4%BD%D5%A1%D5%B2%D5%A1%D5%B2_.png/640px-%D4%BD%D5%A1%D5%B2%D5%A1%D5%B2_.png)
![Thumb image](http://upload.wikimedia.org/wikipedia/commons/thumb/1/13/Ocean_.png/640px-Ocean_.png)
Խաղաղ օվկիանոսը հյուսիսից հարավ ձգվում է մոտավորապես 15,8 հազար, իսկ արևելքից արևմուտք՝ 19,5 հազար կմ։ Ծովերի հետ միասին տարածքը կազմում է 178 684 միլիոն կմ²[1], միջին խորությունը՝ 3984 մետր է։ Խաղաղ օվկիանոսի առավելագույն խորությունը (նաև Համաշխարհային օվկիանոսինը) 10 994 մետր է (Մարիանյան իջվածքում)[2]։ Խաղաղ օվկիանոսի տարածքով՝ մոտավորապես 180° միջօրեականով անցնում է ամսաթվի փոփոխման գիծը[3]։ Խաղաղ օվկիանոսի տարածքը գերազանցում է ամբողջ ցամաքի մակերեսը գրեթե 30 միլիոն կմ²-ով։ Հասարակածն օվկիանոսը բաժանում է գրեթե երկու հավասար մասերի[4]։