Talía Teatro

Talía Teatro é unha compañía creada en 1988. Nas súas orixes era un grupo de teatro afeccionado que estaba vinculado á Asociación Cultural Domingo Antonio de Andrade, entidade organizadora da Mostra de Teatro de Cee. Nesta etapa, chegou a montar varios espectáculos entre os que destacan O rei aborrecido, de X. Pisón; e Ai, Carmela e Marsal Marsal, de J. Sanchis Sinisterra. Debido ás boas críticas e aos premios recibidos, convertéronse nunha compañía profesional en 1996.

Talía Teatro na representación Merlo Branco en 2007.

Caracterízase por ser un grupo teatral estábel que utiliza a lingua galega na representación das obras. Alén diso, o seu repertorio conta con pezas dirixidas a diferentes tipos de público.

A súa actividade principal é a produción e exhibición de espectáculos, que os levaron a crear unha infraestrutura propia. Ademais, realizan outras actividades relacionadas co sector (creación de espectáculos temáticos, organización de obradoiros, etc.).

Compoñentes

• Artur Trillo é autor, director e actor. Leva desde 1988 como director da compañía Talía Teatro. Alén diso, ten realizado montaxes con outras compañías. Como actor foi premiado en numerosas ocasións, destacando a súa interpretación nos espectáculos de Talía Teatro Esperando a Godot, E ti, quen ves sendo?, Bicos con lingua e O Encoro, de Teatro do Atlántico.
• Áurea Ferreiro, vinculada a Talía Teatro desde o ano 2008, leva a área de produción da compañía. Conta tamén con experiencia en xestión de espazos de exhibición teatral.
• Daniel Trillo, empezou a súa andadura teatral con Talía Teatro no 2003 co espectáculo Eu así non xogo. Desde entón participou en doce montaxes da compañía e ocupouse de diferentes facetas creativas como a iluminación e a escenografía. A súa vez, exerceu de xefe técnico da compañía. Ademais de amosar interese polos elementos que compoñen un espectáculo, tamén actuou nalgunhas representacións. Realizou numerosos traballos de deseño de iluminación e escenografía e no ano 2016 recibiu o premio María Casares ao mellor deseño de escenografía do espectáculo Foucellas.
• Martina Cambeiro, forma parte do equipo estábel de Talía Teatro desde a súa creación e realizou o deseño de vestiario e maquillaxe de case todas as súas producións, recibindo numerosos nomeamentos. Ademais opera como técnica de iluminación e son en diferentes espectáculos.
• Toño Casais, leva desde 1993 vinculado a Talía, aínda que tamén ten realizado montaxes con outras compañías como Teatro do Atlántico ou o Centro Dramático Galego. Ten recibido diversos recoñecementos pola súa interpretación como protagonista nos espectáculos Palabras encadeadas e Esperando a Godot e como actor secundario no espectáculo O Encoro, de Teatro do Atlántico.
• María Ordóñez, comezou a súa andadura teatral con Talía Teatro co espectáculo Eu así non xogo, no 2003. Desde entón, participou en nove montaxes da compañía. Cabe salientar a súa interpretación en Palabras encadeadas, O método Grönholm e Pelos na lingua. Por esta última, ten recibido diversos premios como actriz protagonista.
• Marta Lado, é licenciada en Arte Dramático pola ESAD. Conta cunha importante bagaxe tanto a nivel teatral como audiovisual. Entre os seus traballos destaca a súa interpretación en Tartufo, do Centro Dramático Galego.
• Diego Rey, forma parte da compañía desde o 2006 e desenvolve tarefas de actor, técnico, autor e director. A partir do 2010 comeza a orientar a súa carreira á dirección, simultaneando traballos para Talía e outras compañías, mais sen deixar a súa labor interpretativa.
• Marta Ríos, leva vinculada a Talía Teatro desde o 2003, ano no que debutou co espectáculo Eu así non xogo. Desde entón, realizou once montaxes coa compañía. Cómpre destacar a súa interpretación en Volpone, pola que recibiu o premio Maria Casares á mellor actriz secundaria.
• Xurxo Barcala, debutou con Talía no 2000 co espectáculo infantil Menos Lobos. A partir de aí seguiron traballos como Supermáis, Eu así non xogo e E ti, quen vés sendo?. Despois duns anos dedicado a labores pedagóxicos, volve á compañía formando parte do elenco de Os mortos daquel verán e O servidor de dous amos.

Espectáculos teatrais

Título	Autor	Ano	Público
O Rei aborrecido	Xesús Pisón	1988	Adulto
Aquí non paga ninguén	Darío Fo	1989	Adulto
O crime de Aldea Vella	Bernardo Santareno	1990	Adulto
Gaivotas subterráneas	Alfonso Vallejo	1991	Adulto
Ai, Carmela	José Sanchis Sinisterra	1993	Adulto
T.W.C.	Colectiva	1994	Xuvenil e adulto
Fando e Lis	Fernando Arrabal	1994	Adulto
Rezagados	Ernesto Caballero de las Heras	1995	Adulto
A secreta oscenidade de cada día	Marco Antonio de la Parra	1996	Adulto
Pedro e o capitán	Mario Benedetti	1996	Adulto
Retén	Ernesto Caballero	1997	Adulto
Marsal Marsal	José Sanchis Sinisterra	1998	Xuvenil e adulto
Soños dun seductor	Woody Allen	2000	Xuvenil e adulto
Menos lobos	Artur Trillo	2000	Infantil
Dakota	Jordi Galcerán	2001	Adulto
Supermáis	J. M. Benet i Jornet	2001	Infantil
Xustiza Infinita	Cándido Pazó	2002	Xuvenil e adulto
Eu así non xogo	Artur Trillo	2003	Infantil
Bicos con lingua	VV. AA.	2003	Xuvenil e adulto
Molière Final	Roberto Salgueiro	2004	Adulto
A paz do Crepúsculo	Itziar Pascual	2004	Adulto
Mundos contados	Paula Carballeira	2005	Infantil
Esperando a Godot	Samuel Beckett	2006	Adulto
O merlo branco	Cándido Pazó	2006	Infantil
Quero ser grande	VV. AA.	2007	Xuvenil e adulto
E ti, quen vés sendo?	Cándido Pazó	2008	Adulto
Valentino Rufini e Akil Pillabán de viaxe a Milán e van sen un can	Roberto Salgueiro	2008	Infantil
Palabras encadeadas	Jordi Galcerán	2009	Adulto
Volpone	Ben Jonson	2010	Adulto
Carta urxente para Máximo Toxo	Diego Rey	2010	Infantil
Pelos na lingua	VV. AA.	2011	Xuvenil e adulto
Pequena	Paula Carballeira	2012	Infantil
O método Grönholm	Jordi Galcerán	2012	Xuvenil e adulto
Xango, a moi extraordinaria historia do home que foi engulido por unha máquina	Diego Rey	2013	Infantil
Sopa de sapo	Artur Trillo	2014	Infantil
Demolición	Cándido Pazó	2014	Xuvenil e adulto
Rosa Caramelo e outras historias	Adela Turín	2015	Infantil
Foucellas	Cándido Pazó	2016	Adulto
Ubú Rei	Alfred Jarry	2017	Adulto
Os mortos daquel verán	Carlos Casares	2017	Adulto

Tendo en conta o público albo, podemos afirmar, segundo esta táboa, que o 50% das obras son para adultos, o 22.5% para adultos e adolescentes e o 27.5% restante están dirixidas ao sector infantil.

Por outra banda, as obras de autoría galega son maioritarias (41%), seguidas das de autoría española que se corresponden co 27%. As adaptacións de pezas estranxeiras conforman o 22% da totalidade e, para rematar, aquelas realizadas por varios autores representan o 10% restante. Ademais, só o 7.5% das obras son de autoría feminina, fronte o 92.5% que son de autores varóns.

Premios

• 2004 Mellor actor protagonista. María Casares: Artur Trillo por Bicos con lingua
• 2004 Mellor texto orixinal. María Casares: Bicos con lingua
• 2007 Mellor actor. Premio FETEGA: Toño Casais por Esperando a Godot
• 2008 Mellor actor secundario. María Casares: Artur Trillo por E ti, quen vés sendo?
• 2010 Mellor dirección. María Casares: Artur Trillo por Palabras encadeadas
• 2010 Mellor actor protagonista. María Casares: Toño Casais por Palabras encadeadas
• 2011 Mellor actriz. Premio FETEGA: María Ordóñez por Pelos na lingua
• 2011 Premio Nordés das Artes
• 2011 Mellor actriz secundaria. María Casares: Marta Ríos por Volpone
• 2012 Mellor texto teatral en galego. María Casares: Avelino González, María Ordóñez, Artur Trillo e Séchu Sende por Pelos na lingua
• 2012 Mellor texto teatral en galego. Premio Max: Avelino González, María Ordóñez, Artur Trillo e Séchu Sende por Pelos na lingua
• 2016 Mellor escenografía. María Casares: Dani Trillo por Foucellas

Véxase tamén

Bibliografía

• Lourenço Módia, Cilha e Biscainho Fernandes, Carlos. Talía na Crónica de Nós. Dez anos de teatro galego (1990-1999). Abano Editores, Ourense, 2000
• F. Vieites, Manuel. Crónica do Teatro Galego. Universidade de Vigo, 2003
• F. Vieites, Manuel. Cento vinte e cinco anos de teatro en galego. No aniversario da estrea de A fonte do xuramento (1882-2007). Editorial Galaxia, 2007
• Enciclopedia Universal Galega. Tomo XV. Ediciones Ir Indo, 2002
• Revista Paraíso. N.º 3. Xaneiro 2008. Xunta de Galicia

Ligazóns externas

• http://taliateatro.gal/
• https://www.facebook.com/taliateatro/
• https://www.padroadodecultura.es/es/espectaculos/evento/foucellas-tal%C3%AD-teatro Arquivado 18 de setembro de 2019 en Wayback Machine.
• http://www.laopinioncoruna.es/tags/talia-teatro.html
• http://galiciaescenapro.gal/es/espectaculo-2017/ubu-rei-talia-teatro/ Arquivado 19 de marzo de 2018 en Wayback Machine.