From Wikipedia, the free encyclopedia
Buck Adams, echte namme: Charles Stephen Allen, byneamd 'Backhand' (Los Angeles, 15 novimber 1955 – dêre, 28 oktober 2008), wie in Amerikaansk bokser, pornografysk akteur en regisseur. Hy makke yn it begjin fan syn karriêre ek wol gebrûk fan syn eigen namme en fan 'e skûlnammen D.A. Adams, Hector en Claymore Rush. Hy sette yn 1984 útein mei in wurkpaad yn 'e Amerikaanske pornoyndustry en spile yn hûnderten films. Adams wûn trije kear de prestizjeuze AVN Award foar bêste akteur. Hy gie troch mei dat wurk oant er yn 2008 kaam te ferstjerren oan in hertoanfal.
| Buck Adams | ||
 persoan yn de seksyndustry | ||
 | ||
| persoanlike bysûnderheden | ||
| oare artyste- nammen | D.A. Adams, Charles Allen, Charles S. Allen, Hector, Claymore Rush | |
| echte namme | Charles Stephen Allen | |
| nasjonaliteit |  Amerikaansk | |
| berne | 15 novimber 1955 | |
| berteplak | Los Angeles (Kalifornje) | |
| stoarn | 28 oktober 2008 | |
| stjerplak | Los Angeles (Kalifornje) | |
| etnisiteit | Angelsaksysk Amerikaansk | |
| wurkpaad | ||
| wurksum as | pornoakteur, regisseur | |
| jierren aktyf | 1984 – 2008 | |
| offisjele webside | ||
| n.f.t. | ||
Adams waard yn 1955 berne yn Chatsworth, de wyk fan Los Angeles dy't it sintrum fan 'e Amerikaanske pornoyndustry is.
Adams besocht oarspronklik om it te meitsjen as bokser, wat mislearre, en ûnderhold himsels letter as útsmiter. Syn suster, Amber Lynn, dy't yn 'e earste helte fan 'e 1980-er jierren mei in karriêre as pornoaktrise úteinset wie, beloek him by de pornoyndustry om't se seach dat er sa'n bytsje fertsjinne dat er soms amper itende bliuwe koe. Yn 1984, doe't er 29 jier wie, begûn Adams sadwaande te wurkjen as pornoakteur. Yn dy hoedanichheid hied er grut súkses, en hy wûn trije kear in AVN Award (de Oscar fan 'e pornowrâld) yn 'e kategory bêste akteur: yn 1987 foar de film Rockey X, yn 1992 foar Roxy en yn 1995 foar No Motive. Ek waard er ynhuldige as lid fan sawol de AVN Hall of Fame as de XRCO Hall of Fame.
Neffens de Internet Adult Film Database (IAFD) spile Adams yn totaal yn 775 pornofilms, hoewol't dêr ek werútjûne kompilaasjefideo's fan âlder wurk tusken sitte. Hy wurke û.m. foar sokke foaroansteande labels as Devil's Film, Vivid Entertainment, Evil Angel, Anabolic Video, Sin City, Adam & Eve, Elegant Angel en VCA Pictures. Ek wied er wol yn 't spier foar minder bekende studio's, lykas Caballero Home Video, Metro, Leisure Time Entertainment, Coast to Coast Video en Legend Video.
Under syn karriêre wurke Adams gear mei tsjinspylsters as Tracey Adams, Brigitte Aime, Johnni Black, Bunny Bleu, Vanessa Blue, Holly Body, Erica Boyer, Asia Carrera, J.R. Carrington, Jeanna Fine, Ashlyn Gere, Nina Hartley, Kylie Ireland, Jessica Jewel, Keisha, Sally Layd, Heather Lee, Shawna Lenée, Lovette, Mimi Miyagi, Isis Nile, Brittany O'Connell, Moana Pozzi, Savannah, Bianca Trump, Taylor Wane, Teri Weigel, Tori Welles, Zara Whites, Rebecca Wild en Lilli Xene. Hy hie in goede reputaasje yn 'e Amerikaanske pornoyndustry, en stie derom bekend dat er him foar aktrises oer hold en droech as in hear.
Njonken syn aktearwurk wie Adams ek efter de skermen by de pornoyndustry belutsen, as regisseur en senarioskriuwer. Hy makke syn debút as regisseur yn 1988 mei de film Squirt. Yn totaal regissearre er neffens de IAFD 85 pornofilms, û.m. foar de studio's Coast to Coast Video en Sin City. Ien fan 'e súksesfolsten wie Babewatch (1994), in pornografyske parody op 'e aksjesearje Baywatch, dy't yn 'e 1990-er jierren tige populêr wie. Adams spile yn Babewatch ek sels, en waard tegearre mei Rebecca Wild nominearre foar de AVN Award foar bêste sekssêne mei in pearke. Neitiid makke er noch acht ferfolchfilms: Babewatch 2 oant en mei Babewatch 8 en Babewatch 13.
Adams en syn suster Amber Lynn hiene in stoarmeftige bân, dy't hinne en wer swong tusken net mei-inoar praten en inige freonskip. Hja holden harren famyljerelaasje geheim oant in regisseur harren sûnder euvelmoed ris yn in sekssêne oaninoar keppelje woe. Adams troude op 23 april 1986 mei pornoaktrise Janette Littledove. Nei't dat houlik yn in skieding einige wie, krige Adams yn 'e 1990-er jierren in relaasje mei pornoaktrise Aspen Brock.
Yn 'e hjerst fan 1996 oerlibbe er ferskate hertoanfallen efterinoar. Nei't er yn 1999 op 'e nij in hertoanfal krige, dy't him op in hier nei fataal waard, frege er Brock, wylst er noch yn it sikehûs lei, om mei him te trouwen. Sadree't er wer thús wie, fûn de brulloft plak. Adams swarde drank en drugs ôf en joech him by AA. Op 28 oktober 2008 kaam er yn it Northridge Hospital Medical Center yn 'e Los Angelynske wyk Northridge, yn it bywêzen fan û.o. syn dochter Christa en syn suster Amber Lynn, te ferstjerren oan 'e gefolgen fan in nije hertoanfal. Hy waard 52 jier.
| jier | priis | resultaat | kategory | foar har optreden yn |
|---|---|---|---|---|
| 1987 | AVN Award | nominearre | bêste sekssêne (mei Nina Hartley) | Peeping Tom |
| nominearre | bêste senario (fideo) (mei Patti Rhodes-Lincoln) | Rockey X | ||
| wûn | bêste akteur (fideo) | Rockey X | ||
| 1990 | XRCO Award | wûn | bêste sekssêne (mei Tori Welles) | The Chamelion |
| 1992 | AVN Award | wûn | bêste akteur (film) | Roxy |
| 1995 | AVN Award | nominearre | bêste sekssêne mei in pearke (fideo) (mei Rebecca Wild) | Babewatch |
| nominearre | bêste byrol fan in akteur (film) | The Secrets of Bonnie and Clyde The Revenge of Bonnie and Clyde | ||
| nominearre | bêste akteur (film) | Climax 2000 | ||
| nominearre | bêste akteur (film) | The Hustlers | ||
| nominearre | bêste akteur (fideo) | Gemini | ||
| nominearre | bêste regisseur (film) | No Motive | ||
| wûn | bêste akteur (film) | No Motive | ||
| 1996 | XRCO Award | ynhuldige | XRCO Hall of Fame | oeuvre |
| jier ûnbekend | AVN Award | ynhuldige | AVN Hall of Fame | oeuvre |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
