Eukalipto urdin

Eukalipto urdina^[1] (Eucalyptus globulus) mirtazeoen familiako eta eukaliptoen generoko zuhaitza da, jatorriz Australia eta Tasmaniakoak.

Eukalipto urdin
Irudi gehiago
Iraute egoera
Arrisku txikia  (IUCN 3.1)
Sailkapen zientifikoa
Erreinua	Plantae
Ordena	Myrtales
Familia	Myrtaceae
Leinua	Eucalypteae
Generoa	Eucalyptus
Espeziea	Eucalyptus globulus Jacques Labillardière, 1800
Banaketa mapa
Datu orokorrak
Gizakiak ateratzen dizkion produktuak	eucalyptus oil (en) eta Myrtol standardized (en)

Ezaugarriak

Hosto iraunkorreko zuhaitz handia da eukaliptoa: 40 m garai izan daiteke.

Zurtoina – Azala

Enborra lodia eta zuzena da, eta azala leuna eta gris-berdexka ─zerrendatan askatzen da kanpoko geruza─.

Hostoak

Eukaliptoaren hosto gazteak aurkakoak eta eseriak dira; eta helduak, berriz, txandakatuak, peziolodunak, larrukarak eta lantza formakoak. Oso usaintsuak dira hosto guztiak.

Loreak

Neguan loratzen da eukaliptoa. Loreak ─zurixkak─ ginbail bakanetan sortzen dira.

Fruituak

Fruituak

Fruitua kono formakoa da; berde-urdinxka hasieran, eta arrea heltzean.

Habitata

Jatorriz, Australiakoa eta Tasmaniakoa da eukaliptoa. Klima epela eta hezea behar du eukaliptoak, eta kostaldean kultibatzen da Euskal Herrian.

Erabilera

Erleek eukaliptoen loreen nektarra biltzen dute eztia sortzeko. Eukaliptoaren zura horixka da, eta parketa fabrikatzeko erabiltzen da. Papera ere ekoizten da eukaliptoaren egurrarekin.

Hosto eta fruituen infusioak arnas aparatuko hanturak arintzeko erabiltzen dira. Zingiretan, garrantzi handia izaten dute eukaliptoek: inguruaren hezetasuna txikitu egiten dute ─ur asko behar dute eukaliptoek─, eta, horrela, intsektuen populazioak murriztu egiten dira, eta, bide batez, haiek sortutako gaixotasunak, malaria, kasu.