Enez Vreizh, Britannia e latin, zo unan eus an anvioù a vez roet da Vreizh-Veur evit ober anv eus ar vro ma oa diazezet ar Vrezhoned betek aloubidigezh ar Saozon.
Enez Vreizh er bloaz 802. Graet eo bet ar gartenn e Skol-veur Austin, e Texas (gant studierien?). En 802 ne oa ket unanet Iwerzhon na savet kêr Dulenn. Ne oa ket unanet Kembre, ha biskoazh n'eo bet ken bras hanternoz Kembre!
En saozneg e vez graet anv eus Celtic Britain, Roman Britain, pe Medieval Britain, hervez ar mareadoù.
En galleg e vez lavaret Bretagne insulaire eus Enez Vreizh.
E kembraeg e vez lavaret Prydain, a zo bet amprestet d'ober Preden e brezhoneg, d'ober anv eus Breizh-Veur, ha diwar-se
Ynys Brydain eus Enez Vreizh, er ster istorel a roer e brezhoneg,
Ynysoedd Prydain eus an inizi anvet Brish Isles e saozneg, da lavarout eo Iwerzhon hag an inizi tro-dro koulz hag all.
En amzer ar Romaned e oa div rann en enezenn:
ar vro aloubet gant ar Romaned, anvet proviñs Britannia gant an alouberien, goude 122-128, pa'z eo bet savet Moger Hadrian.
Kaledonia, pe bro ar Bikted, ar vro na voe ket aloubet gant ar Romaned (al lodenn se a zo bet dindan Roma eus 84 da 122).
