Віталь Аляксеевіч Цыганкоў

У Вікіпедыі ёсць артыкулы пра іншых асоб з прозвішчам Цыганкоў.

Віта́ль Аляксе́евіч Цыганко́ў (нар. 22 кастрычніка 1969, Шчучын^[1]) — беларускі журналіст, сузаснавальнік беларускага інфармацыйнага агенцтва «БелаПАН».

Віталь Аляксеевіч Цыганкоў
Віталь Цыганкоў у 2024 г.
Род дзейнасці	журналіст
Дата нараджэння	22 кастрычніка 1969(1969-10-22) (54 гады)
Месца нараджэння	Шчучын, Шчучынскі раён, Гродзенская вобласць, БССР, СССР або Мінск, БССР, СССР
Грамадзянства	СССР → Беларусь
Бацька	Аляксей Гаўрылавіч Цыганкоў
Маці	Галіна Цімафееўна Цыганкова
Жонка	Вольга Валер’еўна Цыганкова
Дзеці	Багуслаў
Альма-матар	факультэт журналістыкі БДУ

Біяграфія

Віталь Аляксеевіч Цыганкоў нарадзіўся ў сям’і савецкага і беларускага дзяржаўнага дзеяча Аляксея Гаўрылавіча Цыганкова і выкладчыцы гандлёвага тэхнікума Галіны Цімафееўны Цыганковай. Фактычным месцам нараджэння з’яўляўся горад Шчучын, куды маці прыехала да сваіх бацькоў, аднак па яе ініцыятыве афіцыйная рэгістрацыя нараджэння адбылася ў Мінску.

Віталь Цыганкоў скончыў сярэднюю школу горада Мінска № 51. У 1986 г. паступіў на факультэт журналістыкі БДУ, вучоба на якім была часова перапынена прызывам на тэрміновую ваенную службу (праходзіў яе ў горадзе Тарту ў ЭССР).

Па заканчэнні ўніверсітэта працаваў у газеце «Знамя Юности» (бел.: Сцяг Юнацтва). У канцы 1991 г. сумесна з Алесем Ліпаем заснаваў «БелаПАН» (першае недзяржаўнае агенцтва навін у Беларусі), дзе працаваў намеснікам дырэктара на працягу года. Пасля гэтага Віталь Цыганкоў выконваў журналісцкую працу ў палітычным аддзеле газеты «Звязда». З 1994 г. пачаў паралельна супрацоўнічаць з беларускай службай Радыё «Свабода». У тым жа годзе стаў першым у Беларусі карэспандэнтам «Associated Press». У 1995 г. перайшоў са «Звязды» ў газету «Свабода», дзе працаваў да 1997 г. З 1992 г. па 1996 г. быў карэспандэнтам расійскай «Независимой газеты» (бел.: Незалежная газета). Пэўны час супрацоўнічаў з японскім інфармацыйным агенцтвам «Jiji Press». З 1997 г. па 1999 г. і з 2003 г. па 2007 г. жыў у Празе, працуючы ў сядзібе радыёстанцыі «Свабода».

У 2007 годзе вяртаецца ў Мінск, дзе працягвае працу карэспандэнтам Рускай службы Радыё Свабода.

З мая 2020 года вядоўца праграмы «Размова» на Белсаце, з верасня 2022 вядоўцам і аўтар праграмы «Двубой».

У жніўні падчас акцый пратэстаў быў выцягнуты з аўтамабілю, збіты і затрыманы. Суткі правёў у Акрэсціна.^[2]

З ліпеня 2021 года пражывае ў Варшаве.

Сям’я

Жонка, Вольга Валер’еўна Цыганкова (дачка Валерыя Астапава — першага ў гісторыі незалежнай Беларусі міністра па надзвычайных сітуацыях), працуе ўрачом. Пара мае сына Багуслава.

Віталь Цыганкоў мае I разрад па шахматах.

Прэміі і ўзнагароды

• Лаўрэат першай у гісторыі прэміі імя Алеся Адамовіча ў намінацыі «Газетная публіцыстыка» (1995)^[3]
• Прэміі «Вольнае слова» грамадскага аб’яднання «Беларуская асацыяцыя журналістаў» ад 2007, 2008, 2016, 2018, 2020 і 2022 гадоў.

Цікавыя факты

• У 2003 стаў першым беларусам, які перамог у тэлевізійнай гульні «Слабое звено».^[4]
• У лістападзе 2019 году Цыганкоў атрымаў прапанову ад лідэраў партыяў «Правацэнтрасцкай кааліцыі» (АГП, БХД, Рух «За Свабоду») вылучыцца ад кандыдатам у прэзідэнты. Цыганкоў адмовіўся, спаслаўшыся, што не бачыць у гэтым палітычнага сэнсу і перспектывы. ^[5]

Зноскі

1. Юрыдычна месцам нараджэння з’яўляўся Мінск, дзе пражывалі бацькі.
2. Виталий Цыганков: «Самый счастливый момент задержания — когда нас отправили в камеру» (нявызн.). Беларуская асацыяцыя журналістаў (10 кастрычніка 2020).
3. Прэмія імя Алеся Адамовіча Архівавана 20 студзеня 2016.
4. Віталь Цыганкоў — самае моцнае звяно
5. ЦЫГАНКОЎ — чаму пакрыўдзіўся Чалы, ці можа існаваць рэжым без Лукашэнкі і што не так з Пазняком

Спасылкі

• Віталь Цыганкоў: «І Лукашэнка кажа: пра мяне кепска піша толькі такі Цыганкоў са „Звязды“…» (Шмат фота, відэа) Архівавана 26 жніўня 2019.
• Пра аўтара. Віталь Цыганкоў
• Цыганкоў: "Лукашэнка мне кажа: «Віталь, ну чаго вось вы так рэзка пра мяне?»