Грамяцкі пахаваны выступ

Грамяцкі пахаваны выступ — адносна прыўзнятая тэктанічная структура ў паўночна-заходняй перыклінальнай частцы Варонежскай антэклізы.

Тэктанічныя структуры Беларусі

Размешчаны ў Бранскай вобласці Расіі і на ўсходзе Гомельскай вобласці Беларусі. Восевая частка выступу праходзіць па лініі ад Гомеля, з поўначы ад Добруша, да Сямёнаўкі (Украіна). Мяжуе з Дняпроўска-Данецкім прагінам на поўдні, Клінцоўскім грабенам на поўначы, Гарадоцка-Хацецкай і Бярэзінскай ступенямі Прыпяцкага прагіну і Брагінска-Лоеўскай седлавінай на захадзе і змыкаецца з цэнтральнай часткай Варонежскай антэклізы на ўсходзе.

Паверхня фундамента апушчана па шарніру структуры з усходу на захад ад −0,1 да −0,5 км, на паўднёвым крыле, якое пераходзіць у Прыдняпроўскую монакліналь, апускаецца да -1 км. Платформавы чахол складзены з утварэнняў вільчанскай серыі венду, сярэднедэвонскіх, пермскіх, трыясавых, юрскіх, мелавых, палеагенавых, неагенавых і антрапагенавых адкладаў.

Залажэнне структуры звязана з утварэннем Дняпроўска-Данецкага прагіна і Варонежскай антэклізы на герцынскім этапе.

Літаратура

• Шкуратаў У. І. Грамяцкі пахаваны выступ // Энцыклапедыя прыроды Беларусі. У 5-і т. Т. 2. Гатня — Катынь / Рэдкал. І. П. Шамякін (гал. рэд.) і інш. — Мн.: БелСЭ імя Петруся Броўкі, 1983. — 522 с. — 10 000 экз.