Woody Harrelson

Woodrow Tracy Harrelson (23 de xunetu de 1961, Midland), más conocíu como Woody Harrelson, ye un actor d'Estaos Xuníos de cine y televisión conocíu pol so papel del camareru Woody Boyd na serie Cheers de los años 1980, cola que consiguió un premiu Emmy. Tamién actuó en películes como Natural Born Killers, The People vs. Larry Flynt (pola que tuvo nomáu al Óscar al meyor actor) y l'adaptación cinematográfica de Una mirada a la escuridá.

Woody Harrelson
Vida
Nacimientu	Midland, 23 de xunetu de 1961[1] (63 años)
Nacionalidá	Estaos Xuníos
Familia
Padre	Charles Harrelson
Fíos/es	4
Hermanos/es	Brett Harrelson
Estudios
Estudios	Hanover College (en) 1983) Grau n'Artes Lebanon High School (en) The Briarwood School (en)
Llingües falaes	inglés[2]
Oficiu
Oficiu	actor de televisión, actor de cine, actor de teatru, direutor de teatru, direutor de cine, guionista, productor de cine, actor de voz, actor
Emplegadores	Kings Island (es)
Trabayos destacaos	Indecent Proposal Natural Born Killers The People vs. Larry Flynt No Country for Old Men The Messenger Zombieland The Hunger Games
Premios	ver Premios Emmy  (1989) Primetime Emmy al mejor actor de reparto - Serie de comedia  (1989) : Cheers Premios del Sindicatu d'Actores  (2008) Independent Spirit Award al meyor actor de repartu  (2009) : The Messenger
Nominaciones	ver Óscar al meyor actor (11 febreru 1997): The People vs. Larry Flynt Óscar al meyor actor de repartu (2 febreru 2010): The Messenger Óscar al meyor actor de repartu (23 xineru 2018): Three Billboards Outside Ebbing, Missouri
Miembru de	Sigma Chi (es)
IMDb	nm0000437

Mientres los años 1990, Harrelson empezó como activista a favor de la llegalización de la mariguana y el cáñamu nos Estaos Xuníos,^[3] tamién lluchó pola proteición de les secuoyes del pacíficu. Amás ye pacifista y formó parte de diverses protestes en contra de la invasión d'Iraq de 2003.^[4]

Biografía

Infancia

Woody Harrelson nació en Midland, Texas, en 1961, fíu de Charles Harrelson y Diane Lou Oswald, que divorciáronse en 1964. Tien dos hermanos, Jordan Tracy Harrelson y Brett Tracy Harrelson, pilotu profesional de motociclismu amás d'actor. Mientres la so infancia foi-y diagnosticada dislexa, hiperactividad y trestornu psicolóxicu.^[5] El so padre, un sicariu profesional, foi condergáu a cadena perpetua pol asesinatu d'un xuez federal en 1979 y pasó la mayor parte de la infancia de Woody encarceláu por distintes causes.^[6] Harrelson creció en Lebanon, Ohio, cola so madre, una muyer fondamente relixosa.^[7] Estudió nel Lebanon High School y na Universidá de Hanover d'artes lliberales en Indiana, foi miembru de la fraternidá Sigma Chi y llicencióse en artes escéniques ya inglés en 1983. Harrelson ye d'ascendencia inglesa, escocesa, alemana y holandesa.^[8]

Carrera

Tres la so graduación treslladóse a Nueva York y empezó a estudiar nel Biloxi Blues de Neil Simon. En 1985 foi escoyíu pal papel de Woody Boyd, l'inocente y cordial camareru de la serie de televisión Cheers, col que ganó un Emmy, ente otros premios. La so primer actuación nel cine foi na película Gatos selvaxes de 1986 xunto a Goldie Hawn. Siguió trabayando con pequeños papeles nel cine hasta l'enfrentamientu amorosu que protagonizó con Michael J. Fox na película de 1991, Doc Hollywood.

Darréu Harrelson trabayó en películes como Asaltu al tren del dineru, Wag the Dog, White Men Can't Jump, Vaqueros de Nueva York, Indecent Proposal, Hi-Lo Country y el filme Natural Born Killers d'Oliver Stone de 1994, onde interpreta a un despiadáu asesín.

En 1996 protagonizó la revesosa película The People vs. Larry Flynt, que narra la vida del empresariu Larry Flynt, y pola cual foi nomáu al Óscar al meyor actor. En 2001 volvió a la televisión mientres 7 episodios de la comedia Will & Grace de la NBC. Interpretó a una prostituta travesti na película Anger Management, protagonizada por Adam Sandler y Jack Nicholson, y al axente del FBI Stan Lloyd en El gran golpe.

En 2006 intervieno nes películes A Prairie Home Companion y Una mirada na escuridá, estrenaes en xunu y xunetu, respeutivamente, d'esi mesmu añu. Tres una década un tanto gris, repunxo notoriedá con No Country for Old Men, filme de los Coen que ganó cuatro Premiu Óscar principales en 2008. En 2009 participó na película 2012 como Charlie Frost, un llocutor de radio. Nel mesmu añu protagonizó la película Zombieland como Tallahassee, un cazador de zombies. Nel 2012, interpretó a Haymitch Abernathy, el mentor borrachu de los protagonistes na película The Hunger Games. Va Interpretar al mesmu personaxe mientres les siguientes trés películes de la saga.

En 2014 estrenóse la serie de televisión True Detective protagonizada por Harrelson como un detective de Luisiana detrás d'un asesín en serie. En 2015 protagoniza'l video clip "Song for Someone" de la banda U2 xunto a la so fía Zoe.

Vida privada

Woody Harrelson nel 40 aniversariu de los premios Emmy, el 28 d'agostu de 1988.

Woody Harrelson casóse en 1985 con Nancy Simon, fía del dramaturgu Neil Simon, en Tijuana. Dambos intentaron divorciase a otru día pero la sala taba cerrada y permanecieron casaos mientres 10 meses.^[9]

N'avientu de 2008 casóse con Laura Louie, el so asistente y co fundandora de Yoganics, un serviciu de distribución de comida orgánica. Son pareya dende 1990 y tienen tres fíos xuntos: Deni Montana (5 de marzu de 1993), Zoe Giordano (22 de setiembre de 1996) y Makani Ravello (3 de xunu de 2006).^[10]

Harrelson ye abiertamente partidariu de la llegalización de la mariguana y el cáñamu nos Estaos Xuníos.^[11] El 1 de xunu de 1996 foi arrestáu en Kentucky en llantando de forma simbólica cuatro granes de cáñamu, la so intención yera la d'amosar cómo la llei nun estrema ente'l cáñamu industrial y la mariguana. Harrelson ganó'l casu.^[12]

Tamién ye activista del movimientu ecoloxista, habiendo llegáu a esguilar la ponte Golden Gate de San Francisco pa esplegar una pancarta que dicía: "Hurwitz, ¿Nun son les vieyes secuoyas más precioses que l'oru?" en referencia a Charles Hurwitz, CEO de Maxxam Inc, qu'una vegada dixo: "Quien tien l'oru, manda".^[13] Practica'l veganismu y una dieta basada en comida ensin cocinar nin preparar.^[14] Tamién denunció los esperimentos de la industria cosmética con animales.

Viaxó al traviés de la mariña oeste d'Estaos Xuníos, dende Seattle hasta Santa Barbara, nun vehículu propulsado por biodiésel procedente del cáñamu, esta esperiencia sirvió pa la grabación de la película documental Go Further.^[15] Tamién foi'l narrador principal del documental Grass de 1999, qu'analiza la rellación de la mariguana col gobiernu d'Estaos Xuníos mientres el sieglu XX.

Foi dueñu mientres poco tiempu d'un chigre d'osíxenu en West Hollywood, California, llamáu "O2".^[16] Ye pacifista y de cutiu intervieno en distintes charres en contra de la invasión d'Iraq de 2003.^[4]

Filmografía parcial

Woody Harrelson col sarxentu mayor del exércitu de los Estaos Xuníos, Gene McKinney, el 26 de xunu de 1996.

• War of the planet apes (2017)
• The Hunger Games: Mockingjay – Part 2 (2015)
• The Hunger Games: Mockingjay – Part 1 (2014)
• Out of the furnace (2014)
• True Detective (2014)
• September Morn (2013)
• Now You See Me (2013)
• The Hunger Games: Catching Fire (2013)
• The Hunger Games (2012)
• Siete psicópates (2012)
• Game Change (2012)
• Rampart (2011)
• Friends with Benefits (2011)
• Bunraku (2010)
• 2012 (2009)
• Zombieland (2009)
• Managament (2009)
• Defendor (2009)
• The Messenger (2009)
• Siete almes (2008)
• Battle in Seattle (2008)
• Semi-Pro (2008)
• Transsiberian (2008)
• No Country for Old Men (2007)
• Una mirada na escuridá (2006)
• A Prairie Home Companion (2006)
• The Prize Winner of Defiance, Ohio (2005)
• The Big White (2005)
• North Country (2005)
• After the Sunset (2004)
• She Hate Me (2004)
• Anger Management (2003)
• Esto nun ye un atracu (2003)
• American Saint (2001)
• Xugando a tope (1999)
• EDtv (1999)
• Hi-Lo Country (1998)
• The Thin Red Line (1998)
• Seducción letal (1998)
• Wag the Dog (1997)
• Bienveníos a Sarajevo (1997)
• The People vs. Larry Flynt (1996)
• Kingpin (1996)
• Sunchaser (1996)
• Asaltu al tren del dineru (1995)
• Natural Born Killers (1994)
• Vaqueros de Nueva York (1994)
• Aprendiendo a vivir (1994)
• Indecent Proposal (1993)
• White Men Can't Jump (1992)
• Doc Hollywood (1991)
• Ted y Venus (1991)
• Gatos selvaxes (1986)

Premios y nominaciones

Óscar

Añu	Categoría	Película	Resultancia
2009	Meyor Actor de Repartu	The Messenger	Nomáu
1996	Meyor Actor	The People vs. Larry Flynt	Nomáu

Globu d'Oru

Añu	Categoría	Película	Resultancia
2009	Meyor Actor de Repartu	The Messenger	Nomáu
1996	Meyor Actor - Drama	The People vs. Larry Flynt	Nomáu

Premios del Sindicatu d'Actores

Añu	Categoría	Película	Resultancia
2010	Meyor Actor de Repartu	The Messenger	Nomáu
2008	Meyor Repartu	No Country for Old Men	Ganador
1997	Meyor Actor	The People vs. Larry Flynt	Nomáu

Premios Emmy

Añu	Categoría	Serie ó Telefilme	Resultancia
2014[17]	Meyor actor en Serie Dramática	True Detective	Nomáu
2012[18]	Meyor actor - Miniserie o telefilme	Game Change	Nomáu
1999[19]	Meyor actor convidáu - Serie de comedia	Frasier	Nomáu
1991[20]	Meyor actor de repartu - Serie de comedia	Cheers	Nomáu
1990[21]
1989[22]			Ganador
1988[23]			Nomáu
1987[24]