xueza española From Wikipedia, the free encyclopedia
María Pilar Llop Cuenca (3 d'agostu de 1973, Madrid) ye una xueza y política española, presidenta del Senáu d'España, senadora por designación de l'Asamblea de Madrid y diputada de l'Asamblea de Madrid.
Especialista en violencia de xéneru y en cooperación internacional de l'Alministración de Xusticia, en 2015 dio'l saltu a la política rexonal madrilana siendo escoyida diputada de la x llexislatura de l'Asamblea de Madrid dientro'l grupu parllamentariu socialista y en 2018 a la política nacional siendo nomada delegada del Gobiernu pa la Violencia de Xéneru, cargu qu'ocupó hasta abril de 2019.
Vien d'una familia humilde, el so padre ñacíu en Barcelona[3] foi taxista y darréu emplegáu de banca y la so madre ñacida en Madrid d'ascendencia asturiana, yera peluquera.[4][5] Llicencióse en Drechu pola Universidá Complutense de Madrid. Ye tamién especialista en traducción xurídica inglés-castellán pola Universidá d'Alicante. Foi estudiante Erasmus mientres l'últimu añu de llicenciatura na Universidá de Viena y fala con fluidez inglés, alemán y francés amás de conocer l'italianu y el búlgaru.[6]
Formóse en Barcelona na Escuela Xudicial y ente los sos primeros destinos al aportar por oposición a la xudicatura en 1999 foi nel xulgáu penal númberu 1 de Mataró, dómina na que moró en Girona.[3] Dende 2001 tuvo destinada en distintes places como xueza d'instrucción onde foi tomando contautu cola trata y la violencia escontra les muyeres.[5] Xubió a maxistrada en 2004[6] y en 2009 aportó a un xulgáu especializáu en violencia sobre la muyer.[5] En 2004 entamó a tomar contautu cola perspectiva de xéneru y a formase a partir d'asistir voluntariamente a cursos entamaos pol Conseyu Xeneral del Poder Xudicial en violencia de xéneru ya igualdá, esplicó en delles entrevistes al dar el pasu a la política.[7]
Dende 2011 hasta 2015 foi lletrada del Gabinete Técnicu del Conseyu Xeneral del Poder Xudicial, con responsabilidaes como la xefatura de la Seición Observatorio Violencia Doméstica y de Xéneru, Secretaria de la Comisión Igualdá, Secretaria Foru Xusticia y Discapacidá, y Secretaria del Comité de Direoción del Conseyu Xeneral del Poder Xudicial. El so últimu destín xudicial enantes d'incorporase a la política foi'l xulgáu de violencia de xéneru númberu 5 de Madrid.[6]
Llop compatibilizó la so carrera como maxistrada cola de consultora internacional, y trabayó pa la Comisión Europea na Direición Xeneral de Cooperación Internacional (AIDCO) en Bruxeles, encargada d'asuntos de xusticia, drechos humanos y ONG (2006-2007) según en diversos proyeutos internacionales en países en situación de preadhesión a la Xunión Europea.[8] De xunetu de 2009 a avientu de 2010 trabayó en Bulgaria como Asesora Residente nel Proyeutu Twinning de reforzamientu del sistema xudicial búlgaru.[6]
En 2015 anunció'l so pasu a la política como candidata a diputada autonómica nel númberu 8 de la llista'l PSOE pa les eleiciones a l'Asamblea de Madrid de 2015 liderada por Ángel Gabilondo.[9][10] Ocupó'l puestu númberu 8 de la llista y llogró un escañu. Na X Llexislatura de l'Asamblea de Madrid ye vocera de la Comisión de Xusticia y de la comisión d'Estatutu d'Autonomía, Reglamentu y Estatutu del diputáu amás de miembru de la Diputación Permanente.[6]
N'abril de 2016 anuncióse que sería'l númberu dos de la llista del PSOE por Madrid qu'encabezaría Pedro Sánchez sustituyendo a Meritxell Batet que pasaba a encabezar la llista por Barcelona[11] pero finalmente'l puestu foi ocupáu por Margarita Robles.[12]
En xunetu de 2018 foi nomada delegada del Gobiernu pa la Violencia de Xéneru sustituyendo a María José Ordoñez.[13][14] Dexó'l so cargu n'abril de 2019 mientres anunciaba les sos intenciones de presentase a les eleiciones a l'Asamblea de Madrid de 2019, siendo escoyida en mayu. En xunetu, l'Asamblea de Madrid la designó senadora autonómica.[15]
Convirtióse en senadora'l 11 de xunetu de 2019 y el 31 de xunetu'l so grupu parllamentariu la designó pa llevar les comisiones d'Igualdá, de Xusticia, la Xeneral de les Comunidaes Autónomes y de Defensa, siendo escoyida presidenta d'esta postrera.[16] Tres la repetición eleutoral, Llop foi escoyida presidenta de la Cámara Alta por 130 votos a favor.[17]
Defende la necesidá de que los xueces y fiscales que lleven los procesos de violencia de xéneru tengan formación especializada en perspectiva de xéneru.
Ye partidaria de reformar y adaptar a la complexidá xurídica los delitos escontra la llibertá sexual. En rellación a la sentencia contra La Manada señaló que'l mieu ye un elementu esencial pa considerar qu'hai intimidación: "el Supremu diz que pa qu'haya intimidación l'amenaza tien que ser de pallabra u obra. El mieu ye un elementu esencial. Y el mieu vicia cualquier consentimientu. Siempre".[18]
Wikimedia Commons acueye conteníu multimedia sobre Pilar Llop.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
.svg){kind=small}
.svg){kind=small}
