From Wikipedia, the free encyclopedia
Kaus Australis (Épsilon Sagittarii / ε Sgr / 20 Sgr) ye la estrella más brillosa de la constelación de Saxitariu y la trixésimosesta del cielu nocherniegu,[7] anque ostente la denominación de Bayer «épsilon», quinta lletra del alfabetu griegu. Ye una estrella doble con una componente bien lluminosa de magnitú aparente +1,79 y otra muncho más feble de magnitú 14.[8][9]
El nome de Kaus Australis tien un orixe mistu: Kaus remanez del árabe y significa «arcu», ente que Australis remanez del llatín y significa «del sur».[10]
Xunto a Nash (γ2 Sagittarii) y Kaus Meridionalis (δ Sagittarii), en llingua acadia esta estrella yera «Sin-nun‑tu» o «Si-nu-nu‑tum», (l'andarina).[11] Na antigua Arabia, tamién xunto a Nash y Kaus Meridionalis y amás con η Sagittarii, formaba Al Na'am al Warid, «les avestruces diendo», en referencia a que cruciaben el ríu celestial —la Vía Lláctea—.[12]
Asitiada a 145 años lluz en direición al centru de la Galaxa, Kaus Australis A ta catalogada como una xigante blancu-azulada de tipu espectral B9.5III[13] con una temperatura superficial de 9200 K. La so lluminosidá ye 375 vegaes mayor que la solar, más alta que la que cabría esperar pa una xigante de les sos carauterístiques, polo que tamién foi clasificada como xigante lluminosa. El so radiu, calculáu a partir de la midida direuta del so diámetru angular, ye 7 vegaes mayor que'l radiu solar. Escosáu yá'l so combustible d'hidróxenu, probablemente tien un nucleu d'heliu inerte que se ta contrayendo y caleciendo enantes d'empezar la so fusión en carbonu y oxíxenu.[10] La so edá envalorada ye de 300 millones d'años.[14]
Kaus Australis presenta un baxu conteníu en metales, que pue debese a qu'éstos atópense na parte interna de la estrella, invisibles a la observación direuta en virtú d'una envoltura esterior de gas formada pola so alta velocidá de rotación, 70 vegaes mayor que la del Sol.[10]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.