Caph
From Wikipedia, the free encyclopedia
From Wikipedia, the free encyclopedia
Caph (β Cassiopeiae / β Cas / 11 Cassiopeiae)[8] ye una estrella na constelación de Cassiopeia de magnitú aparente +2,28. Llixeramente menos brillosu que Schedar (α Cassiopeiae), ye la segunda estrella en rellumu dientro de la constelación. Alcuéntrase a 55 años lluz del Sistema Solar.
El nome de Caph, escritu dacuando como Chaph o Kaff, remanez de la pallabra árabe كف kaf, «palmera». Al Tizini, astrónomu árabe del sieglu XVI, designó a la estrella como Al Sanam al Nakah, «la gorrumba del camellu», en referencia a una figura persa de la dómina.[9]
Caph ta catalogada como una subxigante o xigante de tipu espectral F2, non tantu pol so tamañu sinón porque remató la fusión d'hidróxenu abandonando la secuencia principal. Alcuéntrase nuna etapa de bien curtia duración dientro de la evolución estelar; nel diagrama de Hertzsprung-Russell asitiada na llamada «Llaguna d'Hertzsprung», rexón onde apenes esisten estrelles. Namái va pasar un 1% de la so vida como estrella —cifrada nunos pocos miles de millones d'años— nesta fase evolutiva.[10] Anguaño tien una edá averada de 900 millones d'años.[11]
Con una temperatura superficial de 6700 K, Caph ye 28 vegaes más lluminosa que'l Sol. Amuesa un conteníu metálico (metalicidá) asemeyáu al de la nuesa estrella ([Fe/H] = +0,03).[11] La midida direuta del so diámetru angular —2,12 milisegundos d'arcu— dexa evaluar el so diámetru, que resulta ser 3,8 vegaes más grande que'l solar.[12] Per otra parte, tien una corona particularmente débil, un halu de gas magnéticamente caliente qu'irradia rayos X, reparaos alredor del Sol mientres un eclís total.[10] Ye una estrella variable Delta Scuti, la más brillosa dientro d'esti tipu de variables. El so rellumu varia de magnitú +2,25 a +2,31 nun periodu de 2,5 hores.[13]
Caph tien una compañera bien débil, de la que nada se sabe, que la orbita cada 27 díes.[10]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
