From Wikipedia, the free encyclopedia
Delta Andromedae (δ And / 31 Andromedae)[7] ye un sistema estelar na constelación d'Andrómeda. Con magnitú aparente +3,28, ye'l cuartu más brillosu de la mesma dempués d'Alpheratz (α Andromedae), Mirach (β Andromedae) y Alamak (γ Andromedae). Dacuando recibe'l nome de Sadiradra, Saderazra o Sadir Elazra, términos provenientes del árabe الصدر العذراء al-sadr al-adhra'a, que'l so significáu ye «el senu de la doncella». Alcuéntrase a 101 años lluz del Sistema Solar.
La estrella principal del sistema, Delta Andromedae A, ye una xigante naranxa de tipu espectral K3III y 4350 K de temperatura. Tien una lluminosidá 73 vegaes mayor que la lluminosidá solar. La midida del so diámetru angular conduz a un radiu 14 vegaes más grande que'l radiu solar, en concordanza col valor llográu a partir de la so temperatura y lluminosidá (15,1 radios solares). Puede tener una masa de 1,5 mases solares y una edá de 3000 millones d'años, yá que nun se conoz con exactitú en que fase evolutiva alcuéntrase; puede tar amontando'l so rellumu con un nucleu inerte d'heliu, o bien pue tar decayendo llixeramente la so lluminosidá al empezar la fusión del heliu en carbonu y oxíxenu. Paez tar arrodiada por un discu circumestelar d'escombros, que puede suxerir la presencia d'un sistema planetariu.[8]
Visualmente esisten dos tenues acompañantes a 31 y 38 segundos d'arcu de Delta Andromedae A. La primera d'elles, denomada Delta Andromedae C, ye namái una compañera óptica ensin rellación física cola xigante naranxa; otra manera, la otra estrella, denomada Delta Andromedae B, tien magnitú +12,4 y piénsase que ta gravitacionalmente amestada a Delta Andromedae A. D'alcuerdu al so rellumu, ten de ser una nana colorada de tipu M3 dixebrada siquier 900 UA de la estrella principal con un periodu orbital qu'entepasa los 20.000 años.[8]
Per otra parte, la xigante naranxa paez ser de la mesma una binaria espectroscópica. L'acompañante, de la que nada se sabe, completa una órbita cada 58 años. La separación media ente esti par interior ye de 19 UA, anque la escentricidá de la órbita fai qu'ésta varie ente 9 y 28 UA.[8]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
.png)
