NG gemeente Moreletapark

Die NG gemeente Moreletapark is met meer as 14 000 belydende en meer as 5 000 dooplidmate verreweg die grootste gemeente van die Nederduitse Gereformeerde Kerk.

Die gemeente het in 1985 van die NG gemeente Pretoria-Oosterlig afgestig met 1 200 lidmate. Ds. Sarel Visser was die eerste leraar. Dienste is in die Laerskool Constantiapark se skoolsaal gehou. In 1986 is die tweede leraarspaar beroep. Die woonbuurte binne die gemeente het snel uitgebrei en daar is begin met beplanning vir ’n kerkgebou. In 1988 is ds. Dirkie van der Spuy en sy vrou, Esther beroep. Sy opdrag was kerkbou en die vestiging van omgeegroepe.

In 1992 het die gemeente 'n stuk grond in Rubensteinrylaan bekom. Dit was oorspronklik vir ’n Engelsmediumlaerskool uitgehou. Die gemeentesentrum is dieselfde jaar ingewy. Dit het R4 680 595 na terreinverbeterings gekos. Die lidmaattal was toe 3 400. Daar was groot momentum en die inkomste het met 53 persent in een jaar gestyg. In 1993 het die leraars begin spesialiseer en die omgeegroepe het gegroei tot 89.

’n Jeugleraar, ds. Johan de Wet, is in 1994 aangestel. Die kleuterskool is ook in dié jaar gebou wat dubbeldoelig as kategeselokale kon dien. Die jeugsentrum (grootsaal) is in 1995 ingewy. Die eerste Gemeente-vernuwingseminaar is in 1996 gehou en 250 persone van 85 gemeentes het dit bygewoon. Die lidmaattal het tot 5 400 toegeneem. In 1997 begin ds. Hendrik Saayman sy werk as sendingspesialis. Dr. Bennie en Anita Mostert word beroep. In 1998 sluit ds. Werner en Hanlie Groenewald by die gemeente aan. Ds. Marinda van Niekerk begin as tentmaker saam met haar man, Wilhelm. Sy spesialiseer in middestad-kinderbediening by Pretoria Evangelisasie en Nasorg (PEN). Ook in 1998 word die gebedskapel gebou teen R116 408. Moreletaparkgemeente stel hierna ook jeugwerkers en hul eie maatskaplike werkers aan. In November 1997 maak die Beplanningskommissie voorstelle oor die uitbreiding van die ouditorium. 'n Jaar van konsultasie word gehou oor die toekoms van die reuse gemeente.

In 2003 was die lidmaattal (kinders en volwassenes) 15 441. Ds. Elza Meyer sluit by die gemeente aan met die opdrag om die Ondersteuningsentrum en ’n gemeenskapskerk te begin. In November 2003 begin die Geestelike Ondersteuningsentrum funksioneer en open amptelik in Februarie 2004. Op 1 Junie 2003 beleef die gemeente 'n "wonderwerk". Dr. Bruce Wilkinson lei die eredienste en R59 miljoen word ingesamel in die vorm van belofte-offers vir die nuwe gemeentesentrum. Ds. Stephen Temeki word in 2004 aangestel as leraar vir die Afrikataalbediening. Hy hou elke Sondagoggend ’n diens in Tswana, Sotho en Engels in die Rubensteinsentrum se ouditorium. Joshua Sawa is in 2006 aangestel as hulppastoor. Dr. Stephan Joubert begin ook in 2004 as Geestelike Leier vir die Opleiding- en toerustingbediening. Die eerste leiersweek word onder sy leiding gehou om predikante van die hele land nuwe moed te gee en hul toe te rus.

In Januarie 2005 het die bouwerk begin aan die nuwe 7 100-sitplek-ouditorium, die sogenaamde Woodlandssentrum. Die Rubensteinsentrum bars heeltemal uit sy nate. Daar was reeds ses eredienste op 'n Sondag gehou en lidmate het in twee oorlooplokale en die voorportaal gesit vanwaar hulle op groot TV-skerms die erediens beleef het. Daar is groot uitbreidings in en om Moreletapark met duisende nuwe wonings en heelwat nuwe meenthuiskomplekse en sekuriteitsoorde. Die gemeente is die enigste in die ring (wat ook uit Elarduspark en Pretoria-Oosterlig bestaan) wat die nuwe intrekkers kon huisves.

Die gemeente het opslae gemaak nadat hy Johan Strydom, wat aan die kunste-akademie verbonde was, in 2005 afgedank het omdat Strydom in 'n gay-verhouding was. In Augustus 2008 het Strydom 'n hofsaak gewen teen wat hy as sy onregverdige ontslag beskou het, toe regter Dion Basson van die Pretoriase Hooggeregshof gelas het dat die gemeente onvoorwaardelik verskoning vra omdat hulle die musiekonderwyser afgedank het. Basson het gesê Strydom se grondwetlike regte weeg swaarder as die gemeente se reg op godsdiensvryheid. Die gemeente is gelas om hom byna R87 000 te betaal vir die aantasting van sy waardigheid, vir emosionele en sielkundige lyding asook 'n verlies aan inkomste.^[1]