Bettie Cilliers-Barnard

Bettie Cilliers-Barnard (distrik Rustenburg, 18 November 1914 – Pretoria, 15 September 2010) was 'n gevierde Suid-Afrikaanse skilder en grafiese kunstenaar. Sy is tot haar dood as die doyenne van plaaslike kunstenaars beskou. Buiten in haar geboorteland het sy ook in Parys, Switserland, die VSA en die Verenigde Koninkryk gestudeer. Sy het haar as 'n figuratiewe kunstenaar met die sirkelmotief en simboliek as kenmerke van haar werk onderskei.^[1]

Bettie Cilliers-Barnard
Gebore	18 November 1914 Distrik Rustenburg, Suid-Afrika
Sterf	15 September 2010 (op 95) Pretoria, Suid-Afrika
Nasionaliteit	Suid-Afrika
Beroep	Skilder
Eggenoot	Carel Hancke Cilliers
Kinders	Jana Cilliers
Ouer(s)	Johannes Christoffel Barnard Johanna Wilhelmina Barnard

Mymering (1949), deur Bettie Cilliers-Barnard

Sy het in 1937 'n BA aan die Universiteit van Pretoria verwerf en in 1940 aan die Universiteit van Suid-Afrika. Later jare volg eredoktorsgrade van onder meer die Potchefstroomse Universiteit (1990), die Randse Afrikaanse Universiteit (1999) en die Universiteit van Pretoria (2002).

Cilliers-Barnard hou haar eerste solo-uitstalling in 1946 in Pretoria. Sy het aan verskeie biënnale wêreldwyd en meer as 70 solo-uitstallings deelgeneem, waarvan etlike ook in die buiteland vertoon is. Die groepuitstallings waarby haar werk binnelands sowel as buitelands ingesluit is, tel meer as 150. Sy het haar laaste solo-uitstalling op 90 gehou.

Haar opdragwerke sluit onder meer die Provinsiale geboue in Pretoria en Bloemfontein, die ou Jan Smuts-lughaweterminaal, die Departement van Gesondheid, Staatsteater en Pretoriase Ooginstituut in.

Cilliers-Barnard is met meer as 20 toekennings vereer, onder andere:

• Goue Medalje vir Skilder – Transvaalse Akademie vir Wetenskap en Kuns, Johannesburg
• Merietesertifikaat – XIe Grand Prix International d'Art Contemporain, Monte Carlo
• Erepenning vir Skilder – Suid-Afrikaanse Akademie vir Wetenskap en Kuns
• Kanselliersmedalje – Universiteit van Pretoria
• Staatspresidentstoekenning vir Eervolle Diens
• Certificate of Merit for Distinguished Achievement, The World Who's Who of Women
• Commemorative Medal of Honour – American Biographical Institute
• World Decoration for Excellence – American Institute (Biographical)
• The "First Five Hundred", International Biographical Centre of Cambridge, Verenigde Koninkryk
• "Women of the Year" - International Biographical Centre of Cambridge

Sy was 'n lewenslange lid van die Grand Council of the ConFed of Chivalry, Australië en 'n vollid van die Suid-Afrikaanse Akademie vir Wetenskap en Kuns.

Persoonlike lewe

Sy was die dogter van Johannes Christoffel en Johanna Wilhelmina Barnard, getroud met Carel Hancke Cilliers en die moeder van die aktrise Jana Cilliers.

Bron

• Kempff, Katinka: Bettie Cilliers-Barnard. In: Lantern. Tydskrif vir Kennis en Kultuur. Jaargang 24, nr. 2, Desember 1974.
• Who's Who Southern Africa Geargiveer 6 April 2010 op Wayback Machine

Verwysings

1. HAT Taal-en-feitegids, Pearson, Desember 2013, ISBN 978-1-77578-243-8

Eksterne skakels

• Beeld
• Ooggetuienuus^{[dooie skakel]}
• Die Burger Geargiveer 17 September 2010 op Wayback Machine
• Lewensskets in Die Burger Geargiveer 24 Februarie 2013 op Wayback Machine