高洋

齊文宣帝高洋（526年—559年），字子進，係北齊嘅開國皇帝，550年至559年在位。佢係東魏權臣高歡第二個仔，亦係高澄嘅二細佬。^[1]

一世

高洋阿媽佗緊高洋嗰時，晚晚都會有光射入佢間房。^[2]高洋細個嗰陣好樣衰，但係好叻，所以佢老豆高歡好睇重佢。^[3]響天平二年，高洋做咗散騎常侍、驃騎大將軍、儀同三司、左光祿大夫同太原郡開國公。^[4]之後響武定元年，高洋撈多個侍中嚟做。^[5]喺武定二年，高洋跳槽做尚書左僕射、領軍將軍。^[6]再響武定五年，東魏皇帝元善見封高洋做尚書令、中書監同京畿大都督^[7]。

響武定七年，大哥高澄俾廚師蘭京插死。高洋即刻親自捉蘭京，一啲都唔驚。^[8]之後，高洋接掌高澄嘅職位，掌握大權。^[9]跟住，元善見封高洋做丞相、齊郡王。^[10]

響550年，高洋逼元善見禪位畀佢，高洋終於正式登上皇帝寶座。高洋廢止東魏，建立新國家北齊取而代之，嗰陣時佢得二十五歲。高洋一開始勵精圖治，出兵攻擊柔然、契丹，重贏埋。但係喺高洋在位後期，高洋蛻變做一個懶散嘅昏君，佢唔單止有酗酒嘅陋習、荒淫無度，重響鄴連續起三棟豪華皇宮，民不聊生。佢飲醉酒之後好暴戾，接二連三殺死無辜嘅大臣，例如高隆之、高德政、杜弼、王元景、李蒨。重響鄴嗰三棟皇宮用鋸鋸死都督穆嵩，而另外一個冇罪、清白嘅都督韓悊亦冇得倖免，俾高洋殺死。^[11]

響559年，高洋飲酒飲出病，食唔落嘢，最終英年早逝^[12]，死嗰時得三十四歲，葬響武寧陵，廟號係威宗（後來改做顯祖），諡號係文宣皇帝。^[13]

另外，高洋有一個怪癖，就係鍾意喺寒冬除曬衫喺條街度遊蕩。^[14]

家室

老婆

• 文宣皇后李祖娥
• 段昭儀
• 顏玉光
• 馮世婦
• 裴嬪
• 王嬪
• 薛嬪

仔

1. 皇帝高殷
2. 太原王高紹德
3. 范陽王高紹義
4. 西河王高紹仁
5. 隴西王高紹廉

女

1. 中山公主
2. 無名氏
3. 義寧公主

參攷

1. 《北齊書》第四卷 帝紀第四 文宣：「顯祖文宣皇帝諱洋，字子進，高祖第二子，世宗之母弟」
2. 《北齊書》第四卷 帝紀第四 文宣：「后初孕，每夜有赤光照室，后私嘗怪之。」
3. 《北齊書》第四卷 帝紀第四 文宣：「及長，黑色，大頰兌下，鱗身重踝。不好戲弄，深沉有大度。晉陽曾有沙門，乍愚乍智，時人不測，呼為阿禿師。帝曾與諸童共見之，歷問祿位，至帝，舉手再三指天而已，口無所言。見者異之。高祖嘗試觀諸子意識，各使治亂絲，帝獨抽刀斬之，曰：「亂者須斬。」高祖是之。又各配兵四出，而使甲騎偽攻之。世宗等怖撓，帝乃勒衆與彭樂敵，樂免胄言情，猶擒之以獻。後從世宗行過遼陽山，獨見天門開，餘人無見者。內雖明敏，貌若不足，世宗每嗤之，云：「此人亦得富貴，相法亦何由可解。」唯高祖異之，謂薛琡曰：「此兒意識過吾。」幼時師事范陽盧景裕，默識過人，景裕不能測也」
4. 《北齊書》第四卷 帝紀第四 文宣：「天平二年，授散騎常侍、驃騎大將軍、儀同三司、左光祿大夫、太原郡開國公。」
5. 《北齊書》第四卷 帝紀第四 文宣：「武定元年，加侍中。」
6. 《北齊書》第四卷 帝紀第四 文宣：「二年，轉尚書左僕射、領軍將軍。」
7. 《北齊書》第四卷 帝紀第四 文宣：「五年，授尚書令、中書監、京畿大都督。」
8. 《北齊書》第四卷 帝紀第四 文宣：「武定七年八月，世宗遇害，事出倉卒，內外震駭。帝神色不變，指麾部分，自臠斬群賊而漆其頭，徐宣言曰：『奴反，大將軍被傷，無大苦也。』當時內外莫不驚異焉。」
9. 《北齊書》第四卷 帝紀第四 文宣：「乃赴晉陽，親總庶政，務從寬厚，事有不便者咸蠲省焉。」
10. 《北齊書》 卷四 帝紀第四 文宣：「戊辰，魏詔進帝位使持節、丞相、都督中外諸軍事、錄尚書事、大行台、齊郡王，食邑一萬戶。……夏五月辛亥，帝如鄴。甲寅，進相國，總百揆，封冀州之渤海長樂安德武邑、瀛州之河間高陽章武、定州之中山常山博陵十郡，邑二十萬戶，加九錫，殊禮，齊王如故。」
11. 《北齊書》第四卷 帝紀第四 文宣：「親戚貴臣，左右近習，侍從錯雜，無復差等。徵集淫嫗，分付從官，朝夕臨視，以為娛樂。凡諸殺害，多令支解，或焚之於火，或投之於河。沉酗既久，彌以狂惑，至於末年，每言見諸鬼物，亦云聞異音聲。情有蒂芥，必在誅戮，諸元宗室咸加屠剿，永安、上黨並致冤酷，高隆之、高德政、杜弼、王元景、李蒨之等皆以非罪加害。嘗在晉陽以槊戲刺都督尉子耀，應手即殞。又在三臺大光殿上，以鋸鋸都督穆嵩，遂至於死。又嘗幸開府暴顯家，有都督韓悊無罪，忽於衆中喚出斬之。自餘酷濫，不可勝紀。朝野憯憎，各懷怨毒。而素以嚴斷臨下，加之默識強記，百僚戰慄，不敢為非，文武近臣，朝不謀夕。」
12. 《北齊書》第四卷 帝紀第四 文宣：「暨于末年，不能進食，唯數飲酒，麴蘖成災，因而致斃。」
13. 《北齊書》第四卷 帝紀第四 文宣：「乾明元年二月丙申，葬於武寧陵，諡曰文宣皇帝，廟號威宗。武平初，又改為文宣，廟號顯祖。」
14. 《北史》第七卷 齊本紀第七：「隆冬酷寒，去衣馳走，從者不堪，帝居之自若。」