香港政治家 From Wikipedia, the free encyclopedia
譚香文(TAM Heung-man;1957年6月8號—)係香港執業會計師,香港立法會(功能組別會計界)前議員(2004年-2008年),黃大仙區議會議員(2003年-2007年、2012年-)。
佢曾經係泛民主派嘅一員,但喺2021年中開始向親中陣營靠攏,並且取得多名親中陣營人士提名參選主流泛民主派唔參加嘅2021年香港立法會選舉[1]。
譚香文祖籍廣東順德,而佢係香港出世。出世時佢喺九龍何文田木屋區(取名「香文」寓意「香港何文田」),之後佢屋企搬到九龍黃大仙東頭邨七層大廈,亦喺嗰度大。
2003年11月23號,佢以鑽石山私人屋苑「星河明居」業主委員會嘅身份,由原區議員蔡六乘手上贏咗黃大仙區議會龍星選區議席。
2004年9月12號,喺泛民主派支持下,佢再喺功能組別會計界以相差37票之微當選立法會議員,打敗咗龔耀輝同陳茂波。
2007年2月2號,佢喺搭地鐵期間,不滿隔離嘅青年用手提電話講粗口報警。
同年區議會選舉,佢競逐連任失敗,輸畀上次對手蔡六乘。
2008年立法會選舉,佢競逐連任失敗,輸畀陳茂波。
2009年6月8號,佢認為公民黨忽視基層需要,而退出公民黨。
2011年區議會選舉,佢再贏蔡六乘,攞返黃大仙區議會議席。
2013年佢加入人民力量。
2015年區議會選舉,佢贏咗對手林作,成功冧莊。
2019年第6屆香港區議會選舉,譚香文以6098票打低莫嘉傑、陳進雄、岳敬寬(蔡六乘徒弟),榮膺當屆區選嘅票后。
2020年7月尾,譚香文忽然跳過當時訂立嘅泛民主派初選機制,話要喺第7屆香港立法會選舉出選會計界,挑戰時任議員梁繼昌[2][3]。但其後特區政府以武肺疫情為由將選舉延後一年,選舉工程暫停。之後,由於北京同特區政府未諮詢香港人、甚至乎泛民主派之下,大幅度削減直選議席比例同單方面設立國安審查,好多主流民主派組織都選擇唔參加呢次選舉。不過譚香文選擇參選九龍中選區,並且得到多名親中陣營成員,包括陳曼琪、周莉莉、郭耀偉、王坤、沈慧林、鍾子權嘅選委會提名[1]。最後佢攞到8,028票落選。