香港網絡大典

香港網絡大典（EVCHK），係惡搞形式百科全書，2006年3月21號成立。

特色

香港網絡大典主要係要紀錄香港網絡界嘅傳奇人物、網上大事同埋網上術語，重會有現實中嘅人同事紀錄喺嗰度，例如巴士阿叔事件、十四巴港女等等。因為維基百科喺地區色彩方面嘅文章要求比較嚴格，所以網典喺呢方面就彌補咗前者嘅不足。網典運作模式同維基百科幾相似，採用wiki技術嘅MediaWiki系統，乜人都可以新增同修改文章，達到集思廣益嘅效果。

雖然話題以香港人為中心，但係文體受香港教育體制阻礙^[1]，所寫白話文唔係粵文。

媒體

電視台「誹謗」

馬尼拉人質事件事發當日，香港電台播出《鏗鏘集——網路審判團》，節目中多次用網典截圖試圖話起底同網典有關。網典管理員發聲明，表示起底有違網站本意，就節目偏差指控深表遺憾。

東方告到佢改革

東方報業集團告過網典空間提供者「Wikia公司」誹謗，話有人喺呢個平台度叫佢份報紙做「白粉報」。2011年7月7號高等法院頒令，要求Wikia禁止刊載涉案誹謗文章，如果再有人寫就罰網站賠錢。

由2011年8月12號開始，要有個認證帳號，先有得玩，唔再乜都亂寫一通。

記事同潮語權威

媒體成日引用網典詞解，用網典資料寫新聞。連BBC都有用佢介紹香港選舉術語。

休班警詳細實錄

2010年代網路迷因，「有種罪犯叫做休班警」事件。Google搜尋「休班警」頭版都係一大批「休班警犯法」如非禮女童、藏毒等搜尋結果。當中，維基百科、網典佔咗頭兩位，入面記載警暴多到可以出幾本書，詳細到重多過香港警務處自己話自己人。

睇埋

• 香港互聯網文化

連出去

• 香港網絡大典

攷

1. 中聯辦：進行純粹粵語書寫論調「別有用心」 - 港語學 2020年8月11號