解謎電子遊戲

解謎電子遊戲（粵拼：gaai2 mai4 din6 zi2 jau4 hei3 | 英文：puzzle video game）指主要模擬解謎嘅電子遊戲類型，例如《俄羅斯方塊》。

俄羅斯方塊

定義

睇埋：解謎

解謎嘅一個定義係「一個就噉望落解唔到，玩嘅人要用腦慢慢諗先可以解到」嘅難題，例如係扭計骰同數獨呀噉；解謎電子遊戲就係專玩呢啲嘢嘅電子遊戲。

除此之外，好多第啲遊戲類型（尤其係冒險遊戲）都會有些少解謎嘅成份^[1]。

結合平台

睇埋：平台遊戲同Portal 系列

解謎平台遊戲可以算係解謎電子遊戲嘅一種子類型，結合咗平台遊戲同解謎，畀人指係一場「矛盾」：傳統上，平台遊戲畀人歸類做動作遊戲，傾向考玩家嘅反應，玩家要（例如）响一塊識郁嘅平台郁到去某個位嗰陣，及時撳掣令玩家角色跳上去；相比之下，解謎平台遊戲就一般畀人覺得係「要停低慢慢諗」嘅；不過有唔少遊戲會結合呢兩隻遊戲類型，形成所謂嘅解謎平台遊戲，而且不乏成功之作^[2][3]。

例如《Portal》呢個系列嘅作品就好出名：《Portal 系列》首作出喺 2007 年，出咗冇耐就取得咗大成功，喺跟住嗰年內攞咗多個電子遊戲獎項^[4]，仲吸引咗啲 fan 史整關於隻遊戲嘅網絡 meme，廣泛噉畀人認為 3D 解謎平台遊戲第一隻成功作品；一隻《Portal》遊戲會有若干關，而喺一個典型嘅《Portal》關卡裏面^[5][6]，

• 玩家角色會身處喺一間有咁上下大嘅房裏面，目的好簡單，係要由起點行去終點（似典型嘅平台遊戲），
• 不過啲房往往佈滿咗機關、無底深淵或者人擒唔到上去嘅高牆，玩家冇得話「就噉由起點行去終點」咁簡單；
• 玩家要做嘅，包括要操縱環境入面嘅物件，仲要喺牆、地板同天花板嗰度開啟傳送門（傳送門數量有限，一位玩家同時頂攏淨係可以開住兩道）嚟將自己同啲物件傳送去目的地；
• 除此之外，通過傳送門嘅玩家角色（或者其他物件）會保留原有嘅動量（簡化講即係郁動方向同速度），所以玩家好多時仲必需要以適當嘅角度同速度跳入傳送門，先至會去到想要嘅位置嗰度－例如係下圖幅圖解噉，玩家如果跳落去青色嗰道傳送門度，就會由橙色嗰道傳送門度出返嚟，而且因為佢入青色傳送門之前下跌咗一陣，而佢喺下跌過程當中會加速，所以佢會以一定嘅速度由橙色傳送門飛出嚟。

如是者，玩家通常會出現「望勻關卡嘅環境，諗一輪，先至諗到要點樣解決條問題」（解謎）噉嘅體驗。

除咗《Portal》之外，《風之少年系列》嘅作品亦都成日畀人描述做「解謎平台遊戲」^[7][8]。

典型《Portal》關卡嘅圖解：玩家要喺特定嘅位開啟傳送門（啲發光嘅橢圓），仲要以特定角度同速度跳入傳送門（由啲箭咀表示），先會去到終點過關。

睇埋

• 戰略遊戲
• 冒險遊戲

攷

1. Puzzle Games You Have To Be A Genius To Complete. Game Rant.
2. 7 notable puzzle-platformers every dev should study. Game Developer.
3. 17 Sub-Genres of Platformer Games | List. "10. Puzzle Platformer"
4. Portal BioShocks GDC Awards. Gamespot UK.
5. Portal is more sinister than you remember. PC Gamer.
6. VALVE'S ICONIC VIDEO GAME PORTAL LAUNCHES SOON WITH RTX. G-LYFE.
7. Klonoa Wii-make Hands On: Awesomely Waggle-Free. Kotaku.
8. Set off on an adventure to save the world in KLONOA Phantasy Reverie Series. Nintendo.