角色
From Wikipedia, the free encyclopedia
角色(粵拼:gok3 sik1;英文:character [註 1][1]),又或者叫人物(粵拼:jan4 mat2),係指喺故仔入面一個有能力作出決策嘅個體-一個角色可以係個人又或者係第啲有智能嘅非人類個體,後者嘅例子有科幻興用嘅 AI 機械人,或者係奇幻興用嘅高扁同仙子等類人生物[2]。
角色係故仔嘅最根本元素之一。除咗一啲極抽象嘅詩之外,故仔梗要有角色。角色嘅特質會主宰佢哋嘅決策,決策產生嘅行動會影響情節嘅發展,而喺好多故仔入面,角色仲會因為決策引致嘅經歷而出現長遠嘅變化[3][4]。舉個例說明:主角胡迪係件玩具,佢好鍾意佢主人安仔(特質);有日,安仔得到巴斯光年呢件新玩具,安仔好鍾意巴斯光年,搞到胡迪好妒忌,然後胡迪嘗試整走巴斯光年(行動 1),喺一連串嘅意外下,胡迪同巴斯光年一齊走失咗,去到離安仔屋企好遠嘅地方(行動引致嘅結果),搞到胡迪焗住要選擇同巴斯光年合作返屋企(行動 2),中途佢哋一齊克服好多難關,最後成功同安仔團聚(行動引致嘅結果),令胡迪同巴斯光年做咗好朋友,而且胡迪仲學識變到唔好咁妒忌心重(角色發展)[5]。
因為角色對故仔咁重要,敘事學同搞創意寫作嘅人都相當睇重對角色嘅分析。好似係虛構故仔作家、漫畫家同編劇等從事作故仔相關工作嘅人都會參與討論,想要剖析「點樣創作出讀者觀眾會鍾意嘅角色」等嘅課題[3][4]。