主角

主角（粵音：zyu2 gok3 | 英文：protagonist，源自希臘文 πρωταγωνιστής，prōtagōnistḗs，意思係「首席演員」噉解^[1]）係指一個故仔當中最重要嘅角色。主角咁重要就表示佢通常有以下嘅特徵^[2]：

• 作出對情節有具體影響嘅決策；
• 承擔佢決策帶嚟嘅後果；
• 用佢嘅行動會令到情節得以演進；
• 喺故仔嘅途中面對重大嘅困難，並且嘗試解決呢啲困難（不過佢唔一定要成功，悲劇嘅故仔就往往會講主角遇到重大失敗）；
• 會同對立角色對抗；
• 成為讀者觀眾嘅注意力中心（不過主角可以唔引起故仔世界入面第啲角色嘅注意）；

多個出名故仔當中嘅主角：

• 左上：蝙蝠俠；右上：福爾摩斯
• 下：羅密歐與茱麗葉（圖左嘅後生男女）

另一方面，如果一個故仔嘅情節有多條子情節（subplot），噉每一條子情節都可以有佢嘅主角^[3]。

主角唔一定係英雄：英雄主角係最常見嘅主角類型，指正義（或者至少唔係壞人）嘅主角，會做「打低奸角」同「拯救世界」等嘅好事，例子有同罪犯戰鬥嘅蝙蝠俠以及查案捉罪犯嘅大偵探福爾摩斯呀噉^[4]；另一方面，奸角主角指扮演奸角嘅主角，一個奸角主角會想做壞事，而呢點會有搞到觀眾憎佢嘅危險，所以奸角主角寫起上嚟要好有技巧先得^[5]。

角色發展

内文：角色發展

睇埋：角色缺憾同英雄旅程

• 想像以下嘅故仔：王子係一個以貌取人嘅人，有次佢對一個醜樣嘅阿婆唔禮貌（決策），而個阿婆原來係仙子，跟住仲對佢落咒、令佢變成一隻醜樣嘅野獸（承受決策帶嚟嘅後果）；後嚟佢因緣巧合，捉到一個老男人，個老男人嗰個心地善良嘅女（女主角）自願噉用自己嘅自由嚟換取阿爸嘅；及後女主角留喺野獸嘅城堡當中（有機會改變），兩人相處之後，野獸受女主角影響學識變得仁慈啲同開放自己嘅心（行動影響情節），最後破解仙子嘅咀咒（角色發展）。
• 想像以下嘅故仔：主角阿古係一個大賊，一心淨係想專注於佢嘅事業，而且性格有少少冷漠無情（缺憾），佢嘅性格令佢有錢、但生活得好孤單（承受決策帶嚟嘅後果）；有一次，阿古因緣際會領養咗三個孤兒，而且焗住要好好噉湊住佢哋，暫時扮演養父嘅角色（被迫要作出改變）；及後佢回想起自己嘅童年，原來佢細個嗰陣成日都俾佢阿媽睇唔起，所以先搞到佢咁執著要成功（背景故仔；順帶一提，喺一個角色成長途中，故仔好多時會揭示令到嗰個角色有缺憾嘅背景故仔），最後佢作出改變開始重視同屋企人來往（行動影響情節），而且亦都得到真正嘅快樂（角色發展）^[6]。

假主角

内文：假主角

假主角係指一個開始嗰陣望落係主角、但實際上並唔係主角嘅角色。舉個例說明，想像一個故仔，第一章講探險家阿莊去到一個山旯旮嘅遺跡冒險（而個故仔可以乘機喺呢段情節當中透露有關個遺跡嘅資訊），而第一章最尾係講阿莊踩到陷阱死亡；然後去到第二章，故仔鏡頭移去侯活嗰度，侯活先至係主角，而故仔淨低嘅部份就係講侯活去嗰個遺跡嗰度冒險，而且由侯活嘅角度睇嘢；喺呢個例子裏面，阿莊就係一個假主角。假主角喺寫作上有唔少嘅用途，例如係用嚟突顯個故仔世界嘅危險－阿莊嘅死用嚟突顯個遺跡有幾咁危險（而且因為第一章成段都係由阿莊嘅角度睇嘢嘅，所以佢嘅死會對讀者有更大嘅情緒衝擊），令呢場冒險感覺更加驚險刺激^[7]。

再睇埋

• 自傳
• 玩家角色

引咗

1. πρωταγωνιστής, Henry George Liddell, Robert Scott, A Greek-English Lexicon, on Perseus Digital Library.
2. The Protagonist. TV Tropes.
3. Duncan, Stephen. A Guide to Screenwriting Success: Writing for Film and Television. Rowman & Littlefield, (2006).
4. Hero Protagonist. TV Tropes.
5. Villain Protagonist. TV Tropes.
6. MELATI, V. P. (2014). An Analysis on Gru’s Personality Changes in “Despicable Me” Film (Doctoral dissertation, University of Muhammadiyah Malang).
7. Decoy Protagonist. TV Tropes.

外拎

• （英文） 主角，電視橋段網