蘋果日報同壹週刊停刊事件

蘋果日報同壹週刊停刊事件係指喺2021年6月17號，香港警察引用中國共產黨喺全國人大常委會繞過立法會強行訂立嘅港版國安法，拉咗《蘋果日報》5個管理層，令到23號壹傳媒旗下嘅香港媒體，包括《蘋果日報》同《壹週刊》停刊嘅事件。

蘋果員工響蘋果公司最後一日做嘢

啱啱拘捕嗰陣，警察無公佈到底邊啲文章內容犯禁，連正式檢控都未有就凍結壹傳媒幾個唔同嘅銀行戶口說明行動理由^[1]。事件引發到國際嘅關注，英國外相藍轁文、美國總統拜登、台灣總統蔡英文同歐盟先後對事件作出回應，佢哋普遍認為香港嘅言論同新聞自由蕩然無存。

經過

蘋果動新聞平台總監張志偉同警員進行搜證後離開

2021年6月17號朝早，警務處國家安全處人員以港版國安法入面嘅「串謀勾結外國勢力」罪名，拉咗壹傳媒行政總裁張劍虹、集團營運總裁周達權、《蘋果日報》副社長陳沛敏、總編輯羅偉光同埋蘋果動新聞平台總監張志偉5個人，同時帶住法庭根據港版國安法發出嘅手令，搜查蘋果日報大樓^[2]，啲銀行户口都俾保安局凍結，做法嚴重干預蘋果日報運作。事後八個傳媒工會包括香港記者協會、香港攝影記者協會同壹傳媒工會等發出聯合聲明，表示事件令業界引發恐慌，令傳媒同公眾擔心港版國安法被「武器化」。香港新聞行政人員協會亦發聲明表達「關注」，但係聲明同時強調新聞工作者必須守法^[3]。美國、英國外相藍韜文同歐盟先後亦發表聲明關注事件，反映北京利用《國安法》針對異見聲音，遏制香港嘅新聞自由同言論自由。其中美國要求警方立即將《蘋果日報》同佢母公司5名高層釋放，指出勾結外國勢力危害國家安全嘅指控係完全出於政治動機^[4]。

6月19號，英國倫敦Leicester Square有香港人發起集會支持《蘋果日報》同新聞自由

2021年6月19號，英國倫敦有港人發起兩個集會支持《蘋果日報》同新聞自由。下晝1點幾有近50人喺Leicester Square集會，之後遊行至中國駐英國大使館。到下晝2點半，組織「港援（Hong Kong Aid）」喺中國駐英國大使館出面舉行倒蘋果活動，參加者將大批蘋果倒喺倫敦中國領事館門外。集會結束後邀請參與者攞返蘋果返屋企，剩返嘅蘋果會捐畀當地社區組織^[5]。

2021年6月21號，路透社報道壹傳媒創辦人黎智英顧問Mark Simon話，因為啲銀行户口俾保安局凍結，《蘋果日報》已經無門路攞到資金，可能喺幾日內被迫終止運作。到下晝，壹傳媒召開董事會議，表示如果保安局拒絕解凍資金，《蘋果日報》將會喺6月26號最後出版，網上新聞以6月25號夜晚11:59為死線^[6]。6月22號，Mark Simon向自由亞洲電台講，報社好多人收到不明人士嘅恐嚇電話，話港警會再去蘋果總部大樓，拉一百人。佢認為，噉樣顯示大陸統戰部門已經全面出動^[7]。

6月23號，《蘋果》嘅社論主筆楊清奇（筆名李平）都被拉埋，壹傳媒董事响同日大約下晝3點，發新聞稿表示，由於香港當前嘅情況，《蘋果日報》將會結業。去到下晝4點，《蘋果》管理層宣布午夜後即時停止運作。另外，《壹週刊》同《飲食男女》之後亦分別宣布告別讀者^[8]。

6月24號凌晨，《蘋果日報》網站、手機App、facebook同YouTube頻道已經停止更新，facebook和YouTube頻道全面關閉，入面包括《壹周刊》、《果籽》同《飲食男女》等等。網站同手機應用程式亦都分別喺凌晨12:40同凌晨1:30關閉。

內部反應

部分員工枱面凌亂，有搜查過嘅痕跡

• 響蘋果做咗十幾年時政記者嘅陳生話，當日公司畀差人搜查後佢返到office，發覺自己枱上好亂，另外佢同同事用過嘅幾十部電腦同硬碟都畀差人攞走。佢話心入面百感交雜，一方面係對政府嘅狠心表示好嬲，亦覺得香港冇咗蘋果好可惜，但更加嘅係恐懼；又表示自已並唔介意畀差人攞佢部電腦嚟睇，但係覺得差人咁樣不問自取係想整白色恐怖同埋違反新聞自由^[9]。
• 《蘋果日報》副總編輯蔣美紅，佢有份參加蘋果響6月23號執笠嘅呢個決定。佢話本身以為可以捱過十月一號，但係好多高層畀差人拉咗，加上公司大樓又要畀人收，面對咁嘅情形，就「長痛不如短痛」，決定提早執笠。佢又希望蘋果嘅員工之後可以將蘋果日報嘅精神發揚光大，同埋好好裝備自己^[10]。
• 蘋果員工對於有市民響執笠之前到公司大樓為佢哋加油，表示多謝^[11]。

反對聲音

聯合國

人權理事會

• 人權事務高級專員辦事處（英文：Office of the United Nations High Commissioner for Human Rights）發言人話，香港警察突擊搜查《蘋果日報》進一步向新聞自由發出不寒而慄嘅訊息，呼籲香港當局尊重佢哋喺《公民權利和政治權利國際公約》下嘅義務，符合香港基本法，尤其係言論自由、和平集會同結社自由同埋參與公共事務嘅權利^[12]。

 香港

6月18號凌晨，旺角報攤有市民買100份《蘋果日報》

• 好多市民喺《蘋果日報》最後出版嘅一日（6月24號）都走咗出嚟買一份實體支持。而當日《蘋果日報》出版數量達至一百萬份^[13]，部分報攤甚至大排長龍^[8][14]。亦有市民冒著大雨，喺壹傳媒總部面前淚別《蘋果》，高叫多謝《蘋果》，亦有人高叫光復香港時代革命^[14]。佢哋形容，「有啲真相只有蘋果先睇到」^[15]。
• 有啲黃色經濟圈嘅商舖，買入咗唔少《蘋果日報》派畀街坊，或者對出優惠畀當日嘅蘋果讀者。有黃店負責人話，對事件感到心情沉重^[16]。
• 《眾新聞》嘅主要成員楊健興形容事件反映香港人珍惜嘅新聞自由亦已走到末路，又提到傳媒工作者對國安法嘅憂慮，對國安法嘅紅線感到無從把握^[17]。
• 香港記者協會同7個傳媒工會組織發表聯署聲明，形容事件係政權打壓下，先至搞到陪伴港人多年嘅壹傳媒被迫停運，令香港人失去一間敢言、堅持捍衛真相嘅傳媒機構，對事件表示憤怒同悲痛^[13]。
• 民主黨 喺6月24號喺社交媒體發表聲明，感謝堅持到最後嘅《蘋果日報》同記者，多謝佢哋守護新聞自由到最後一刻^[18]。主席羅健熙讚揚《蘋果》一直係敢講說話同埋踢爆政府大話、醜聞嘅媒體，維護公眾利益同埋市民知情權，對香港嘅開放、問責有極大貢獻；又批評警方拒絕交代執法嘅理據，傳媒完全無法掌握國安法嘅影響範圍，但就要面對隨時突然被凍結營運資金嘅可能，嚴重影響新聞自由^[13]。

英國

女王陛下政府

• 外交大臣（英文：Foreign Secretary）藍韜文話，喺香港《蘋果日報》嘅突襲同大搜捕表明，中共正喺度利用港版國安法嚟針對唔同嘅聲音，而唔係解決公共安全問題，新聞自由係中共喺《中英聯合聲明》入面承諾保護嘅權利之一，應該得到尊重^[19][13][20]。

• 亞洲國務大臣（英文：Minister of State for Asia）奈傑爾·亞當斯（英文：Nigel Adams）話，作為《中英聯合聲明》嘅簽署國，中共承諾保護香港嘅新聞自由同言論自由，佢哋必須遵守呢啲承諾，今日摺埋《蘋果日報》係消除反對聲音嘅另一個令人不寒而栗嘅步驟^[21]。

國會

• 跨黨派香港小組（英文：All-party parliamentary group）話，大搜捕係中共強行實施港版國安法一周年嘅「扭曲嘅致敬（twisted tribute）」，又要求外交大臣（英文：Foreign Secretary）藍韜文對侵犯香港人權自由嘅人，施以制裁^[19]。

• 上議院議員奧爾頓勳爵（英文：David Alton）話，香港警察喺朝早突擊搜查入面拉咗《蘋果日報》嘅主編。呢個係無恥同可恥嘅暴行，驚印刷文字同媒體監督嘅無膽鬼行為^[22]。

• 綠黨（英文：Green Party of England and Wales）上議院議員班妮特女男爵（英文：Natalie Bennett）話，會喺英國廣播公司世界新聞頻道（英文：BBC World News）講近排對中共同香港當局打壓法治同言論自由嘅憤怒，企喺香港人一邊比以往任何時候都重要，當然都係時候引用《全球馬格尼茨基人權問責法（英文：Magnitsky legislation）》對中共同埋相關官員實施制裁^[23]。

• 工黨下議院議員斯蒂芬·金諾克（英文：Stephen Kinnock）話，民主、新聞自由同「一國兩制」原則都喺香港被粉碎，英國政府幾時會制裁林鄭月娥同埋收返對喺香港任職嘅英國法官支持，香港需要自由世界，自由世界都需要香港^[24]。

• 工黨下議院議員阿夫扎爾·汗（英文：Afzal Khan (British politician)）話，俾香港嘅消息嚇親，香港警察突襲咗一份民主派報紙，拉咗幾個人，中共以驚人嘅速度拘留同監禁記者，新聞自由係民主運作嘅基本要素，必須得到維護^[25]。

• 工黨下議院議員沙巴納·馬詩曼德（英文：Shabana Mahmood）話，假如英國咁多年嚟無對呢樣嘢發出警告，中共對人權嘅持續踐踏都係咁得人驚。香港人所受到嘅待遇違反國際條約同埋剝奪佢哋所珍視嘅言論自由^[26]。

• 工黨下議院議員柴萍恩（英文：Sarah Champion）話，香港警察喺朝早突襲入面拉咗《蘋果日報》嘅主編，到底係咪需要咁多差佬^[27]。

• 工黨下議院議員巴里·希爾曼（英文：Barry Sheerman）話，可憐嘅中共小獨裁者居然喺香港出動500人拉五個人，約翰遜到底會採取邊啲措施嚟阻止中共違反維護一國兩制嘅莊嚴協議^[28][29]。

• 自由民主黨下議院議員蕾拉·莫蘭（英文：Layla Moran）話，呢個係對香港自由嘅又一次打擊，唔滿足喺侵蝕民主權利，中共正喺度搞死任何夠膽挑戰佢哋嘅獨立媒體^[30]。

• 工黨下議院議員瑪麗·黎默爾（英文：Marie Rimmer）話，又一個令人擔憂嘅發展，英國政府需要做更多嘅事，同埋採取制裁措施嚟保護《中英聯合聲明》，香港同香港人嘅自由需要得到保護^[31]。

• 自由民主黨下議院議員阿利斯泰爾·卡米高（英文：Alistair Carmichael）話，香港新聞自由嘅黑暗日子，雖然英國外交大臣（英文：Foreign Secretary）嘅譴責係正確嘅，但英國而家早就應該採取制裁行動，剩係得把口係唔夠嘅^[32]。

• 保守黨下議院議員施志安爵士話，歡迎藍韜文嘅譴責聲明，但英國需要喺香港嘅民主派報紙《蘋果日報》被迫摺埋呢件事上面即刻採取行動幫助保護權利同自由，中共對英國嘅生活方式構成咗深刻而獨特嘅威脅^[33]。

• 保守黨下議院議員董勤達（英文：Tom Tugendhat）話，《蘋果日報》摺埋破壞香港每個人嘅自由同人民嘅繁榮，對於各地嘅香港人嚟講，呢個係悲傷嘅一日^[34]。

• 蘇格蘭民族黨下議院議員史釗域·麥當勞（英文：Stewart McDonald (politician)）話，同香港人企埋一齊^[35]。

英屬香港

• 前香港總督彭定康勳爵話，大搜捕令人「深深感到失落」，反映中共對香港象徵嘅價值，包括法治、言論自由等，感到恐懼，又話《大公報》同《文匯報》喺佢做港督嗰陣都成日出版假新聞，老屈政府，但香港政府並無嘗試關閉佢哋，呢啲就係生活喺自由社會嘅一面^[36][37]。

美國

聯邦政府

• 總統拜登話，對於香港和世界各地嘅新聞自由嚟講，呢個係悲傷嘅一日。中共嘅鎮壓力度已經去到呢個程度，以至於香港急需嘅獨立新聞堡壘《蘋果日報》而家已經停止出版。通過拉人、威脅同強制通過懲罰言論自由嘅港版國安法，中共堅持行使權力壓制獨立媒體同埋壓制唔同意見。獨立媒體喺恢復活力同繁榮嘅社會入面發揮緊寶貴嘅作用。記者係講真話嘅人，佢哋令領導人負責同埋保持信息自由流動，呢個喺香港同世界各地民主受到威脅嘅地方比以往任何時候都更需要。中共必須停止針對獨立媒體，同埋釋放被拘留嘅記者同媒體高層。新聞業嘅行為唔係犯罪。香港人有新聞自由嘅權利。相反，中共否認基本自由同埋攻擊香港嘅自治同民主制度同程序，呢樣同佢哋嘅國際義務不符。美國不會動搖佢哋對香港人民同所有捍衛所有人應得嘅基本自由嘅人嘅支持^[38][39]。

• 國務卿托尼·布林肯話，對於香港嘅新聞自由嚟講，呢個係悲傷嘅一日，香港人有新聞自由嘅權利，美國仍然堅定不移咁支持香港人民同所有捍衛基本自由嘅人^[40]。

• 國務院發言人（英文：Spokesperson for the United States Department of State）愛德華·普萊斯（英文：Ned Price）話，美國強烈譴責拉《蘋果日報》同埋母公司壹傳媒5名高級行政人員，要求即刻釋放佢哋，同時深切關注香港當局選擇性利用港版國安法任意針對獨立傳媒機構，有關「串謀勾結外國或境外勢力危害國家安全罪」嘅指控，睇嚟完全出於政治動機^[41]。

國會

• 共和黨佛羅里達州聯邦參議員馬高·盧比奧（英文：Marco Rubio）話，中共唔單止拉咗《蘋果日報》嘅編輯，仲打電話俾海外嘅西方銀行家，同埋威脅要拉埋佢哋嘅高層，中共開始拉喺香港做生意嘅外國人只係時間問題^[42]。

• 共和黨佛羅里達州聯邦參議員里克·史葛（英文：Rick Scott）話，美國總統同每個民主國家都應該譴責呢種對香港新聞自由嘅嘔心攻擊，同埋追究中共嘅責任^[43]。

• 共和黨艾奧瓦州聯邦參議員查克·葛雷斯利（英文：Chuck Grassley）話，中共喺香港拉咗民主派報紙《蘋果日報》嘅編輯兼行政總裁，中共從來唔尊重法律，甚至唔會尊重同英國簽訂嘅雙邊條約，點解中共對香港呢塊細土地咁驚^[44][45]。

• 共和黨德克薩斯州聯邦眾議員米高·麥考（英文：Michael McCaul）話，老屈《蘋果日報》編輯係中共對新聞自由嘅公然攻擊，必須即刻停止，美國將永遠同香港人同埋佢哋爭取自由同民主嘅鬥爭企埋一齊^[46]。

• 共和黨科羅拉多州聯邦眾議員肯·巴克（英文：Ken Buck）話，香港特區政府已經向民主同言論自由宣戰^[47]。

• 民主黨加利福尼亞州聯邦眾議員阿米·貝拉（英文：Ami Bera）話，強烈譴責對香港新聞自由同言論自由嘅不斷攻擊。報導新聞唔係同外國分子「勾結」，佢繼續同勇敢為自由同民主而鬥爭嘅香港人企埋一齊^[48]。

• 共和黨賓夕法尼亞州聯邦眾議員布萊恩·菲茨派翠克（英文：Brian Fitzpatrick）話，美國必須堅定不移咁支持香港嘅民主制度，中共取消香港獨特地位嘅活動表明中共對國際義務同承諾嘅故意無視^[49]。

• 共和黨佛羅里達州聯邦眾議員瑪麗亞·埃爾維拉·薩拉查（英文：Maria Elvira Salazar）話，中共政權無停止喺香港對民主同人權嘅攻擊^[50]。

• 共和黨賓夕法尼亞州聯邦參議員帕特·圖米（英文：Pat Toomey）話，利用國家權力扼殺新聞自由係威權政權嘅標誌，美國財政部應該用《香港自治法（英文：Hong Kong Autonomy Act）》制裁侮辱民主嘅中共領導人^[51]。

• 共和黨加利福尼亞州聯邦眾議員、眾議院少數黨領袖凱文·麥卡錫（英文：Kevin McCarthy (California politician)）話，中共向世界承諾將尊重香港嘅民主傳統50年，但係香港主要嘅民主派報紙《蘋果日報》因中共嘅壓迫而停刊，中共唔能夠被信任^[52]。

• 民主黨伊利諾伊州聯邦參議員、參議院多數黨黨鞭迪克·德賓（英文：Dick Durbin）話，中共公然壓制香港嘅言論自由，令佢哋尊重香港自治嘅承諾蒙羞，中共需要明白，呢種對言論自由嘅恐懼損害咗佢哋嘅國際形象^[53]。

• 共和黨俄亥俄州聯邦眾議員史蒂夫·夏波（英文：Steve Chabot）話，香港最後一間民主派報紙《蘋果日報》，喺受到香港特區政府嘅侵略性騷擾後印刷咗最後一版，中共對媒體同香港人嘅攻擊令佢感到震驚^[54]。

加拿大

女王陛下政府

• 外交部（英文：Global Affairs Canada）話，香港《蘋果日報》5名記者被捕係港版國安法被用嚟壓制新聞自由嘅另一個例子，加拿大堅決支持言論同新聞自由，呢樣嘢必須得到香港基本法嘅保障同埋符合國際規範^[55]。

國會

• 保守黨下議院議員莊文浩話，中共對香港嘅鎮壓繼續違反國際法，擺明違反咗1984年簽署嘅《中英聯合聲明》，呢個係一份喺聯合國註冊嘅條約，呢份聲明保證香港自1997年起50年嘅三文治^[56][57]。

澳洲

聯邦政府

• 外交部（英文：Department of Foreign Affairs and Trade）話，澳洲擔心《蘋果日報》嘅記者被捕，同埋呢件事將對香港嘅言論自由產生影響，就好似以《中英聯合聲明》為基礎嘅香港基本法所規定嘅咁樣^[58]。

聯邦議會

• 工黨南澳洲聯邦參議員黃英賢（英文：Penny Wong）話，針對記者嘅襲擊好得人驚，亦係香港喺港版國安法下鎮壓異議一貫模式嘅一部分，新聞自由係對香港人嘅承諾，必須得到尊重^[59]。

 紐西蘭

女王陛下政府

• 外交部長娜奈婭·馬胡塔（英文：Nanaia Mahuta）表示，紐西蘭長期以來一直係新聞自由嘅捍衛者，呢樣對於保護基本人權至關重要，紐西蘭對香港特區政府夾硬摺埋《蘋果日報》感到關切，呢件事進一步侵蝕咗香港嘅權利同自由^[60]。

歐盟

歐洲對外事務部

• 歐洲對外事務部（英文：European External Action Service）發言人話，呢次突襲進一步表明，港版國安法係點樣被用嚟扼殺香港嘅新聞自由同言論自由，香港人嘅所有現有權利同自由必須得到充分保護，包括新聞同出版自由^[13][61]。

歐洲議會

• 歐洲自由民主聯盟黨（英文：Alliance of Liberals and Democrats for Europe Party）議員沃特曼斯（英文：Hilde Vautmans）話，香港自由同自主權已經唔再存在，關心嘅說話仲未能夠恢復香港人被搶走嘅嘢，如果歐盟同美國真係支持民主，佢哋會採取行動包括引用《全球馬格尼茨基人權問責法（英文：Magnitsky legislation）》對中共同埋相關官員實施制裁，或者走去國際刑事法院打官司追究中共通過港版國安法嘅責任^[62]。

• 歐洲綠黨（英文：European Green Party）議員包瑞翰（英文：Reinhard Bütikofer）話，香港嘅新聞自由進一步受到限制，港版國安法係對香港人受保障自由進行任意干涉嘅通行證^[63]。

• 歐洲民主黨（英文：European Democratic Party）議員恩金·艾羅格魯（英文：Engin Eroglu）話，新聞自由同言論自由悲慘嘅一天，作為香港僅存嘅民主派報紙《蘋果日報》，喺中共嘅壓力下被迫摺埋，歐盟將繼續同香港人企埋一齊^[64]。

• 歐洲自由民主聯盟黨（英文：Alliance of Liberals and Democrats for Europe Party）議員居伊·伏思達（英文：Guy Verhofstadt）話，香港《蘋果日報》停刊，係時候採取報復措施，摺埋歐盟嘅社交網絡上面所有同中共有關嘅媒體同新聞機構^[65]。

德國

聯邦議院

• 自由民主黨議員蓋·延森（德文：Gyde Jensen）話，中共對香港新聞自由嘅攻擊加劇，目標係徹底消除批判性輿論^[66]。

丹麥

國會

• 替代（丹麥文：Alternativet）議員宇菲·額利貝克（丹麥文：Uffe Elbæk）話，中共同正常國家唔同，要同佢哋保持距離^[67]。

 愛爾蘭共和國

都柏林市

• 市長朱頌霏（英文：Hazel Chu）話，當《蘋果日報》因為反對香港特區政府嘅立場而被迫摺埋嘅時候，香港人將唔會再擁有新聞自由，對於香港民主嚟講，呢個係黑暗嘅一日^[68]。

中華民國

總統府

• 總統蔡英文話，好遺憾睇見香港《蘋果日報》，喺創辦人黎智英被拉、金流遭斷、高層接連被捕、記者人心惶惶嘅情況下，今天被迫停止營運，出版最後一刊。對九七後嘅香港人嚟講，《蘋果日報》唔只係一份報紙，更係港人不畏強權、渴望民主、追求自由嘅灘頭堡。當媒體被迫忘卻六四，唔再關注維園燭光，《蘋果日報》始終無忘記呢一日。當媒體對被迫自我審查，對反送中示威噤聲，《蘋果日報》始終同爭取民主自由嘅港人同一陣線。當媒體被迫屈從中共安定發展嘅主旋律，《蘋果日報》堅守不屈，為港人嘅心聲道出不平。或者有人認為，呢個係壓垮香港自由民主嘅最後一條稻草，但佢想話俾暗自竊喜嘅威權主義者，自由民主就好似一棵樹，或者可以將佢攔腰斬斷，但種子早已遍灑喺土地嘅每個角落，總有幾粒種子，會生長成另一棵大樹。熱愛自由嘅人應該相互扶持，呢樣係喺疫情當中，台灣喺國際社會中感受到嘅溫暖。此時此刻，國際社會都正企喺港人呢邊，憂慮香港自由民主嘅倒退。佢想再一次話畀香港人：自由嘅台灣，會一直撐著香港嘅自由。都盼望，港人深埋心底對自由民主嘅企盼，有朝一日，能夠令東方之珠再次璀璨^[69][37]。

行政院

• 外交部長吳釗燮（中文：吳釗燮）話，事件係威權主義正對《蘋果日報》發動殘酷戰爭，形容《蘋果日報》係香港自由瀕臨滅絕嘅象徵，自己無法用語言形容目睹呢場悲劇嘅憤怒同悲傷^[70]。

• 大陸委員會（中文：中華民國大陸委員會）話，不斷打壓香港人言論、新聞自由同公民權利嘅惡質行徑，只會搞到港人更加離心離德，令中共同香港嘅國際形象更加不堪。陸委會又指出，港版國安法實施以嚟，香港已拉咗過百人，引發國際社會對佢侵害自由、人權之批評。如今香港特區政府再度動用惡法對付新聞媒體，呢樣喺民主國家實在難以想像^[70]。

立法院

•  時代力量全國不分區（中文：全國不分區及僑居國外國民選區）立法委員邱顯智話，疫情期間，極權政府嘅黑手不會停落嚟，香港特區政府會趁民間自顧不暇、難以團結抵抗或上街表達不滿嘅時候，再次針對香港碩果僅存嘅少數自由媒體搜索、拉人，咁樣嘅大動作不外乎係為咗殺雞儆猴，製造寒蟬效應，瓦解對政府監督嘅可能。佢強調，香港嘅紅色恐怖係現在進行式，除咗聲援之外，亦呼籲台灣政府對於可能面對高度危險嘅香港人，提供更完整政治庇護方案，特別係喺疫情或護照沒收等特殊狀況考慮入去，呢樣都係台灣對正喺度被迫害嘅香港人，少數能做到嘅實質幫助^[70]。

•  民主進步黨臺南市第三選舉區立法委員陳亭妃話，睇到壹傳媒被搜嘅畫面非常心痛，批評中共係邪惡政權，加上港版國安法嘅惡法，為咗各種政治目的，想搜索就搜索，想捉人就捉人，隨時陷人於罪，毫無法治可言。陳亭妃認為香港嘅一國兩制已死，望國際能加大力道聲援香港，都希望台灣人持續關注、支持香港人^[70]。

高雄市

• 市長陳其邁話，感到相當痛心同擔憂，喺世界各國專注防疫同應對新型變種病毒嘅時候，香港特區政府卻持續迫害新聞媒體自由。佢又認為法律唔應成為打壓異己嘅迫害工具，港府應正視人民訴求，唔應該以國家手段干預媒體運作，限縮香港人嘅言論自由。陳其邁又話，反送中運動以嚟，台灣接納好多為生活奮鬥嘅香港朋友，佢話自舊年上任以嚟，已經指示市政府行政單位相互合作，以具體行動令港人喺高雄能夠安心安全咁生活，佢話高雄會持續作為在台港人溫暖嘅後盾，高雄撐香港嘅民主自由^[70]。

臺南市

• 市長黃偉哲話，睇到香港《蘋果日報》嘅董事、總編輯俾人拉，內心覺得遺憾，但諗到呢兩年香港特區政府嘅蠻橫、粗暴，並唔意外，心中無奈嘅係，睇到香港嘅言論自由、新聞自由一點一點咁被腐蝕，一點一點咁喪失，佢呼籲台灣人除咗要引以為戒，更要力挺香港人同香港《蘋果日報》^[70]。

政黨

•  民主進步黨話，香港情勢嘅惡化嚴峻，國際社會應持續關切中共對香港人基本權利嘅侵害。中共從先前施行港版國安法、DQ民主派議席、乃至片面修改香港選舉制度，呢啲行為都已經搞到一國兩制徹底毀壞。國際社會都嚴正關切，同埋呼籲中共停止對港打壓，尊重《中英聯合聲明》等文件，反映中共扼殺香港民主、破壞國際秩序的作為，只會加深國際社會對中共政權嘅唔信任同疑慮。民進黨將持續支持香港人民爭取自由民主嘅權利，繼續照顧同關懷需要協助嘅香港民眾，同時民進黨都會同國際社會一齊，持續密切關注情勢發展^[70]。

•  台灣基進話，香港《蘋果日報》作為香港碩果僅存嘅民主派紙本媒體，對香港民主運動貢獻卓越，香港特區政府呢個做法形同直接將一早已經被上手扣嘅香港新聞自由打入刑場，證明「特區政府」只係中共中央擺飾，境內媒體「必需姓黨」，台灣必須更警惕中共喺黨慶前夕文攻武嚇同心理作戰，同埋同島內代理人唱和，以疫苗為名嘅併吞行為^[70]。

•  中國國民黨嘅文傳會讚揚《蘋果日報》為香港同台灣兩地媒體輿論環境注入活水，增加港台社會嘅多元性，成為監督政府重要嘅力量。佢哋又話唔贊同香港特區政府逼《蘋果日報》停刊，又話幾唔認同《蘋果日報》都好，都要畀媒體發揮第四權嘅功能^[70]。

學者

• 國立中正大學電訊傳播所教授管中祥（中文：管中祥）話，中共對媒體嘅管控愈來愈緊，全世界都冇可能見到政府會用咁粗暴嘅方式控制媒體，形容做法係肆無忌憚、唔在乎民意^[70]。

日本

政府

• 內閣官房長官（日文：内閣官房長官）加藤勝信（日文：加藤勝信）話，批判中共政權嘅香港報紙《蘋果日報》，因為香港特區政府施壓而被迫停刊，極大咁降低咗作為香港民主、安定發展基礎嘅言論同新聞自由度^[19]。

• 外務大臣（日文：外務大臣 (日本)）茂木敏充（日文：茂木敏充）話，香港人越嚟越擔心大搜捕對言論同新聞自由嘅影響，呢樣嘢係香港民主同穩定發展嘅基礎^[19]。

傳媒

• 《產經新聞（日文：産経新聞）》喺6月24號頭版刊登該報記者藤本欣也嘅文章，標題係《朋友、蘋果　等你回來！》，內文形容《蘋果日報》係香港唯一真正批判中共嘅報章，但係就受到打壓而休刊，令香港徹底失去新聞自由。藤本欣又話，唔用「廢刊」而用「休刊」一詞，係因為佢相信香港復活嗰陣，只會係《蘋果日報》向大家宣佈呢件事^[71]。

支持聲音

 香港

傳振中到蘋果日報大樓外慶祝

• 保衞香港運動創辦人傅振中，響四點左右到蘋果日報大樓外開香檳慶祝。佢話，蘋果係假新聞同毒新聞，早就要執笠^[72]。

• 親中派立法會議員葛珮帆批評壹傳媒一直不務正業，長期蝕錢，執笠係遲早嘅事，至今多人涉嫌違反國安法俾政府告，加埋俾差人凍結咗資產，最終摺埋係理所當然嘅^[73]。

後續

• 宣佈停刊之後，管理將軍澳工業邨嘅香港科技園公司宣佈，由於蘋果日報印刷有限公司嘅運作涉及多項違規行為，已經向蘋果日報發出違反契約條款通知，開始收地程序^[74]。
• 唔少媒體同公眾人物都分享自己或其他人被蘋果照妖鏡捕捉到尷尬畫面嘅相，懷緬一下以前有《蘋果日報》嘅舊時光^[75][76][77]。
• 筆名盧峯，之前做《蘋果日報》英文版執行總編輯嘅馮偉光，响2021年6月27號晚喺香港國際機場，準備去英國時，被差人以涉嫌串謀勾結外國或者境外勢力危害國安全罪捉咗。香港記者協會發聲明抨擊政府，話此舉送葬香港新聞自由^[78]。
• 幾個《壹週刊》娛樂組、《蘋果》娛樂嘅員工開設娛樂新聞媒體娛壹^[79]，截止2021年7月底，有超過24萬個追蹤者。
• 喺2021年6月，視麥媒體宣佈，因為香港新聞自由持續受到壓逼，政府以未經香港人同意強行訂立嘅《國安法》名義打壓《蘋果日報》令其被逼停運、《立場新聞》又被迫調整，自己又經常受到不知名恐嚇，決定撤離香港，但維持有自由工作者喺香港採訪嘅做法^[80]。

參考

1. 〈【杜耀明評論】《蘋果》受難見證香港法制的不堪〉。Radio Free Asia (英文)。喺2021-06-27搵到。
2. 警方國安處拘5人並搜查《蘋果日報》將軍澳大樓，香港電台，2021年6月17號
3. 〈【不斷更新】國安處拘壹傳媒 5 高層包括蘋果總編、警入蘋果大樓　凍 3 公司資產涉 1,800 萬〉。立場新聞。2021-06-17。原著喺2021-06-23歸檔。喺2021-06-17搵到。
4. 〈美國強烈譴責香港警方拘捕蘋果日報和壹傳媒高層〉。香港電台。2021-06-18。喺2021-06-21搵到。
5. 〈大批蘋果倒倫敦中國領事館門外　抗議拘捕新聞工作者〉。立場新聞。2021-06-20。原著喺2021-06-24歸檔。喺2021-06-21搵到。
6. 〈【國安拘蘋果高層】壹傳媒董事會周五商討是否停止營運　員工流傳周六或為最後見報日〉。立場新聞。2021-06-21。原著喺2021-06-23歸檔。喺2021-06-21搵到。
7. 〈Mark Simon：《蘋果》員工收電話恐嚇 指港警會再抓100人〉。Radio Free Asia (英文)。喺2021-06-24搵到。
8. 〈眾新聞 | 【蘋果終章】《蘋果》形勢急轉直下 午夜後停運 明出版100萬份〉。《眾新聞》 (中文)。原著喺2021-06-24歸檔。喺2021-06-24搵到。
9. 〈香港《蘋果日報》停刊：這意味著什麼？〉。BBC。2021-06-23。{{cite news}}: CS1 maint: url-status (link)
10. 〈眾新聞 | 【蘋果員工最後感言】「唔會再有第二間蘋果」 大時代堅持繼續當記者〉。《眾新聞》 (中文)。原著喺2021-06-24歸檔。喺2021-06-24搵到。
11. 〈蘋果員工感謝市民到大樓支持 員工派發最後一份報紙 - RTHK〉。news.rthk.hk (臺灣中文)。喺2021-06-24搵到。
12. "U.N. decries "further chilling message" for Hong Kong media freedom". Reuters. 2021-06-18. 原先內容歸檔喺2021-06-21. 喺2021-06-21搵到.
13. 〈國安法下難續 蘋果日報停刊 26年畫句號今印百萬份 學者：港傳媒多元削弱 - 20210624 - 要聞〉。《明報新聞網 - 每日明報 daily news》 (繁體中文)。喺2021-06-24搵到。
14. 〈【蘋果終章．不斷更新】掌聲中編好《蘋果》終章 印 100 萬份 市民旺角排隊等《蘋果》 | 立場報道 | 立場新聞〉。《立場新聞 Stand News》。原著喺2021-09-28歸檔。喺2021-06-24搵到。
15. 〈眾新聞 | 【告別蘋果】市民冒大雨淚別《蘋果》 「有啲真相只有蘋果先睇到」〉。《眾新聞》 (中文)。原著喺2021-06-24歸檔。喺2021-06-24搵到。
16. 〈【蘋果終章】黃店免費派報、推讀者優惠撐《蘋果》 「唔應該無咗呢啲聲音」 | 立場報道 | 立場新聞〉。《立場新聞 Stand News》。原著喺2021-06-27歸檔。喺2021-06-24搵到。
17. 〈眾新聞 | 不同意見變不正常 蘋果日報明日告終 新聞自由走到末路〉。《眾新聞》 (中文)。原著喺2021-06-24歸檔。喺2021-06-24搵到。
18. 〈【🍎再見蘋果🍎】〉。{{cite web}}: CS1 maint: url-status (link)
19. 〈【蘋果終章】英國跨黨派香港小組：對港區國安法一周年「扭曲的致敬」 | 立場報道 | 立場新聞〉。《立場新聞 Stand News》。原著喺2021-06-23歸檔。喺2021-06-24搵到。
20. "Today's raids & arrests at Apple Daily in Hong Kong demonstrate Beijing is using the National Security Law to target dissenting voices, not tackle public security".
21. "As a signatory to the Joint Declaration, China promised to protect press freedom and freedom of speech in #HongKong". 原先內容歸檔喺2021-06-24. 喺2021-06-24搵到.
22. "Hong Kong police arrest editor-in-chief of Apple Daily newspaper in morning raids".
23. "After 2pm going on @BBCWorld to talk about the latest outrage from the Hong Kong authorities against the #RuleofLaw and freedom of speech". 原先內容歸檔喺2021-06-17. 喺2021-06-21搵到.
24. "Democracy, media freedom and the 'one country two systems' principle are all being crushed in Hong Kong". 原先內容歸檔喺2021-06-19. 喺2021-06-21搵到.
25. "Shocked by the news in Hong Kong where a police raid of a pro-democracy paper led to several arrests". 原先內容歸檔喺2021-06-17. 喺2021-06-21搵到.
26. "The continued trampling of human rights by the Chinese state would be shocking if we haven't been warning of this for years". 原先內容歸檔喺2021-06-17. 喺2021-06-21搵到.
27. "#HongKong police arrest editor-in-chief of Apple Daily newspaper in morning raids". 原先內容歸檔喺2021-06-17. 喺2021-06-21搵到.
28. "500 to arrest five in Hong Kong what a pathetic little dictator now rules China". 原先內容歸檔喺2021-06-17. 喺2021-06-21搵到.
29. "What steps is Boris Johnson taking to stop the Chinese from breaking the solemn agreement to preserve one nation two systems".
30. "Statement on the news that Apple Daily is set to close by Saturday". 原先內容歸檔喺2021-06-24. 喺2021-06-24搵到.
31. "Another worrying development". 原先內容歸檔喺2021-06-24. 喺2021-06-24搵到.
32. "A dark day for press freedom in Hong Kong". 原先內容歸檔喺2021-06-24. 喺2021-06-24搵到.
33. "Welcome statement from @DominicRaab but we need to see immediate action to help protect rights and freedoms as #HongKong's pro-democracy paper @appledaily_hk is forced to close". 原先內容歸檔喺2021-06-24. 喺2021-06-24搵到.
34. "The closure of @appledaily_hk undermines the liberty of everyone in Hong Kong and the prosperity of the people".
35. "#StandWithHongKong". 原先內容歸檔喺2021-06-23. 喺2021-06-30搵到.
36. 〈【蘋果終章】彭定康﹕《大公》《文匯》出版謊言 港英也沒關閉它們 | 立場報道 | 立場新聞〉。《立場新聞 Stand News》。原著喺2021-06-23歸檔。喺2021-06-24搵到。
37. 文維廣 (2021-06-24)。〈彭定康：港英時代也沒有闗閉大公文匯 外交部駐港公署促停止干預〉。《香港01》 (香港中文)。喺2021-06-24搵到。
38. 〈為香港《蘋果》停刊發聲 拜登：中國須停止打壓獨立媒體、美國支持不會動搖 ｜ 蘋果新聞網 ｜ 蘋果日報〉。《蘋果新聞網》 (臺灣中文)。喺2021-06-25搵到。
39. "Statement by President Joe Biden on Hong Kong's Apple Daily". 原先內容歸檔喺2021-06-25. 喺2021-06-24搵到.
40. "It is a sad day for media freedom in Hong Kong". 原先內容歸檔喺2021-06-25. 喺2021-06-30搵到.
41. "Department Press Briefing – June 17, 2021 (Hong Kong Excerpts)". 原著喺2021年12月10號歸檔. 喺2021年7月24號搵到.
42. "#China's Communist Party didn't just arrest the editor of Apple Daily they called their western bankers overseas & threatened to arrest their executives". 原先內容歸檔喺2021-06-17. 喺2021-06-21搵到.
43. ". @POTUS & every democratic country should condemn this disgusting attack on the free press in Hong Kong & hold the Communist Party of China accountable". 原先內容歸檔喺2021-06-17. 喺2021-06-21搵到.
44. "China arrests the editor & ceo of the pro democracy newspaper Apple daily in Hong Kong".
45. "Why is a big country like China so fearful of a little bit of land like Hong Kong is".
46. "The illegitimate charges against @appledaily_hk editors are a blatant attack on the free press by the #CCP and must be dropped immediately".
47. "Hong Kong's government has declared war on democracy and free speech". 原先內容歸檔喺2021-06-17. 喺2021-06-21搵到.
48. "I strongly condemn the ceaseless attack on Hong Kong's free press and freedom of expression".
49. "The U.S. must remain steadfast in supporting Hong Kong's democratic institutions". 原先內容歸檔喺2021-06-24. 喺2021-06-24搵到.
50. "The Communist regime in #Beijing has not stopped in its assault against democracy and #HumanRights in Hong Kong". 原先內容歸檔喺2021-06-24. 喺2021-06-24搵到.
51. "Using state power to snuff out a free press is a hallmark of authoritarian regimes". 原先內容歸檔喺2021-06-24. 喺2021-06-24搵到.
52. "China promised the world it would respect Hong Kong's democratic traditions for 50 years". 原先內容歸檔喺2021-06-24. 喺2021-06-30搵到.
53. "China's blatant suppression of free speech in Hong Kong brings shame to its pledge to respect the city's autonomy". 原先內容歸檔喺2021-06-24. 喺2021-06-30搵到.
54. "Today #AppleDaily, Hong Kong's last pro-democracy newspaper, printed its final edition after aggressive gov't harassment".
55. "The arrest of 5 journalists from @appledaily_hk in #HongKong is another example of the National Security Law being used to suppress media freedom". 原先內容歸檔喺2021-06-18. 喺2021-06-21搵到.
56. "The crackdown by Beijing on Hong Kong continues in violation of international law". 原先內容歸檔喺2021-06-17. 喺2021-06-21搵到.
57. "This is a clear violation of the 1984 Joint Declaration, a treaty registered at the United Nations".
58. "Australia is concerned at the arrest of journalists from Apple Daily". 原先內容歸檔喺2021-06-18. 喺2021-06-21搵到.
59. "The targeting of journalists is deeply concerning and part of a consistent pattern of suppressing dissent under Hong Kong's National Security Law".
60. "Aotearoa New Zealand has long been a champion of #pressfreedoms". 原先內容歸檔喺2021-06-24. 喺2021-06-24搵到.
61. "EU and UK say Hong Kong newspaper raid shows China cracking down on dissent". Euronews. 2021-06-17. 原先內容歸檔喺2021-06-17. 喺2021-06-21搵到.
62. "#HongKong freedoms & autonomy are no more". 原先內容歸檔喺2021-06-17. 喺2021-06-21搵到.
63. "Press freedom further restricted in Hong Kong".
64. "A tragic day for #PressFreedom and #FreedomOfExpression".
65. "Hong Kong tabloid Apple Daily to shut down on Saturday". 原先內容歸檔喺2021-06-24. 喺2021-06-24搵到.
66. "Festnahmen bei pro-demokratischer Zeitung". Tagesschau. 2021-06-17. 原先內容歸檔喺2021-06-19. 喺2021-06-21搵到.
67. "My reaction to this shameful act". 原先內容歸檔喺2021-06-17. 喺2021-06-21搵到.
68. "When a paper is forced to close due to it's stance against government then you no longer have free press". 原先內容歸檔喺2021-06-24. 喺2021-06-30搵到.
69. 〈#自由的台灣撐香港的自由〉。
70. 〈國安搜蘋果｜台朝野發聲 外長：香港自由瀕臨滅絕 陸委會稱將使港人更加離心〉。《蘋果日報》。2021-06-17。原先內容歸檔喺2021-06-23。喺2021-06-21搵到。
71. 〈【蘋果終章】《產經新聞》頭版發文﹕朋友、蘋果 等你回來！ | 立場報道 | 立場新聞〉。《立場新聞 Stand News》。原著喺2021-06-24歸檔。喺2021-06-24搵到。
72. 〈【蘋果終章．不斷更新】掌聲中編好《蘋果》終章 印 100 萬份 市民旺角排隊等《蘋果》 | 立場報道 | 立場新聞〉。《立場新聞 Stand News》。原著喺2021-09-28歸檔。喺2021-06-24搵到。
73. 〈黎智英官司纏身〉。hk.on.cc。喺2021-06-24搵到。
74. 科技園收回蘋果日報印刷有限公司將軍澳工業邨土地，明報，2021年6月23號
75. 〈張栢芝反白眼、黃伊汶撞樣小丑最經典！眾星大方重溫「蘋果照妖鏡」相，7年前Coffee認唔到？〉。《GirlStyle 女生日常》 (中文)。喺2021-06-25搵到。
76. 〈又喊又笑：蘋果照妖鏡 | 蔡芷筠 | 立場新聞〉。《立場新聞 Stand News》。原著喺2021-06-25歸檔。喺2021-06-25搵到。
77. 〈#蘋果照妖鏡 | 體路專欄 | 立場新聞〉。《立場新聞 Stand News》。原著喺2021-06-25歸檔。喺2021-06-25搵到。
78. 〈前《蘋果》英文版執總盧峯被捕 記協﹕一介布衣筆墨，如何危害國安？ | 立場報道 | 立場新聞〉。《立場新聞 Stand News》。原著喺2021-06-27歸檔。喺2021-06-27搵到。
79. 〈蘋果終章前員工分別辦新媒體 娛壹冀港人讀娛聞有選擇〉。2021-07-13。原著喺2021-07-19歸檔。喺2021-07-13搵到。
80. 〈winandmac Media宣佈基於安全考慮撤出香港〉。《大紀元時報 香港｜獨立敢言的良心媒體》 (香港中文)。2021-06-28。喺2021-12-09搵到。