自由

  想搵第二個意思嘅話，請睇自由 (搞清楚)。

自由即唔受他人管束，人間自主而行。個意思取自英文liberty，英國、美國講自由，係出自個人獨立。自由屬外在嘅，必定有其他人先講自由，所以有人間，有社會，有政治，先至需要講自由。

自由依個字，同自主好似。自主為英文freedom，好多時又繙佢做自由，混淆不清。自主為內在，自己有意志去做，人天生能力，自主自理^[1]。自由為外在，外在喺人間唔同。

西洋講社會，自由成為政治哲學概念，行自主之時，所言所行，亦都有責任，有後果。

要注意係，法國盧梭講自由，同英美講自由，係兩回事。盧梭講自由，為大眾意志，志在剷平階級，所謂人人平等，同個人無涉。個人受制於大眾意志^[2]。

文

過往英文liberty有種種譯法。至早一八二二年，馬禮遜英華字典，英字解釋為not under the controul of any one，中文寫自主之理。一八四四年，衛三畏英華韻府歷階，自主。一八四七、四八年，麥都思英華字典， 加咗to be left to one's own will，任意擅專、自由得意、由得自己、自主之事，已經見到自由依個字。一八六六到六九年，羅存德英華字典，自主、自由、治己之權、自操之權、自主之理。首見自由單獨咁叫。

然而此後各家，liberty無可避免同freedom炒埋一堆，皆因英文本身就為近義字。

自由

自由係古字，可以上追到後漢書。自有自己同自然之意，自由即行為自然、唔做作、唔被迫。若然見喺古史，多數指王室、達官唔受約束，任意行事^[3]。

西遊記亦有話孫悟空「我等日日歡會、在仙山福地、古洞神洲、不伏麒麟轄、不伏鳳凰管、又不伏人間王位所拘束、自由自在、乃無量之福、為何遠慮而憂也。」自由同自在，意思唔受管唔受束，想點就點。

攷

1. "Difference Between Liberty and Freedom".
2. "Freedom vs. Liberty: How Subtle Differences Between These Two Big Ideas Changed Our World".
3. 〈中文古義的「自由」〉。