From Wikipedia, the free encyclopedia
葉劉淑儀,GBM,GBS,JP(英文:Regina Ip Lau Suk-yee,1950年8月24號—),簡稱葉劉,係香港政府前官員同公務員,第四、五、六、七屆香港立法會議員。2022年7月起,擔任行政會議召集人。
尊貴嘅 葉劉淑儀 議員, GBM, GBS, JP | |
---|---|
葉劉淑儀議員, GBM, GBS, JP | |
香港特別行政區行政會議召集人 | |
現任 | |
就任日期 2022年7月1號 | |
行政長官 | 李家超 |
香港特別行政區行政會議非官守成員 | |
任期 2017年7月1號-2022年6月30號 | |
行政長官 | 林鄭月娥 |
任期 2012年10月17號-2016年12月15號 | |
行政長官 | 梁振英 |
新民黨主席 | |
現任 | |
就任日期 2010年12月15號 | |
副主席 | 史泰祖、田北辰→田北辰→田北辰、潘國山→田北辰、潘國山、容海恩→容海恩、潘國山 |
前任 | 首任 |
香港立法會議員 | |
現任 | |
就任日期 2022年1月1號 | |
選區 | 香港島西選區 |
任期 2008年10月1號-2021年12月31號 | |
選區 | 香港島選區 |
匯賢智庫理事會主席 | |
現任 | |
就任日期 2006年 | |
香港特別行政區行政會議官守成員 | |
任期 2002年7月1號-2003年7月24號 | |
行政長官 | 董建華 |
保安局局長 | |
任期 1998年8月31號-2003年7月25號 | |
行政長官 | 董建華 |
前任 | 黎慶寧 |
繼任 | 李少光 |
入境事務處處長 | |
任期 1997年7月1號-1998年7月 | |
行政長官 | 董建華 |
前任 | 首任 |
繼任 | 李少光 |
人民入境事務處處長 | |
任期 1996年8月-1997年6月30號 | |
總督 | 彭定康 |
前任 | 梁銘彥 |
繼任 | 末任 |
工業署署長 | |
任期 1995年9月-1996年8月 | |
總督 | 彭定康 |
前任 | 俞宗怡 |
繼任 | 何宣威 |
個人資料 | |
性別 | 女 |
別名 | Regina |
出世 | 英屬香港 | 1950年8月24號
籍貫 | 廣東佛山南海區羅村 |
國籍 | 中國(香港) |
政黨 | 匯賢智庫 新民黨 |
配偶 | 葉文浩(1981年結婚;1997年逝世) |
仔女 | 葉榮欣 |
父母 | 老頭劉福成 老母華彩鳳(華綺梨)[1] |
居住地 | 香港香港島中半山[2] |
學歷 |
|
母校 |
葉劉淑儀鄉下響廣東南海羅村。老竇劉福成係星加坡華僑,阿媽華彩鳳係佢老竇嘅妾侍。
葉劉淑儀嚮聖士提反女子中學、香港大學文學院、格拉斯哥大學、史丹福大學畢業。響主權移交前響港英政府做人民入境事務處處長,係香港史上第一個做紀律部隊阿頭嘅女性。特區政府成立後,葉劉淑儀響1998年7月畀嗰時嘅特首董建華委任做保安局局長。
響保安局局長任內,葉劉淑儀嘅政績引起爭議。響處理居港權同《公安條例》修訂等等棘手議題上,有人話佢強硬果斷,係特區唔少得嘅「鐵娘子」。葉劉淑儀曾經係特區政府民望最高嘅局長,但自從佢響2002年9月開始推銷《基本法23條》本地立法以後,由於畀人話佢態度輕佻傲慢,又不時發表大爭議性嘅言論,令佢民望一路跌,至2003年7月1號50萬人上街遊行後,佢民望更跌落谷底,做咗最唔受歡迎嘅政府官員。同時亦有人借用佢其嘅髮型,話佢「掃把頭」。最後《23條》立法擱置,佢自己亦響同年7月16號辭職,成為首批辭職嘅問責局長之一。
落台後,葉劉淑儀去美國進修,2006年學成返香港,而且重新投入政壇,搞匯賢智庫,自任主席,就社會事務發表意見,令外界揣測佢有意競逐2008年香港立法會選舉,以至於2012年香港特別行政區行政長官選舉。至2007年9月27號,佢向外界公佈參加立法會港島選區補選,同包括佢前上司陳方安生等7個人爭補選議席,不過佢輸咗畀陳方安生。
2008年,葉劉淑儀再次喺港島區參選,當選成為香港立法會議員,隨後兩屆,佢亦能成功冧莊。
2011年,葉劉淑儀同田北辰、史泰祖等人創立新民黨,並成為創黨主席。
2011年8月,葉劉淑儀話會「犧牲」自己參選第四屆行政長官[3]。2012年2月20號,葉劉淑儀宣佈參選行政長官選舉,佢認為另外兩位候選人唐英年同埋梁振英都出現嚴重誠信問題,希望參選能夠畀選委同市民多一個選擇[4]。不過佢喺提名截止前未能獲得所需嘅150個提名票,而放棄參選。同年連任立法會議員,之後加入行政會議。
2014年,新民黨同公民力量結盟,而佢就成為公民力量會長。
佢喺2016年香港立法會選舉入面競逐連任成功。同年12月15號,葉劉淑儀正式宣布參選第5屆香港行政長官選舉,但最後無攞到足夠提名。
佢喺2021年香港立法會選舉入面競逐連任成功。
2022年7月,擔任新一屆行政會議召集人[5]。
劉淑儀喺1981年12月10號嫁畀正興建築創辦人葉正平個仔葉文浩,最初係由屋企嘅工人介紹嘅,兩個人只係拍咗拖五個月,但係呢頭婚事受到葉文浩幾個妹嘅反對,葉正平更加向法庭申請禁制令,唔准佢哋兩個用自己個名派帖,最後葉家喺擺酒當日全部缺席[6][7]。
葉文浩個妹葉文心就解釋話,1981年5月阿媽啱啱過身,未落葬就搞喜事唔係太好,但係葉劉堅持要喺嗰時結婚。
1983年,老爺葉正平過身,但佢嘅遺產淨係傳畀葉家嘅三姊妹,葉文浩同大佬葉文山不滿,就向法庭申請遺囑無效,不過法院最後都係判葉家三姊妹贏咗,葉文浩更加因為噉同佢啲妹決裂。到1989年,佢個女葉榮欣出世。
1996年,葉文浩發現有肝癌,年零之後就死咗,之後佢就要寡母婆湊大個女。
葉劉淑儀係香港親中派人士,自2012年起做埋行政會議成員。佢亦曾經唔止一次對歐美國家政府作出錯誤指控。不過,佢喺LGBT權益上嘅問題就比起其他親中派開明,支持佢哋擁有更平等嘅權利。
喺推動香港就基本法23條立法期間,當時做保安局局長嘅葉劉淑儀就曾經話民主幫助希特拉上台,並導致後嚟嘅大屠殺,仲話民主唔係解決所有問題嘅萬靈丹。呢句話當時引起社會嘩然[8][9]。
不過,好多人都會反駁,指責當時希特拉當時所用嘅暴力手段,以及當時所謂嘅民主選舉並無俾到真正人民選擇。
新疆維吾爾族人受到中共嘅大清洗,受到迫害、強迫勞動、宗教歧視等議題,喺2014年起開始受到關注。而美國兩任國務卿蓬佩奧同布林肯,都將中國針對新疆維吾爾族嘅行為定義為「種族滅絕」。但葉劉淑儀就曾經喺Twitter引中國女星迪麗熱巴作例子,質疑呢個說法。另外,喺2021年2月,葉劉淑儀訪問網上群組Save HK嘅創辦人,就再質疑指控無證據[10][11]。
葉劉淑儀喺Twitter嘅言論,當時就受到唔少外媒嘅批評同質疑。《經濟學人》編輯Don Weinland批評,形容佢呢個Post可能係世界上最卑鄙嘅推文。路透社國際新聞編輯Gerry Doyle就反問,黑人音樂巨星Jimi Hendrix係60年代最紅嘅音樂人,係咪咁樣就可以證明當年美國無種族歧視[11][12]。
另外,國際社會因為中共對新疆作出種族清洗嘅行為,對中國進行制裁,有啲時裝品牌亦宣布唔再用新疆棉,引起咗唔細嘅風波。葉劉淑儀亦隨即表態支持新疆棉花,又批評佢自己有用開嘅Burberry品牌對新疆作出失實同無理指控,話要停用Burberry產品[13]。
2016年11月,時事評論員黃世澤喺自己嘅網誌,以及立場新聞,都分別揭發時代生活集團多名管理層對葉劉淑儀、田北俊同容海恩三名新民黨立法會議員,喺2016年香港立法會選舉嘅競選工程入面,捐助近50萬,其中一名管理層葉家明更加係新民黨成員。黃世澤質疑,葉劉淑儀收咗時代生活集團咁多錢,又參與行政會議同立法會發展事務委員會,有利益衝突之嫌[14][15]。
2022年3月25號,葉劉淑儀喺Facebook專頁發布兩則宣稱「霍士新聞踢爆美謊言」嘅帖文,內容轉載佢之前喺《明報》嘅文章,當中宣稱俄羅斯國防部喺3月6號公布喺烏克蘭境內發現由美國資助嘅生化武器實驗室,又話引述美國《霍士新聞》(Fox News)電視節目主持人卡臣(Tucker Carlson)嘅批評以及美國國務院政治事務國務次卿盧嵐(Victoria Nuland)親口承認,證實呢個說法。葉劉淑儀又指控美國傳媒同政府一直欺騙人民。但事實查核實驗室之後驗證,葉劉指所謂親口承認嘅美國官員只係提到烏克蘭有「生物研究設施」,唔等於「生化武器實驗室」,亦冇提到係咪屬於美國或者由美國資助,`更加冇承認烏克蘭有生化武器或生化武器實驗室。事實查核實驗室批評,葉劉淑儀咁做係發表誤導內容[16]。
喺2022年8月,佢曾經公開指控英國議會制度封閉,每區得7-8萬選民,比起香港立法會選區少,幾萬票就贏,以票數計算民意授權,英國國會議員比所有香港立法會議員低。不過香港嘅特首選舉或立法會功能組別選舉,不論係喺北京未經諮詢或香港人同意強行修改之前或之後,都有人只得幾百票,甚至冇競爭對手下當選,但葉劉淑儀就未有提及,言論被一啲人批評[17][18]。
2021年,佢喺李家超無提政綱嘅情況下,有份提名李家超參與2022年香港行政長官選舉[19]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.