花
From Wikipedia, the free encyclopedia
花喺生態系統入面扮演咗重要嘅角色:有好多動物都會食蟲媒花嘅花蜜、花粉同果實(雌蕊受粉之後發育成嘅嘢)維生,包括係蜜蜂、蝴蝶、飛蛾同好多甲蟲[4][5],好多肉食性動物又會靠食呢啲昆蟲維生,例子有螳螂同蜻蜓等食肉昆蟲同埋各種嘅雀鳥;就連人類都會用到花所產生嘅糧食-例如蜜蜂採咗花蜜之後,會將花蜜饟做蜜糖,而蜜糖喺人類社會當中一種相當重要嘅嘢食同調味料,據估計,全世界淨係有機蜜糖嘅總銷售量喺 2017 年經已有成五億美元咁多[6]。
另一方面,花喺人類嘅文化當中亦有相當重要嘅地位:花(尤其係蟲媒花)嘅鮮艷顏色以及多樣姿態令好多人都覺得佢哋好靚;因為噉,花嘅形象常見於畫、文學同舞蹈等嘅文化產物當中[7][8];而且世界多地嘅族群都有用花做裝飾嘅習俗,好似係粵文化噉,粵人傳統喺過年嗰陣會買花返屋企用嚟粉飾家居、增添節日氣氛,而過年嗰時粵人對花嘅需求上漲造就香港同廣州等地一過年就有大型花市嘅盛況[9]。