羅致光

  提示：呢篇文講嘅唔係羅智光。

羅致光，GBS，SBS，JP（Law Chi-kwong，1953年11月1號—），係香港社會工作學者同政客，做過立法會社會福利界議員、扶貧委員會委員、勞工及福利局局長。

羅致光
香港勞工及福利局局長
任期 2017年7月1號－2022年6月30號
前任	蕭偉強
繼任	孫玉菡
香港立法會議員
繼任	張超雄
個人資料
出世	(1953-11-01) 1953年11月1號（71歲）  英屬香港
配偶	已離婚
仔女	有

羅致光響2017年7月1號

簡歷

羅致光祖籍廣東佛山市三水^[1]，畢業於聖公會呂明才紀念小學同埋喺英皇書院完成預科，做過匯豐銀行程式編寫員，喺1981年至2017年期間任教喺香港大學社會工作系（之後改名做社會工作及社會行政學系），期間識咗林鄭月娥，為佢後嚟嘅晉升有好大影響^[2]。佢喺1993年至1997年期間出任呢個學系嘅主任，喺加入政府前係呢個學系嘅副教授。

1990年，羅致光加入香港民主同盟，響1994年香港民主同盟同匯點合併成為民主黨，所以佢就做咗民主黨嘅元老^[2]。佢響民主黨期間，佢專門負責研究政府政策、長期幫手出選舉策略同埋分析民調，因而得到花名「白鴿黨大腦」^[2]。

響1995年至1997年期間，佢曾經出任立法局議員，並喺1998年至2004年期間出任立法會議員^[2]。佢亦曾經擔任多項公職，包括關愛基金專責委員會主席、扶貧委員會委員、策略發展委員會委員同統計諮詢委員會委員^[2]。

2017年，傳聞話香港行政長官林鄭月娥希望佢接任勞工及福利局局長，但係如果佢要做，就要退出民主黨^[3]。而民主黨表示，如果佢真係入政府，民主黨唔會挽留佢，但就相信唔會影響佢同民主黨嘅關係^[4]。6月，羅致申請退黨，民主黨第二日就批准咗^[5]。7月1號，羅致光正式就任勞工及福利局局長^[5]。

由於佢聲稱佢去過丹麥Mensa分會做IQ測試，結果IQ高達160，所以佢有「神童」、「神童局長」嘅外號^[6]。

2022年6月30號，羅致光正式卸任勞福局局長，由孫玉菡接任。

屋企

羅致光曾經結過婚，生咗一個仔一個女，但係最後離婚，離咗婚之後就冇再娶老婆^[6]。

個人榮譽

• 太平紳士（1998年）^[7]
• 銀紫荊星章（2005年）^[8]
• 金紫荊星章（2014年）^[9]

參考

1. 〈隔牆有耳：娥班子最多架己冷 - 李八方〉。《Apple Daily 蘋果日報》。原先內容歸檔喺2017-10-13。喺2020-04-27搵到。
2. 〈【檢閱林鄭班子】 致光IQ稱得上十分之高超 民主黨「大腦」有咩橋？〉。《Apple Daily 蘋果日報》 (香港中文)。原先內容歸檔喺2020-09-08。喺2020-09-05搵到。
3. 〈西環集中營：羅致光入閣隨時亮紅燈 - 季陶〉。《Apple Daily 蘋果日報》 (香港中文)。原先內容歸檔喺2020-09-08。喺2020-09-05搵到。
4. 李大煒 (2017-05-08)。〈【林鄭組班】「大腦」羅致光勢入閣料將退黨 民主黨傾向不挽留〉。《香港01》 (香港中文)。
5. 〈新班子今露面 羅致光昨退黨 - 20170621 - 要聞〉。《明報新聞網 - 每日明報 daily news》 (繁體中文)。原先內容歸檔喺2020年8月22號。喺2020年9月5號搵到。
6. 〈羅致光 IQ160冠港政界 | 蘋果日報 | 兩岸國際 | 20050805〉。web.archive.org。2017-06-29。歸檔時間2017-06-29。喺2020-09-05搵到。{{cite web}}: CS1 maint: bot: original URL status unknown (link)
7. 〈根據《太平紳士條例》(第510章)第3(1)(b)條獲委任的人士(通常稱為非官守太平紳士)〉 (繁體中文)。
8. 〈二〇〇五年授勳名單〉 (新聞稿) (繁體中文)。香港政府新聞公報。2005年7月1號。
9. 〈二〇一四年授勳名單　附件：二〇一四年獲授勳銜及嘉獎人士的嘉許語〉 (PDF) (新聞稿) (繁體中文)。香港政府新聞公報。2014年7月1號。頁 3。

出面網頁

• 〈香港特別行政區立法會 - 議員資料庫〉 (繁體中文)。香港特別行政區立法會。
• 香港網絡大典：羅致光

Template:香港特別行政區第二屆立法會議員 Template:香港特別行政區第一屆立法會議員