浪漫芭蕾舞
From Wikipedia, the free encyclopedia
浪漫芭蕾舞(粵拼:long6 maan6 baa1 leoi4 mou5;英文:romantic ballet)係 19 世紀早期(浪漫時期)嘅法國起源嘅一套芭蕾舞,到咗今日都仲有發展緊。喺技巧上,呢個時期嘅芭蕾舞最大嘅特徵係開始咗使用腳尖企(en pointe),腳尖企指個舞蹈員腳踭離地,淨係用腳尖支撐全身,腳尖企主要係女舞蹈員做嘅,用意係造出輕盈嘅美感。腳尖企嘅出現大大噉影響咗浪漫芭蕾舞嘅發展:腳尖企引起人注意女舞蹈員嘅輕盈性,所以浪漫芭蕾舞好多時以女舞蹈員做主導,會加埋長嘅芭蕾舞裙,突顯舞蹈員柔軟同柔弱嘅氣質。同時,當時嘅科技演進發明咗煤氣燈,能夠用呢種燈比較柔軟嘅光造出一種神秘感。總體上,呢啲發展令浪漫芭蕾舞同古典芭蕾舞風格上有差異-浪漫芭蕾舞零舍陰柔、輕盈、同具有神秘氣氛[1][2]。
![Thumb image](http://upload.wikimedia.org/wikipedia/commons/thumb/a/a6/Pas-de-Quatre.jpg/270px-Pas-de-Quatre.jpg)
除此,浪漫芭蕾舞受到當代盛行嘅浪漫主義(Romanticism)影響,鍾意用帶強烈情感嘅主題做佢嘅美學基礎,啲故仔好多時都圍繞住女性靈異生物點整蠱人類嘅男人[2]。例如係成日俾人攞嚟代表浪漫芭蕾舞嘅《芝莎》(Giselle)噉,就有一幕係男主角意外害死咗女主角之後,俾一班生前俾男人呃過嘅女鬼纏繞[3]。