沙利度胺

沙利度胺，胺一種，化學分子之一，藥一種，學名Thalidomide。今為抗癌藥，然而過去有段時間以反應停出售，藥物造成災難嘅醜聞，各國引以為戒，收緊藥物規例，人稱反應停醜聞。雖然一度停售，然而一直有研究治療其他病。治癌藥就有品名Thalomid，尤其用於治理血癌。另外亦用於醫紅斑狼瘡。隻胺其他名有酞咪脈啶酮、沙利竇邁等。

分子結構，有左旋右旋同構異形體

用作治癌藥

一九五三年瑞士藥廠所發明，本為研究抗生素，後認為無用轉售西德藥廠。藥廠取用研究，並發現對神經有抑制之用，一九五七年推出，品名Contergan，唐字寫做反應停。當初藥為安眠藥，治理失眠、焦慮、緊張，以及害喜，亦即孕吐。喺西德唔使醫生處方就買到。然而藥未有檢驗對孕婦同胎兒影響，幾年之間，造成全球卌六國，過萬蘇蝦畸型，無數胎兒流產。一九六〇年醫生見到畸胎數異常之高，而做調查。雖然未知其關係，據觀察關聯好大，一九六一年十一月廿六日，西德下令停售^[1]。

對畸胎有種種假說，有幾十年研究。去到二〇一〇年得出，有類蛋白質叫小腦蛋白，沙利度胺會同佢結合，影響胎兒成長。小腦蛋白喺細胞內，標記要消除嘅蛋白質，沙利度胺會騎劫咗佢，貼錯標記去其他蛋白度。然而其藥理要到二〇一八年先至完全解開。沙利度胺，以及同系嘅藥，會造胎兒畸型，唔限於外形，連內在器官都有影響。究其原因，此等藥會影響部份帶鋅轉寫因子。當中發育有關嘅因子SALL4，畀藥干擾，視為要消滅嘅蛋白質，搞到喪失功能，以致胎兒發育不良^[2]。之不過實驗常用鼠類，佢小腦蛋白唔會對SALL4有作用，所以用鼠唔會知道有咁反應。由於基因唔同，人、以及靈長類，以及兔會受影響，而鼠同魚就唔受影響。亦顯示動物試藥無事，唔代表人就會無事。

一九六四年，沙利度胺仍禁之際，以色列醫生試用來畀麻瘋病人，減輕佢結構紅斑帶來嘅痛^[3]。效果良好，病人瞓到幾個鐘，而且醒時自己起到身。

攷

1. "Sleep drug banned". The China Mail. 1961-11-27. p. 4.
2. "Thalidomide promotes degradation of SALL4, a transcription factor implicated in Duane Radial Ray syndrome".
3. Silverman WA (August 2002). "The schizophrenic career of a "monster drug"". Pediatrics. 110 (2 Pt 1): 404–6. doi:10.1542/peds.110.2.404. PMID 12165600.