From Wikipedia, the free encyclopedia
武漢肺炎土耳其疫情係介紹「武漢肺炎」2020年喺土耳其嘅爆發情形。截至2020年9月23號,土耳其累計有306,302單確診病例,死咗7,639個人。
呢版要更新,以反映最新情況。加完料之後唔該拎走個模。 |
大部份國土喺亞洲境內,但心喺歐洲嘅土耳其,喺2020年3月11號出現第一單武漢肺炎個案,嗰時有位土耳其籍人士去完歐洲玩返土耳其安卡拉休息時,被檢測到武漢肺炎[1]。出咗第一單個案之後,嗰位病人好快俾當地醫務團隊掟咗去醫院嘅機密地方隔離,即使係0號病人家屬都要接受為期14日嘅隔離醫學觀察[1]。第二日,總統府臨時召開咗緊急會議,宣佈因為出現第一單武漢肺炎個案,從同年月16號開始,國內冚唪唥大中小學都要停課[2][3]。兩日後又收到4單確診武漢肺炎個案[4];嗰日土耳其政府正式宣佈第二日必須要停飛往返德國、法國、西班牙、挪威、丹麥、比利時、瑞典、奧地利同尼德蘭境內嘅航班[5];重宣佈從嗰日開始,國內冚唪唥嘅監倉喺14日內都唔接受家屬探訪或轉移犯人等事務[6]。到3月14號挨晚又收到一單,患者係位清真教徒,佢拜完副朝覲後感染武漢肺炎,嗰時為止淨收到夾埋6單感染武漢肺炎個案[7]。當日政府重宣佈閂埋鄰國格魯吉亞[8]同埋阿塞拜疆[9]嘅邊境。
正因爲前一日喺康雅省康雅嘅副朝覲有大量群眾聚集,從3月15號開始,疫情出現大爆發。第一日,感染案例開始上升到18單,其中有7單屬輸入案例,患者都喺美國玩完返嚟時被確診[10];當日重出現第一單死亡個案,土耳其軍隊前首領艾塔奇亞曼,從伊朗軍事訪問完返到土耳其就死咗[11]。第二日確診病例上升到47單,有好多城市嘅超市出現市民瘋狂搶購廁紙同紙巾等生活物資情況,令銷售貨架一度缺貨。雖然臨近主麻日,但係宗教事務所法定代理處一文勒令:因受疫情影響,全國範圍內冚唪唥凡係涉及宗教拜祭性等聚集活動都唔畀舉辦,所以主麻日活動都停咗[12]。喺康雅省康雅,甚至宣佈停飛往返英格蘭、愛爾蘭、埃及、瑞士、沙地阿剌伯、阿聯酋境內啲航班[13]。
2020年3月17號,確診案例上升到98單,當日出現第二單死亡個案。患者係位89歲嘅老人家,不過具體細節冇公開到[14]。第二日感染個案突破一百大關,並出現第三單死亡個案。患者係位61歲嘅阿公[15]。當日政府出₺100,000,000嚟幫商業公司同低收入人群,重出₺2,000,000,000嚟幫助有需要幫手嘅困難家庭[16][17]。
2020年3月19號,確診案例上升到359單,並出現第四單死亡個案。當日最大嘅教育部門——選擇、測試同實習中心都宣佈打算將國內嘅9個全國性考試延遲[18];體育部門重宣佈國內冚唪唥籃球、排球同手球、足球聯賽都要停辦[19]。到3月20號爲止,感染案例上升到670單,死亡個案開始直線上升到9單。當日醫療部門宣佈全國冚唪唥嘅醫院(計埋私家診所同埋莆田系醫院)至少必須要有兩位同傳染學、胸腔醫學、內科學、醫學微生物學有關啲醫師響度[20];總統府重宣佈國內停止一切公共娛樂活動[21]。喺巴勒基西爾省巴勒基西爾同康雅省康雅、馬拉亞省馬拉亞都唔畀超過65周歲嘅老人家免費搭公共交通[22]。
踏入三月下旬,21號當日,由於確診個案繼續升到947單,死亡個案達到21單。政府亦發佈公告要求宵禁,要求冚唪唥法式蛋糕專賣舖、餐廳同酒樓、飯店等食肆都唔畀喺半夜到第二日天矇光前開業,不過送餐同外賣唔算[23]。喺費拿巴治籃球會,都有好多成員懷疑有疑似武漢肺炎症狀[24]。喺安卡拉、伊茲美爾省伊茲美爾同安塔利亞省安塔利亞都唔畀超過65周歲嘅老人家免費搭公共交通[25][26];土耳其農業森林學部宣佈唔畀喺花園、公園、街頭嘅人行道上搞燒烤[27];連街邊嘅飛髮舖、美容護理舖、衫褲大賣場最多淨畀營業到18:00閂舖[28]。第二日,感染案例打破一千大關,去到1236單,死亡個案去到卅單。土耳其銀行協會宣佈凡係涉及跨國交易嘅國際銀行,淨限喺12:00~17:00營業[29] 。過多一日,感染案例上升到1529單,死亡個案去到37單。一日後,由於疫情繼續蔓延,連喺伊斯坦堡嘅大商場一條街限制淨開兩個出入口嚟畀客流做健康監測出入[30]。
3月26號,感染個案打破三千大關,死亡個案去到75單。國家教育總部宣佈今年嘅高教機構考試延遲到7月25~26號舉辦[31]。
3月27號,感染個案打破五千大關,去到5698單;而死亡個案去到92單。國內有42位醫生同樣感染咗武漢肺炎[32]。正因爲噉,土耳其政府宣佈從月底開始,凡係涉及海灘活動、海邊聚會同冚唪唥形式嘅戶外運動都唔畀搞[33],甚至有部份村莊都要搞封閉式管理[34]。教育方面,連國家教育總部都話今年嘅高教機構考試都唔考第二學期嘅內容[35]。機場亦停飛冚唪唥國際航班[36];甚至連跨市旅遊都要授權批准先至得[36];期間重宣佈閂嗮同森林、遺跡同公園野餐區等公眾場所[36]。
嚟到3月30號,感染個案打破咗一萬大關,死亡個案亦爬升到168單。嚟到月底最後一日重將感染案例上升到13531單,死亡個案突破二百大關。政府重宣佈全國市民唔使繳交三月冚唪唥嘅水電煤氣費、屋租同租車費用[37]。
踏入4月,第一日感染案例已經破咗一萬五千大關,死亡個案去到277單。其中有60%感染武漢肺炎個案都出自伊斯坦堡[38]。醫學部重話疫情期間,有601位醫學工作人士感染咗武漢肺炎,其中有1位醫生死咗[39]。兩日後,由於感染個案超過二萬單,死亡個案破咗五百大關。喺宗古達省宗古達,宵禁範圍重擴大到20周歲以下嘅人士,而且公眾場合都要強制戴口罩[40]。喺伊斯坦堡,地鐵營運方都宣佈從4月6號開始,每日嘅尾班車提早到21:00(UTC+3)收車[41][42][43][44]。喺泰基爾達省泰基爾達,政府宣佈凡係省內冚唪唥交通工具都要停運15日[45]。
2020年4月6號,感染個案打破咗三萬大關,死亡個案亦爬升到649單。政府重宣佈原定國內辦嘅年度節日——國際蘇維埃兒童節都宣佈停辦[46];政府重打算喺伊斯坦堡阿塔圖克國際機場周邊同Sancaktepe學中國北京嘅小湯山噉起間收治超過1000人嘅臨時醫院[47]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.