李成昌

  提示：呢篇文講嘅唔係李成康。

李成昌（1957年10月11號—）係香港男藝人，1979年第八期無綫電視藝員訓練班畢業之後入咗無綫電視做演員，而家都兼任無綫藝員訓練班導師。當年因為拍《香港81》出咗名，亞視同港視都搵過佢過檔，但佢話無諗過離開^[1]。

李成昌
出生日	1957年10月11號  （66歲）
出生地	香港
國籍	香港
職業	演員
[改維基數據]
睇 傾 改

生平

李成昌祖籍廣東省英德市，早年喺九龍黃大仙東頭村23座長大，阿爸係永安銀行職員。李成昌曾經喺中華基督教會基聖學校、九龍城嘉林邊道中西英文書院（初中時參加籃球運動）、九龍亞皆老街已結束辦學嘅香港大同中學讀書，又曾就讀珠海書院（中學部），成績中規中矩。中五畢業後就投考香港話劇團，但考唔到，就去永安銀行工作。佢做過銀行兩年^[2]，之後喺1978年報讀第八期無綫電視藝員訓練班^[3]。後來跟過馮淬帆學做編導^{[註 1]}。

李成昌1979年出道無耐即獲曾勵珍賞識^[4]，加入長壽處境喜劇《香港八一》至《香港八六》系列^[5]，飾演性格樸實嘅內地新移民青年任百康（康仔），因為喺黃金時間播放長達五年，李成昌漸漸畀觀眾認識。《香港八一》至《香港八六》系列喺1986年完結後，李成昌開始喺其他無綫劇集中演出，飾演嘅角色轉為犯罪黑手、精明陰險、幕後軍師之類。到咗後期隨住臉型漸漸變闊，佢開始飾演一些滑稽可笑嘅諧趣角色，較多樣化。李成昌曾演出唔少角色，包括：《秀才遇著兵》嘅么大平（么公）、《我的野蠻奶奶》嘅關勝（甯茂春嘅師父）^[6]、《溏心風暴》嘅常在德、《秀才愛上兵》嘅麥帥、《溏心風暴之家好月圓》嘅麥友恭（表叔恭）、《巾幗梟雄》嘅彭鏗、《回到三國》嘅奸詐小人韓良、《怒火街頭2》嘅無良僱主巫展商、《巴不得媽媽...》嘅莊謹修、《幸福摩天輪》中愛妹情深嘅何英龍（龍哥）等等。

李成昌接受訪問時指亞洲電視同香港電視網絡都有搵佢跳槽，但佢從未諗過離開^[1]。2012年，李成昌喺《萬千星輝頒獎典禮2012》獲頒發「傑出演員大獎」，肯定同嘉許佢喺演藝圈中嘅貢獻同付出。近年兼任無綫藝員訓練班導師。

屋企

李成昌住喺鑽石山，1986年同做銀行主任嘅老婆拍拖，之後喺1993年結婚。二人育有一女，喺2006年出世^[7]。

演出（部份）

• 2005年：秀才遇著兵 飾 幺大平
• 2007年：溏心風暴 飾 常在德
• 2008年：秀才愛上兵 飾 麥帥
• 2008年：溏心風暴之家好月圓 飾 麥友恭
• 2009年：巾幗梟雄 飾 彭鏗

註

1. 關於李成昌家庭背景同埋學做編導嘅資料出自香港電台第二台廣播節目《守下留情》喺2013年11月2號播出嘅訪問。

參考

1. 〈【 李成昌專訪】入行四十年未萌去意 李成昌靠導演責罵開竅〉。《明周娛樂》 (中文)。2019-08-23。喺2020-01-16搵到。
2. 忠奸人 李成昌
3. 〈加入藝員訓練班年期〉。李成昌微博。2015-04-19。歸檔時間2021-05-04。喺2021-05-04搵到。{{cite web}}: CS1 maint: bot: original URL status unknown (link)
4. 〈【TVB服務41年】李成昌為家人安份守己做綠葉 棄爭主角：「長遠地做實力演員」〉。晴報。2020-07-08。原先內容歸檔喺2021-05-06。喺2021-05-04搵到。
5. 〈做人別太佛爺 李成昌〉。東周刊 第884期。2020-07-31。原先內容歸檔喺2021-05-06。喺2021-05-04搵到。
6. 《我的野蠻奶奶》—— 演員李成昌先生的代表作
7. 〈李成昌演活奸角佛爺 惡男現實顧家專一 50歲老來得女感幸福〉。香港01。2020-07-28。

出面網頁

• 李成昌喺香港影庫嘅資料（香港繁體）
• 李成昌喺互聯網電影資料庫嘅資料（英文）
• 李成昌喺中文電影資料庫嘅資料
• 李成昌喺豆瓣電影嘅資料（簡體中文）
• 李成昌喺時光網嘅資料（大陸簡體）
• 香港網絡大典：李成昌
• 李成昌喺tvb.com嘅資料
• 李成昌嘅Instagram頁
• 李成昌嘅新浪微博