明體

明體（中國大陸一般叫做宋體；臺灣有宋體同埋明體兩種叫法^[1]，港澳通常叫做明體），係漢字印刷字體嘅風格類別。最初係喺複刻臨安書棚本嗰陣，將筆畫加以直線化，呈現出硬朗表情嘅一種字體。筆畫有粗幼變化，而且通常係橫細豎粗，末端有裝飾部份（即「字腳」或者「襯線」），點、撇、捺、鈎等筆畫有尖端，屬於白體，不時喺書籍、雜誌、報紙印刷度用嚟做正文排版。

起源

明體係一種首先喺中國明代木版印刷入面出現嘅字體^[2]。

喺中國宋代出現咗活字印刷術，而當時嘅活字字體都係楷書^[3]。宋朝嘅印刷事業有三大產地，即浙江、四川、福建^[3]，而三地嘅楷書字體有各自嘅特點。浙江所出版嘅字體大多數仿製歐陽詢嘅楷書，四川嗰啲大多數仿製顏真卿嘅楷書，福建嗰啲大多數仿製柳公權嘅楷書^[3]。宋敗於金朝後，爲咗翻印留喺北宋嘅書籍，南宋首都臨安嘅棚北大街上建立咗好多出版商，其中有陳起嘅陳宅書籍鋪。陳宅書籍鋪出版嘅書籍有一種甚有特色嘅楷書字體。呢個字體，畀後人仿製，就係現代所謂「仿宋體」，亦係明體嘅基礎^[3]。

有啲喺臨安印刷嘅書籍喺明代翻印，而字體有所改變^[3]。爲咗順應木嘅天然紋理，字體由楷體左低右高嘅斜橫，演變成直橫；又因爲減低損耗，而加粗字體嘅豎筆^[4]。結果，字體逐漸脫離楷書嘅模樣，成爲一種成熟嘅印刷字體，佢嘅橫畫變得直線化，亦有比較固定嘅粗幼變化。後嚟呢種字形特徵，被歸納爲「橫細豎粗撇如刀，點如瓜子捺如掃」，橫末帶有「小三角」^[5]。响公元1553年（嘉靖三十二年）刊刻嘅《墨子》度，明體嘅基礎已經成型^[2]。萬曆年間，呢種字體因爲刊本數量急速增加而普及化，已稱爲而家所認識嘅明體^[3]。

雖然明體逐漸流行，但係由於佢缺少書法上嘅藝術變化，畀明代文人詬病爲「匠體字」。明體字東傳去到日本，日本人稱作明朝體。清朝時嘅印刷亦以明體爲主，連《康熙字典》都用明體，不過同時康熙亦規定改稱呢種刻版字體做「宋體」^[6][5]，導致後嚟喺中文入面，呢種字體嘅名有「明體」同「宋體」之爭。

有啲人傳言話，其實係秦檜發明「宋體字」，甚至話呢種字原名「秦體字」。喺小說《第二幅人體畫》、兒童百科書《萬事由來集成》同埋一啲自媒體嘅影片都搵到呢種講法。不過噉講同事實不符。^[7]

宋陳起編、髙九萬著嘅《菊澗小集》終頁書影，係宋朝臨安府陳解元宅書籍鋪遞刊本。呢種字體而家叫「仿宋體」。

明朝南京國子監版《齊書》書影。呢個時候出現咗「橫細豎粗撇如刀，點如瓜子捺如掃」，橫末帶有「小三角」^[5]嘅明體。

清朝出版《南宋群賢小集》嘅其中一頁，翻刻咗南宋（寶佑四年）嘅榜單。翻刻時彫刻工匠用咗明體字。

發展

日本嘅明朝體（日文：明朝體／みんちょうたい ^Minchōtai），係由於美國人姜別利（William Gamble）响1859年將上海美華書館所製造嘅六種字體傳入日本，並且指導日人本木昌造用電鍍字模製造法所形成嘅字體。因爲佢模仿自明朝萬曆年間嘅字體，所以叫做「明朝體」，日本而家仲沿用呢個稱呼。

現代鉛字採用咗明體印刷。後嚟依據西方文字嘅黑體同埋意大利體嘅方式，創造咗漢字印刷體嘅黑體鉛字。目前宋體、黑體、仿宋體同埋楷體成爲漢字印刷嘅四種主要字體。“明體”係一類字體嘅總稱，有好多字體都屬於呢個範疇。

電腦字體

Windows系統嘅中易宋體（顯示成「宋體、新宋體」，非簡體環境下顯示做「SimSun、NSimSun」）係由北京中易中標電子信息技術有限公司製作嘅簡體字字型；繁體嘅細明體（顯示成「細明體、新細明體」，非繁體環境下顯示做「MingLiU、PMingLiU」）則係華康科技製作嘅明體字型。

Mac入面嘅襯線字體有儷宋Pro（LiSongPro）同埋蘋果儷細宋（LiSungLight）。Linux發行版中使用較多嘅有AR PL 上海宋（AR PL Uming）同埋完全民間開發嘅文泉驛點陣宋體。網絡上仲有民間開發嘅華秀月明字型^[8]、保存傳承字形嘅一點明體（I.明體）^[9]、透過Glyphwiki產生嘅花園明朝體^[10]等。

常見嘅電腦字體

Windows中嘅各種明體字型，由上至下分別爲簡體中文嘅新宋體、正體中文嘅新細明體、日文嘅明朝體。

Windows系統附帶嘅：

• 中易宋體（SimSun，TrueType），簡體中文
• 細明體（'Ming Light' MingLiU），正體中文
• 新細明體（PMingLiU），正體中文
• MS 明朝（MS Mincho），日文
• MS P明朝（MS PMincho, TrueType），日文
• 游明朝（Yu Mincho, TrueType），日文
• 바탕（Batang），韓文

香港政府提供嘅免費字型：

• 明體（Ming_ISO10646）

一般喺Linux操作系統度預裝嘅：

• AR PL 上海宋（AR PL UMing）（自由字型，多個Linux發行版默認附帶）
• 文泉驛點陣宋體
• Takao明朝（TakaoMincho, TrueType），日文
• Takao P明朝（TakaoPMincho, TrueType），日文
• Takao Ex明朝（TakaoExMincho, TrueType），日文

作爲Microsoft Office一部份嘅：

• 華文中宋（stzhongs, TrueType）
• 華文仿宋（stfangso, TrueType）
• HG 明朝 B（HG Mincho B, TrueType），日文
• HG 明朝 E（HG Mincho E, TrueType），日文

作爲Adobe Reader同埋Adobe Acrobat一部份嘅：

• Adobe 宋體 Std（AdobeSongStd-Light, OpenType）
• Adobe 明體 Std（AdobeMingStd-Light, OpenType）
• 小塚明朝 Std（Kozuka Mincho Std, OpenType），日文
• 小塚明朝 Pro（Kozuka Mincho Pro, OpenType），日文

作爲Mac OS操作系統一部份嘅：

• 儷宋 Pro （LiSongPro, TrueType）
• 蘋果儷細宋 （LiSungLight, TrueType）
• ヒラギノ明朝 ProN W3（HiraMinProN-W3, OpenType），日文
• ヒラギノ明朝 ProN W6（HiraMinProN-W6, OpenType），日文
• 游明朝體（YuMincho, OpenType），日文

常見嘅開源字體：

• 思源宋體（Source Han Serif），係Adobe同Google所領導開發嘅開放源代碼字體家族，支持四種不同嘅東亞語言（簡體中文、正體中文、日文同韓文）
• 一點明體（I.明體），由一點字坊製作，透過修改IPA明體而成，以保存傳承印刷明體字形做宗旨。
• IPA明體，衍生自林隆男所設計嘅「TB明體」，由日本IPA以符合開放原始碼促進會開源定義嘅「IPA開放字型授權條款」發佈。
• 花園明朝體，透過Glyphwiki產生而成，目標係收錄所有Unicode字符，尤其是漢字部份。

睇埋

• 傳承字形

參考文獻

1. 中華民國教育部設計嘅字體名叫「教育部標準宋體」，而Microsoft Windows作業系統內建字體名就叫新細明體同細明體，所以喺臺灣有宋體同埋明體兩種嗌法
2. 〈金田欣一：〈宋朝體與明朝體的流變——漢字字體歷史〉〉。原著喺2019年11月6號歸檔。喺2019年11月6號搵到。
3. 金欣堂字庫 互聯網檔案館嘅歸檔，歸檔日期2012年10月4號，.，知る，漢字書體 （日文）
4. 互聯網檔案館嘅歸檔，歸檔日期2019年11月6號，. Justfont：[jf 小詞典] 明體
5. 內木一郎：《宋體非宋》，刊於《Justfont Blog》，2013年9月17日。
6. 康熙十二年（公元1673年），敕廷臣補刊經庵《文獻通考》嘅序文中，規定：「此後刻書，凡方體稱宋體字，楷書均稱軟字」。
7. 〈宋體字是秦檜所創嗎？〉。《搜狐》。喺2020-07-20搵到。
8. 愛漢字字型檔暨資料下載
9. 一點字坊：一點明體（I.明體）
10. 〈花園明朝體：全字符收錄嘅開源日文字體〉。原著喺2019年2月9號歸檔。喺2019年1月23號搵到。