廣府話
香港、廣州同澳門等地所用嘅標準粵語 / From Wikipedia, the free encyclopedia
廣府話(粵拼:gwong2 fu2 waa2),又叫廣東話、廣州話、省城話、白話。佢個名就講明佢係嚟自廣東省城廣州。因為佢係廣東省城(廣府),政治經濟都有特殊地位,所以啲粵語專家都會認為佢係標準粵語。廣府話流行廣州、佛山、中山、香港、澳門,呢啲珠三角地區,廣西、海外都有好多人係講廣府話。因為佢響廣東有特殊地位,唔少人直情叫佢做粵語、廣東話。之不過,「廣東話」呢個叫法同學術上嘅「粵語」定義唔同,廣東重有人講潮州話、客家話。廣東話呢個詞學術上未有定義。粵語方言有好多片,好似臺山話、南寧白話咁,有啲可以同廣州話互通,有啲就好難互通。
不過唔係成個廣州地方講嘅話都係廣府話,以前淨係省城部份係講標準嘅廣府話,出咗城就有差異。後尾英國人響香港起城,香港同廣州有好多商貿來往,廣府話就慢慢代替咗當地粵語分支。而自鴉片戰爭之後,有好多珠江三角洲嘅人來回廣州、香港做嘢。因為咁,廣府話以佢嘅影響力,佢個範圍就擴大好多。另外,廣府地區(粵語粵海片)、韶關、清遠、粵語非廣府地區(粵西)有啲後生仔都識講廣州話,有啲甚至攞廣府話嚟代替自己原有嘅方言作為母語。香港電視,流行曲呢類廣府話流行文化亦加速廣府話擴散。而家講的廣州話同香港粵語其實係同一種語言,只不過表達上因地方唔同,所以會有啲分別,但完全可以理解。