From Wikipedia, the free encyclopedia
北海道 | |
[[File: | |
上:十勝平原 中:洞爺湖、五稜郭 下:宗谷岬,喺藻岩山眺望札幌市 | |
![]() | |
北海道旗 | |
日文 | 🇯🇵 北海道 |
假名 | ほっかいどう |
羅馬字 | Hokkaidō |
政府編號 | 01000-6 |
道廳駐地 | 札幌市 |
區域 | 北海道地方 |
島 | 北海道 |
知事 | 鈴木直道 |
臨近都道府縣 | 青森縣 |
面積 | 83,423.84 km² (第1名) |
人口(2022年1月31號) | |
- 人口 | 5,178,430人 |
- 人口密度 | 61.8人 / km² |
轄下政區 | |
- 郡 | 74 |
- 市町村 | 35市129町15村[1] |
ISO 3166-2 | JP-01 |
道標誌 | |
- 道花 | 玫瑰 |
- 道樹 | 魚鱗雲杉、薩哈林雲杉 |
- 道鳥 | 丹頂鶴 |
北海道廳 | |
- 駐地 | 〒060-8588 |
北海道札幌市中央區北3條西6丁目1番地 | |
- 電話 | +81- 11-231-4111 |
北海道官方網站 | |
![]() | |
喺日本嘅位置 | |
![]() | |
地圖 |
北海道(粵拼:bak1 hoi2 dou6;日文: 發音 (幫手·有關))係日本四大島嘅其中之一,係47個都道府縣中而家唯一嘅以「道」同埋以「支廳」嚟做政治劃分嘅地方。自從日本政府放棄咗庫頁島嘅主權之後,呢度就成為日本最北嘅一個島兼一級行政區。
北海道嘅面積總共有83,423.84平方公里(包括埋有爭議嘅南千島群島在內)[2],係日本面積最大嘅一級行政區。北海道嘅首府係札幌市,成個「道」有35個市、129個町、15個村。2022年嗰陣,北海道嘅人口有518萬[3],係日本最多人口排名第八位嘅一級行政區。
北海道亦可以指嗰個行政區所在嘅島嶼,即係北海道本島,呢度同本州、四國同九州並列做日本本土四大島,成個島面積係77,983.92平方公里,係日本面積第二大島嶼[4],亦都係世界面積第21大島嶼。除咗北海道本島之外,北海道亦管轄有渡島大島、利尻島、禮文島等等呢啲離島。日本對有領土主張但未實際控制嘅南千島群島喺日方行政區劃咗由北海道管轄。
由於北海道係喺近代先至進行開發,所以呢度嘅人口密度遠比日本嘅其他地區係低啲。呢個令到北海道保持到有廣闊而未經過人工干擾嘅自然環境,吸引到一眾遊客去到嗰度觀光。北海道亦都擁有日本四分之一嘅農地,令到嗰度亦成為咗日本提供糧食重要嘅基地[5]。根據品牌總和研究所嘅調查,北海道自2009年開始已連續14年位居都道府縣魅力度排行榜嘅第一名[6]。
北海道嘅原住民阿伊努族喺以前曾將北海道、庫頁島、千島群島等呢啲阿伊努人住嘅地區統稱做
北海道旗同埋北海道徽都係喺1967年5月1號制定出嚟,呢個設計係開拓使時代嘅北辰旗做理念嘅七稜星圖案[9]。 北海道嘅道鳥同道樹分別係棲息喺釧路濕原呢啲地方嘅丹頂鶴同埋喺北海道具代表性嘅針葉樹魚鱗雲杉,呢兩樣嘢都係喺1964年通過道民投票嚟決定[9];而北海道嘅道花係玫瑰,喺1978年通過一般募集而選出嚟[9]。
北海道係喺日本嘅最北邊嘅一個島,南面隔住津輕海峽同本州對望,北面就隔住宗谷海峽同庫頁島相對,西面係日本海,而東面就係千島群島,東北同東南分別係鄂荷次克海同埋太平洋[10]。
北海道本島嘅面積有77,983.92平方公里,係日本除咗本州之外,面積第二大嘅島嶼。北海道喺世界上最大島嶼面積入面排喺第21位,比起愛爾蘭島稍為細啲[11],但係佢又比西班牙島大少少[12],係世界上第21大嘅島嶼。
北海道喺地圖上面呈菱形嘅外形。喺北海道中部嘅石狩低地帶將北海道分咗做東西兩個部分,東邊係主體地區[13]:2,而西邊係半島地區。蝦夷山系係自南方嘅日高山脈開始向北延伸,南北直穿北海道嘅主體地區,喺北海道中部分咗做向東延伸嘅石狩山地、北見山地[14],同埋向西同向北延伸嘅夕張山地同埋天鹽山地。當中石狩山地係北海道地勢最高嘅地區,北海道大雪山最高峰嘅旭岳(標高2,219米)亦都係位於呢個山系[15]。喺呢兩大山地之間係富良野盆地、上川盆地同名寄盆地呢啲盆地。北海道東部地區嘅知床半島呢啲地方嘅山脈係千島弧嘅延伸[8]:34。喺呢個山地以南就係十勝平原同根釧台地呢啲平原。主體地區同半島地區嘅分界線石狩低地帶北起石狩灣,南面去到太平洋,係北海道人口最集中嘅地區。半島地區主要包括渡島半島同道南山地。渡島半島係東北日本弧內帶嘅延長,喺地形同地質上都同東北地方相似。渡島半島地形多山,其中有唔少係火山。
北海道本島附近有幾個離島,好多分佈喺日本海嗰邊嘅地區。北海道嘅主要離島包括渡島小島、渡島大島、奧尻島、天賣島、燒尻島、利尻島同禮文島[16]。
北海道夾埋有13條一級水系嘅河流,喺北海道嘅所有河流入面,數到長度最長同流域面積最大嘅係石狩川。石狩川係日本第三長嘅河流,排喺信濃川同利根川之後,長度達到268公里;石狩川嘅流域面積係14,330平方公里,同利根川爭少少,係日本流域面積第二大嘅河流[17]。石狩川喺以前曾經係一條極易氾濫嘅河流,為咗解決水患問題,日本政府喺明治時期對石狩川進行咗截彎取直,令到石狩川嘅長度縮短咗大約100公里[18]。除咗石狩川之外,天鹽川[19]、十勝川[20]同埋釧路川[21]等等嘅河流亦都係北海道嘅一級水系裡面長度比較長而流域面積大啲嘅河流。
北海道亦都係日本湖泊比較多嘅地區,日本面積前20大嘅湖泊入面有9個都係喺北海道。北海道嘅湖泊大致可以分做兩種類型:一種係火山湖[22],以阿寒湖、摩周湖、屈斜路湖、支笏湖同洞爺湖呢啲湖泊嚟做代表;另一種係海跡湖[22],典型嘅例子包括佐呂間湖、網走湖、能取湖同埋風蓮湖。
北海道除咗道南嘅部分沿海地區係屬於西岸海洋性氣候同埋副熱帶濕潤氣候之外,幾乎所有地區都屬於溫帶大陸性濕潤氣候,淨係得少數高海拔地區符合亞寒帶標準。北海道嘅年均氣溫喺5-10℃之間,年均降水量喺800-1,800毫米之間,北海道嘅氣候同日本嘅其他地區相比,係比較乾燥同涼爽[15]。北海道全年氣候嘅溫差好大,雖然北海道夏季嘅氣候好涼爽,但係冬季嗰時大部分地區嘅平均氣溫可以去到-8℃以下,其中道北同道東地區尤其再凍啲;特別係內陸嘅盆地地區全年溫度變化好劇烈,旭川市曾經喺1902年錄到-41℃嘅紀錄[23],做咗日本嘅寒極;另外,北海道全境都俾日本政府定為豪雪地帶,部分地區仲被指定做特別豪雪地帶[24]。但係北海道呢個地區亦都係日本夏季比較炎熱嘅地區。洋流對北海道嘅氣候帶嚟好大嘅影響,對馬暖流同親潮(千島海流)呢啲洋流會途徑北海道海域。按照氣候特徵,北海道可以分咗做鄂霍次克海沿岸、日本海沿岸、太平洋沿岸東部同埋太平洋沿岸西部四個氣候區[15]。日本海沿岸地區比起其他三個地區氣溫高啲,喺夏季落雨少啲,冬季就受嚟自大陸嘅季風影響而落雪多啲;太平洋沿岸西部地區包括咗自渡島半島南部去到日高嘅太平洋沿岸地區,夏季比較暖啲而且雨水多啲,冬季就相對溫暖而且落雪少啲。太平洋沿岸東部地區包括咗十勝去到根室嘅太平洋沿岸地區,夏季涼爽而且落雨少啲;冬季雖然幾凍吓但落雪亦少啲。呢個地區仲出晒名大霧,釧路市亦有「日本霧都」嘅稱號[25]。鄂霍次克海沿岸地區全年落雨就相對少啲,喺冬季嗰時鄂霍次克海海域會有流冰接近海岸[26],令到北海道成為咗世界上緯度最南又可以見到流冰嘅地區[27]。另外,鄂霍次克海沿岸地區喺夏季容易發生焚風現象[28],因為咁呢個地區喺夏季嗰陣時會出現溫度反而比北海道南部更加高嘅情況。
2018年8月17號,北海道上空因為有冷空氣進入而令到大雪山系黑岳落咗初雪,比平均值提早咗大約一個月,亦都創咗自1974年(昭和49年)以嚟最早降雪嘅紀錄[29]。但喺同年嘅冬季,稚內市同旭川市呢啲地方嘅初雪記錄都比往年平均值大幅延遲咗[30]。
日本同俄羅斯之間存在住南千島群島主權爭議[31]。南千島群島(日本嘅北方四島)指嘅係擇捉島、國後島、色丹島,同埋齒舞群島呢四個島嶼。喺二戰末期,蘇聯派軍隊佔領咗呢個地區[32]。日本認為喺1855年簽訂嘅日俄和親通好條約嗰陣時,條約規定兩國嘅國境位於擇捉島同得撫島之間,得撫島以南嘅南千島群島因為咁就係日本嘅固有領土[33];不過俄羅斯就認為呢四個島俾俄國統治係二戰嘅結果,南千島群島因為咁就理所當然係俄國嘅領土。
南千島群島而家實際上係由俄羅斯統治,而日本自戰後開始就不斷咁對俄羅斯要求歸還返南千島群島[34]。而家日俄之間有舉辦無簽證交流等呢啲活動,嚟去試吓促進北海道人同埋南千島群島嘅俄羅斯居民之間嘅交流[35]。
《日本書紀》裡面提過渡島(即北海道),仲提到同阿倍比羅夫有接觸,喺奈良時代同平安時代已經同出羽國做交易。當時嘅居民同東北地方北部嘅居民一齊俾人叫做蝦夷,呢兩班人可能係同一個民族,而且更可能就係而家仲喺北海道生活緊嘅阿伊努族嘅祖先。
而家嘅考古證據證明北海道自舊石器時代開始就有人類嘅活動。現代喺北海道裡面發現最早嘅考古遺跡,係位於千歳市祝梅嘅三角山遺跡。呢個遺跡發現嘅石器製造距離而家兩萬年之前[36]:10-13;喺北海道亦發現咗繩紋時代嘅土器。但呢個同本州以南地區唔同嘅係,彌生文化仲未傳播去到北海道,取而代之嘅係續繩文文化[36]:23。續繩文文化喺北海道一直持續去到7世紀。喺續繩文文化時代之後,北海道就入咗去擦文文化時期,呢個時代一直持續去到14世紀。擦文文化係北海道地區特有嘅文化,亦都係北海道最後嘅陶器文化時期[37]。喺擦文文化興盛嘅同時,北海道嘅鄂霍次克海沿岸地區就去到鄂霍次克文化時期[38],但隨住阿伊努人逐漸擴大佢哋嘅勢力,鄂霍次克文化最後都俾擦文文化同化咗。
北海道喺14世紀之後就入咗去阿伊努文化時期[8]:20。阿伊努族主要用狩獵同漁業嚟搵食,風俗習慣同和人有好大分別。而家北海道好多地方仲有阿伊努式砦嘅遺跡[39],同一時候,和人自從室町時代開始亦都去到渡島半島嘅南端,仲開始喺北海道定居[40]。和人同阿伊努人之間雖然好頻繁咁展開貿易,但係佢哋兩者之間嘅衝突都唔少。隨住和人移居嘅人逐漸增加,令到和人地嘅面積擴大,和人同阿伊努人之間嘅對立亦都日漸激化。阿伊努人同和人之間喺1457年嗰時爆發咗坷相曼夷之戰;佢哋喺1669年又爆發咗沙牟奢允之戰[41],阿伊努人喺呢場戰爭入面戰敗,從嗰陣起佢哋同和人關係入面完全淪為從屬地位,不過阿伊努人嘅反抗仲未停止過,喺1789年又爆發國後目梨之戰。阿伊努人嘅人口喺呢場戰爭之後開始大幅減少,阿伊努人逐漸由同和人嘅貿易對象轉變做被和人請返嚟嘅一班人,完全被融入咗去和人嘅經濟體系裡面,傳統嘅阿伊努社會就開始解體[42]。
去到江戶時代後期,隨住俄羅斯嘅領土擴張去到遠東地區,北海道近海嘅海域亦開始有時有俄羅斯船出現。俄國對日本曾經要求通商咗好多次,但都俾日本拒絕咗。為咗加強對俄羅斯嘅防衛,幕府派出最上德內[43]、近藤重藏[44]、間宮林藏[45]、伊能忠敬[46]佢哋去北海道、庫頁島同千島群島地區探險,和人亦對北海道嘅地理狀況亦有咗更多嘅了解。幕府喺1799年將東蝦夷地改為幕府直轄地,1807年又將西蝦夷地改咗做幕府直轄地。不過喺俄羅斯嘅威脅減輕咗之後,全蝦夷地喺1821年又重新成為松前藩領地[47]。
1868年(明治元年),明治新政府曾經先後喺蝦夷地設立咗箱館裁判所同埋箱館府,由呢度將北海道地區納入去新政府嘅統治之內[48]。但喺同年嘅12月,舊幕府軍佔領咗五稜郭跟住統治埋北海道地區,佢哋嘅首領榎本武揚宣佈成立蝦夷共和國政權,仲同新政府軍之間爆發咗箱館戰爭[49]。1869年6月,新政府喺舊幕府軍投降之後就正式納入北海道全境,仲令嗰度成為五畿七道之後第8個以「道」嚟做統稱嘅地區,轄下設有11個國同86個郡。
※ 得撫郡、新知郡同占守郡都係日本政府喺1875年庫頁島千島群島交換條約入面攞到得撫島以北嘅千島群島領土之後先至編入。
1869年,新政府喺7月設立咗開拓使嚟打理北海道(箱館府因為咁而被廢咗),北海道喺呢度開始進入咗大規模開發時代[40]。新政府鼓勵無咗份工嘅武士同士族移民北海道,仲為咗加強國防亦設置咗屯田兵制度[50]。除咗政府動員嘅移民之外,亦有自發性嘅大規模移民,佢哋嘅代表例子係帶廣嘅晩成社[51]。同年,明治政府要求幫「蝦夷地」改過個新嘅名,松浦武四郎以北方嘅
※ 註:以前有東海道(東京到名古屋沿線)、西海道(九州)、南海道(四國)、山陰道(本州日本海側西部)、山陽道(神戶經廣島至下關沿線)、北陸道(本州日本海側中部)、東山道(本州東北及中央部)七個道,佢哋都係喺7世紀設置,後來慢慢變成地理名詞。
明治新政府喺1882年再廢埋開拓使,改設函館縣、札幌縣同根室縣呢三個縣嚟取代前者,同埋農商務省北海道事業管理局嚟管理北海道[52]:28-30。但係由於北海道人口分佈唔勻循,搞到三縣一局嘅體制效率唔多好。政府喺1886年(4年後)又決定廢除埋三縣一局,改成由日本內務省直轄嘅北海道廳[52]:31-33。明治政府喺呢個時期請咗一班外籍顧問嚟到北海道,代表人物係札幌農業學校教頭威廉·史密斯·克拉克[52]:38。外國技師為北海道帶嚟咗先進嘅技術同思想,仲培育出好多人才,為北海道嘅現代化過程入面作出咗重大嘅貢獻[52]:36-39。
隨住開拓事業嘅進展,明治新政府嘅政策亦令到好多日本人移民嚟到北海道,北海道嘅開拓工作一時之間喺四周圍都進行緊。喺移居嘅日本人入面,其中又以同北海道氣候差唔多嘅東北地方同北陸地方最多[53],另外四國人亦都喺北海道移民入面有高啲嘅比重[54]:105-114。自1869-1936年嘅呢段期間夾埋約有300萬人移居去到北海道[40]。北海道嘅遼闊土地同煤炭資源令到農業同埋能源產業成為北海道戰前嘅重點開發產業[8]:25。不過殘酷嘅勞動環境同沉重嘅工作量令到北海道成為咗工人運動頻發嘅地區[52]:188-194。北海道喺大正時期受到大正民主浪潮嘅影響,嗰度嘅文化運動興盛,教育亦都日漸普及,北海道帝國大學就係喺大正時期嗰陣成立,呢個時期仲有幾份地方報紙創刊[52]:196-202。北海道喺入到去昭和時代之後,嗰度連續受到金融恐慌同農業恐慌嘅波及。
隨住日本逐步偏重參與二戰,日本開始喺北海道發展軍需產業,仲嚴格管控住言論自由同教育文化領域[52]:239-247。雖然北海道係日本國內喺二戰入面受到空襲少啲嘅地區,但係北海道仍然喺1945年7月俾美軍空襲,室蘭、函館、根室、釧路呢啲都市喺空襲入面嚴重受災[52]:252。
北海道喺二戰末期同啱啱結束嘅初期嗰陣,呢個地方一度陷入咗空前混亂嘅狀態。蘇聯軍隊喺1945年8月佔領咗庫頁島南面同千島群島地區,造成大量難民湧入去北海道,亦遺留咗南千島群島嘅領土問題。史太林曾經提出俾蘇聯以留萌至釧路為界去佔領北海道北部嘅計劃,但係俾美國總統杜魯門拒絕咗[52]:308。美軍嘅先遣部隊喺同年嘅10月4號登陸函館,仲好鬼快咁分駐喺北海道各個地方,北海道就入咗去被同盟國軍隊佔領嘅時期。駐北海道嘅美軍數量最多嗰陣時曾經有24,000-25,000人[8]:27,美軍直到1954年先至全面撤出北海道。
另一方面,北海道成為咗因為打敗仗而喺海外返到去日本嘅日本人其中一個最大嘅移民目的地。喺1945年同1946年,有24萬原本住喺外國嘅日本人移民去到北海道[8]:28,呢個都係為之後嘅北海道嘅經濟發展提供咗大量嘅人手。府縣制喺戰前嘅北海道並唔適用,地方自治體系同日本本土其他地區並唔相同。北海道直到1947年日本國憲法同日本地方自治法公佈咗之後,北海道喺嗰年5月3號起正式用「道」嚟做嗰個行政區嘅名,成為同日本其他都道府縣完全相等嘅自治體[8]:27,仲成立民選嘅道廳(道政府)同道議會。日本政府喺1948年制定咗北海道綜合開發計劃,象徵住北海道進入咗戰後嘅新開發時期[52]:324-330。
北海道喺1960年代之前由於出產煤炭,所以嗰度亦都曾經係日本嘅能源基地[55]。隨住石油成為咗主要能源,北海道嘅礦業喺1960年代之後陷入衰退。公共建設同埋服務業取而代之成為咗北海道嘅經濟支柱[52]:332-334。不過呢個亦都搞到北海道經濟出現咗依賴公共投資嘅問題[56]。
札幌喺1972年舉辦咗冬奧會,呢場賽事大幅提高咗北海道嘅國際知名度,亦都令北海道嘅基礎設施建設有咗飛躍性嘅進步[57],不過依賴公共投資嘅經濟模式就搞到北海道嘅經濟發展喺1980年代之後逐漸慢落嚟。1970年代嗰陣時,北海道嘅經濟成長率同日本全國嘅平均水準都叮噹馬頭。但係入到去1980年代之後,北海道嘅經濟成長率同日本全國嘅平均水準嘅差距日益咁增加[8]:29。
北海道最大嘅銀行北海道拓殖銀行喺1997年破產[58],為北海道經濟帶嚟嚴重打擊。而家嘅旅遊業、商業、資訊產業呢啲新產業成為咗北海道發展比較快嘅行業[59],但係北海道仲面對住人口減少同轉變產業結構等等好多議題。
增加
7.5 - 10.0 %
5.0 - 7.5 %
2.5 - 5.0 %
0.0 - 2.5 %
|
減少
0.0 - 2.5 %
2.5 - 5.0 %
5.0 - 7.5 %
7.5 - 10.0 %
10.0 % 以上
|
北海道係日本人口密度最低嘅地區,截止2014年為止,每平方公里只有人口約66人[60]。
北海道嘅人口喺1884年嗰陣時只係有227,900人,係日本人口最少嘅行政區[61]。後嚟隨住移民嘅大量流入,北海道人口增加得好急。北海道有人口喺1908年嗰陣時有1,322,400人,升到去日本第10位[61];北海道喺1920年嗰時人口有2,359,183人,排名日本第三[61]。戰前嘅北海道同關東地方、近畿地方並列做日本三大人口流入地區,人口流入率仲去到47.1%,超過咗關東地方嘅12.9%同近畿地方嘅14.3%好多[8]:24。戰前移民北海道嘅人口入面以東北地方出身者最多,其次就係北陸地方,兩者都係喺地理位置同風土氣候比較接近北海道嘅地區[8]:51。喺二戰啱啱完咗嗰陣時,由於大量人口喺外國湧入嚟,北海道人口喺短時間內劇增。北海道嘅人口去到1945年嗰陣時有3,518,389人,曾經係好短暫咁係日本嘅首位[61]。不過北海道人口嘅增長速度喺戰後遠低過日本平均值。1959年嗰陣時,北海道人口曾經佔日本全國總人口嘅5.40%,但係喺2000年嗰時,呢個數字已經降到去4.48%[8]:51。北海道人口數喺1997年去到569.9萬人嘅高峰值之後持續咁跌返落嚟[62]。2014年嗰陣時,北海道人口夾埋大約有544萬人,預計喺2040年嗰時,北海道嘅人口可能只有419萬人[63]。造成北海道人口減少嘅主要原因係由於北海道嘅生育率低過日本嘅平均水準。北海道嘅總和生育率自從1967年開始就低過日本平均值,北海道嘅總和生育率喺2013年就只有1.28(日本平均值係1.43),只係高過東京都同埋京都府,排喺日本倒數第三名[64]。北海道亦都係日本生育年齡人口比例低啲,老齡人口比例高啲嘅地區[65]。另外,北海道喺1960年代開始,嗰度由人口流入地變咗做人口流出地,亦都係搞到北海道人口增長減慢嘅重要原因[66]。
喺人口分佈嚟睇,北海道嘅人口高度集中喺中部嘅石狩平原地區。札幌市嘅人口超過190萬,集中咗北海道1/3以上嘅人口[60]。實際上喺1940年之前,函館同小樽嘅人口都曾經超過札幌市嘅人口[67],但係戰後以嚟,北海道人口去札幌集中嘅趨勢越嚟越明顯,札幌所在嘅道央地區亦都成為咗北海道人口最多嘅地區。同嗰度相對嘅係煤礦相繼執笠關閉嘅空知綜合振興局就成為咗北海道人口減少幅度最大嘅地區[61]。喺人口密度嚟睇,除咗石狩平原之外,旭川盆地同埋道南嘅沿海地區亦都係北海道人口密度高啲嘅地區,而面積廣大嘅道北同埋道東地區嘅人口密度就低啲,日高、留萌、宗谷、檜山,同埋根室呢五個振興局一直都係北海道人口最少嘅地區[61]。城市人口比例高啲都係北海道人口分佈嘅一大特徵。北海道人口頭十位嘅都市(札幌、旭川、函館、釧路、苫小牧市、帶廣、小樽、北見、江別市、室蘭市)嘅合計人口佔北海道總人口嘅接近2/3[60]。喺人口遷移方面,北海道而家每年向道外流出嘅人口接近萬人,但道內嘅人口遷移數超過20萬人[65],道內移動率遠遠咁超過道外移動率。北海道除咗札幌市所在嘅石狩振興局之外,所有振興局同綜合振興局都呈現人口流出嘅狀況,顯示出北海道人口去札幌集中嘅趨勢[65]。
北海道喺少數族裔方面,嗰度係日本唯一嘅阿伊努族聚居地。阿伊努人係北海道嘅原住民,但喺江戶時代中後期之後,佢哋嘅人口數大幅減少而且受到和人同化,佢哋嘅民族特徵嚴重被淡化。北海道喺1873年嗰陣時人口有111,196人,其中阿伊努人有16,272人,阿伊努人當時佔北海道總人口嘅14.63%[52]:211,但係而家北海道嘅阿伊努人嘅人口淨係得返23,782人[68]。就阿伊努人嘅人口分佈嚟睇,以日高支廳嘅阿伊努人嘅人口數量最多,係有7,530人,佔日高支廳總人口嘅9.2%;其次係膽振支廳,阿伊努人嘅人口有6,622人。呢兩個支廳嘅阿伊努人人口佔北海道嘅阿伊努總人口59.5%[68]。除咗呢兩個支廳之外,石狩支廳同釧路支廳都係北海道阿伊努人口較多嘅地區。除咗阿伊努人之外,北海道仲有少數俾被蘇聯喺樺太廳驅逐而嚟嘅鄂羅克人同尼夫赫人喺嗰度生活[69]。此外北海道喺2018年嗰時仲住咗有31,726個喺日本嘅外國人[3]。喺日本外國人嘅人口入面,以在日中國人最多,其次就係在日韓國·朝鮮人。另外北海道仲有一定數量嘅在日菲律賓人同埋在日美國人喺嗰度住[70]。
北海道有好多地名都係由阿伊努族原住民嘅語言轉過嚟嘅,但係後嚟又用漢字嚟轉寫原住民語,造成咗北海道有好多好難用漢字嚟判斷發音嘅難讀地名,好似係「…內」、「…別」嘅地名喺阿伊努語入面即係近沼澤、河川嘅地方,北海道首府「札幌」等等亦都係由原住民語轉變而嚟。
由於北海道嘅面積遼闊,北海道政區嘅劃分系統同日本其他嘅一級政區略略有啲不同。根據日本地方自治法第155條第1項,北海道喺道同埋市町村級政區之間設有支廳(第二級政區)嚟提高行政效率[71],各支廳下面有市、郡、町、村(但唔包括北方四島)。北海道議會喺2008年6月通過法律,將北海道嘅14個支廳改成9個綜合振興局同埋5個振興局[72]。原定將綜合振興局作為振興局嘅上級機關,但係引發被降格做振興局嘅地區表示反彈[73]。北海道議會喺2009年3月修改法律,規定綜合振興局同振興局係相同等級嘅行政單位,不過綜合振興局可以依相關條例嘅規定嚟代管同佢相鄰嘅振興局轄下廣域[74]。喺支廳改咗做綜合振興局同振興局之後,除咗網走支廳改名做鄂霍次克綜合振興局之外,其他支廳並未改名。另外,幌延町由留萌支廳改劃入咗去宗谷綜合振興局,幌加內町由空知支廳改劃入咗去上川綜合振興局[72]。北海道而家管轄9個綜合振興局同埋5個振興局,仲有74個郡,市町村一共有180個(35個市、130個町、15個村)。
雖然從來都無明確嘅定義,但係北海道通常都會被劃分做四個地區:
因為北海道範圍廣大,好多情形下只列出町村名或者郡名係唔容易俾人知道確實嘅位置,因為咁就會用支廳名嚟做輔助,例如喺新聞度會用「網走管內嘅XX町」。
另一方面,北海道廳將北海道分成六個「地域生活經濟圈」。又喺上文提到,面積較寬廣嘅「道東地方」分咗做三個唔同嘅生活經濟圈:
北海道喺行政上係「道」,亦都係日本目前唯一嘅道,雖然並唔係正式嘅政區,喺地理上一般好多都係將北海道分做道東、道南、道北同道央四個地區。道東包括根室振興局、鄂荷次克綜合振興局、十勝綜合振興局同釧路綜合振興局;道南就包括渡島綜合振興局同埋檜山振興局;道央包括石狩振興局同日高振興局呢兩個,仲有空知、膽振同埋後志呢三個綜合振興局;而道北就包括留萌振興局,仲有上川同埋宗谷綜合振興局[75]。另外,北海道有時會將日高振興局同膽振綜合振興局劃入咗去道南而唔係道央[75];道東就因為面積龐大而有時會被再細分做鄂荷次克(鄂荷次克綜合振興局)、十勝(十勝綜合振興局)、釧根(釧路綜合振興局同埋根室振興局)呢三個地區[76]。
以下就係各個振興局同綜合振興局嘅位置同數據:
|
註:根室振興局所管轄嘅部分區域係喺位於日本未實際管轄嘅南千島群島。根室振興局括號內嘅面積包括咗南千島群島(5003.05平方公里)嘅面積。
根據北海道支廳設置條例,支廳嘅管轄區域係只有每個郡所管轄嘅地區,並唔包含市,不過實際上支廳嘅業務亦確實喺各市嘅區域內執行,因此一般都將各市當係支廳嘅管轄區域。
北海道喺日本眾議院實施中選區制嗰陣時曾經劃分做5個中選舉區,擁有23個議席[77]。日本改咗去實施比例代表制同小選區制之後,北海道而家擁有12個細嘅選區[78],北海道同時仲有8席比例代表議員席次。
北海道曾經有「民主黨王國」嘅稱號[79],改成小選區制之後,日本民主黨長期以嚟喺北海道佔咗優勢。就選區選舉嚟睇,北海道第1區、北海道第8區、北海道第9區同埋北海道第10區喺2012年之前歷任當選議員都係民主黨人[80]。喺北海道第2區同北海道第6區,民主黨候選人嘅當選次數都超過咗日本自由民主黨[80]。民主黨和自民黨候選人喺北海道第3區嘅當選次數平分秋色[80]。自民黨喺北海道第7區就略佔優勢[80],而民主黨嘅候選人喺北海道第5區、北海道第11區同北海道第12區只係當選過一次,自民黨喺呢啲地方有壓倒性嘅優勢[80]。喺第45屆日本眾議院議員總選舉嗰陣時,除咗北海道第7區之外,所有選區都係民主黨候選人當選[81]。不過喺2012年嘅第46屆日本眾議院議員總選舉嗰陣,民主黨喺北海道遭遇全軍覆沒[82][83][84]。民主黨喺2014年眾議院選舉嗰陣時亦都淨係喺3個選區攞到議席,而自民黨就喺8個候選區贏咗[85]。2017年眾議院選舉嗰時,自民黨喺北海道贏到6個選舉區議席,民主黨就繼承政黨之一嘅日本立憲民主黨贏咗5個小選舉區嘅議席,而公明黨就贏得1個選舉區議席[86]。佢哋喺2021年眾議院選舉亦維持咗呢個數字[87]。而喺比例代表方面,民主黨自2000年眾議院總選舉開始去到2009年眾議院總選舉為止,佢哋喺北海道得到嘅比例代表議席同埋得票數都一直超過自民黨。但係喺2012年嘅眾議院總選舉嗰陣時,自民黨喺北海道攞到嘅比例代表議席同埋票數第一次超過咗民主黨。自民黨喺2017年同2021年眾議院選舉嗰時都維持咗北海道裡面比例代表第一大黨嘅地位[88][89]。
喺日本參議院選舉方面,北海道選舉區有四個議席,嗰度係日本嘅參議院選舉區入面面積最大嘅二人區[90]。北海道選舉區喺以前就係日本社會黨得票比較多嘅選舉區。民主黨喺1990年代中期之後繼承咗社會黨嘅大部分票源,喺參議院選舉入面亦佔咗優勢。自1998年第18屆日本參議院議員通常選舉以嚟,北海道選舉區嘅咁多次選舉都係由民主黨同自民黨共同瓜分咗兩席嘅議席。值得一提嘅係,除咗自民黨同民主黨等等呢啲全國性政黨之外,北海道都有淨係喺北海道搞政治活動嘅地區性政黨—新黨大地[91]。
喺地方自治方面,戰後嘅北海道呈現保守同革新勢力交替執政嘅局面。1947年4月北海道第一次嘅知事選舉嗰陣時,由革新系嘅田中敏文當選[52]:309,佢仲連任咗兩次[92],佢一直任職去到1959年。同時帶廣、釧路、旭川、北見等等呢啲北海道裡面嘅幾個比較大嘅都市都係由革新派人士嚟執政。不過喺第四次知事選舉嗰時,保守系嘅町村金五當選[92]。町村之後繼任知事嘅堂垣內尚弘都係保守派人士[52]:338-340[92]。但喺同時,革新勢力仍然喺幾個都市有執政嘅地位。1973年嗰時,北海道嘅33個市入面有14個市係由革新系市長執政[8]:28。橫路孝弘喺1983年當選北海道知事,令到北海道再由革新派人士執政[92]。橫路孝弘嘅繼任人堀達也喺政治路線上面都傾向革新派。2003年,得到自民黨支持嘅高橋春美喺北海道知事選舉入面當選,仲擔任呢個職位去到2019年[92]。前夕張市長鈴木直道當選做北海道知事[93],佢喺2023年成功連任[94]。
北海道議會而家一共有100個議席。北海道議會入面,自民黨擁有49席議員,係最大嘅黨派;其次係擁有23席議員嘅立憲民主黨。另外公明黨同埋日本共產黨等等呢啲政黨亦都喺北海道議會有議員[95]。北海道嘅財政狀況極為嚴峻。北海道的實質公債費喺2013年度嘅比率去到21.7%,排喺日本嘅首位[96]。
自1980年代開始,北海道嘅經濟增長率就長期低於日本平均水準[8]:83。北海道嘅道內生產總值喺1996年嗰陣曾經去到20.9兆日元,但係喺1997年爆發北海道開殖銀行破產事件之後,北海道經濟就陷入咗長期蕭條[62]。同日本嘅其他地區相比,製造業佔北海道經濟嘅比重低啲,而服務業就喺北海道經濟入面有重要嘅地位[97]。
2000年嗰時,按北海道裡面總生產嘅產業構成比率嚟計,第一級生產佔3.3%,第二級生產佔22.4%,其餘嘅第三級生產就去到76.7%。北海道第一級生產同第三級生產同全日本嘅數據嚟相比,呢兩個比率高啲,第二級生產特別係製造業嘅比率就細啲。
北海道喺2011年嘅人均道民收入係¥2,475,000日元,排名日本第36位,低過日本平均水準[59]。北海道喺2014年嘅道內生產總值約係¥184,846億日元[98]。
北海道被睇成係日本本土嘅糧食基地,嗰度擁有日本全國四分之一嘅農地[99],以農業為主體嘅生產結構。北海道嘅糧食自給率喺2010年嗰陣時去到173%(按熱量單位嚟計),排喺日本第一[100]。北海道嘅農業生產金額喺2012年達到¥10,536億日元,同樣高踞日本第一位[101]。北海道係日本好多農產品最大嘅產地,包括咗小麥、大豆、薯仔、紅菜頭、蕎麥、洋蔥、南瓜、粟米、牛奶、牛肉,同埋輕種馬等等[102]。由於北海道嘅面積遼闊,每個地方嘅自然條件差異好大,唔同地區嘅主要農產品因為咁就非常之唔一樣。道南地區同埋後志綜合振興局以畜產品、蔬菜、果樹等等呢啲集約型農業比較發達啲[102]。中部嘅石狩振興局、空知綜合振興局裡面嘅平原地區同上川綜合振興局裡面嘅盆地地區係日本重要嘅稻米種植區,呢啲地區生產主要嘅稻米品種包括咗「星之夢」同埋「七星」等等。另外呢個地區都生產咗唔少蕎麥、蜜瓜、洋蔥、紅菜頭等等嘅農作物[102]。鄂荷次克綜合振興局同埋十勝綜合振興局就係日本最大嘅旱田地帶,主要生產小麥、粟米、薯仔、豆類等等農作物[102],而宗谷綜合振興局、釧路綜合振興局同根室振興局雖然因為氣候過於涼而唔適合耕種,但嗰度就係日本最大嘅大規模乳業地區,一群群嘅乳牛係呢啲地區最常見嘅風景[102]。日高振興局就出名生產輕種馬[8]:91。
2002年,北海道每戶農家嘅平均耕地面積達到16.9公頃,係日本其他都城府縣嘅13倍。除咗土地寬廣之外,北海道大規模發展初期,各地喺對應氣候嘅條件同埋喺農村兼營嘅機會都好少,好多農民接收周圍嘅棄耕地嚟擴大規模都被認為係主要原因。喺農業生產額當中畜牧生產佔嘅比例高達45%。2003年嗰時,特別係釧路支廳同根室支廳呢兩個地方每戶農家嘅平均耕地面積就達到60.3公頃,佔北海道總農業生產額嘅12.2%,奶用牛嘅生產量都幾大吓。小麥同薯仔呢啲等等嘅耕種旱田同全國相比亦比率高(亦都貴啲),而紅菜頭、薯仔同小麥等等全國優良品種多啲。日高支廳係英國產良種馬呢啲輕種馬嘅養育基地。
北海道地處寒暖流交界處,係絕佳嘅漁場。北海道嘅漁業喺江戶時期嘅鯡魚捕撈業開始[52]:129,去到明治時代,北海道日本海沿岸對北海道嘅水產業嘅依存率高嘅以鯡魚為首(貴)。自此之後,喺堪察加海上,白令海上面嘅北洋漁業有飛躍性發展,造就咗北海道太平洋沿岸水產業嘅發展。由於寒流親潮同暖流黑潮喺北海道嘅島嘅附近不斷咁交滙,形成咗出名嘅四大漁埸之一嘅北海道漁埸。1977年,北海道嘅200海里水域被設定做遠洋漁業中心,對北海道嘅漁業造成極大損害。即使係咁,北海道仍然係卸貨量佔全國高達25%嘅漁業王國,水產業就係北海道第2大發達嘅行業,當中遊客喺北海道大量買入帆立貝、蟹同埋海膽等等呢啲水產物,為北海道嘅水產業旅遊產業嘅發展作出咗重大貢獻。釧路市係北海道水產卸貨量最大嘅城市,自1990年起就連續13年成為世界第一嘅水產卸貨量港口。
而家嘅水產業亦都喺北海道農業入面佔咗重要嘅地位。北海道嘅海面漁業養殖量同生產量、漁業經營體數、漁業從業者數目同漁船數都係日本第一[103]。按照主要唔同嘅水產品種類,北海道嘅漁業可以分為日本海地區、鄂荷次克海地區、太平洋東部地區同埋太平洋西部地區呢四大地區[103]。北海道主要嘅水產品有大馬哈魚、阿拉斯加鱈、秋刀魚、墨魚、帆立貝等等[104]。北海道森林嘅覆蓋率達到71%,高過日本嘅平均水準,[105],係日本林業比較發達嘅地區。
北海道嘅製造業喺明治時期嘅官營工廠開始。由於北海道擁有好豐富嘅林業資源,造紙係北海道發展得比較早嘅工業。另外鋼鐵、化工、機械等等嘅產業亦都喺戰前就開始發展[8]:110。北海道嘅工業發展喺進入戰後嗰陣仍然係好大程度上受到政策嘅左右。喺1950-1970年代,大規模重化學工業成為咗北海道工業發展嘅龍頭;而汽車零部件同電子產業喺1980年代之後開始抬頭[8]:111。2014年,北海道工業從業人口超過咗16萬人,工業品生產額有¥66,728億日元[106]。
北海道工業嘅其中一個特徵係食品、飲料呢啲地方資源型工業嘅比重大啲,而機械製造等等加工組裝型工業嘅比重低啲[107]。北海道而家嘅工業部門入面,以食品、木材、造紙、鋼鐵、重化學等等嘅產業比較重要。其中食品產業產值佔北海道工業總產值嘅三成,係北海道工業體系入面規模最大嘅產業[108]。就住北海道嘅工業地理嚟睇,道央地區係北海道最重要嘅工業區。道央地區嘅工業產值佔北海道總量接近三分之二[108]。室蘭市係北海道工業產值最多嘅城市,之後依次序就係苫小牧市、札幌市、釧路市同千歳市[108]。為咗促進北海道製造業嘅發展,北海道政府曾經先後推出以汽車、機械、化工呢啲產業為主嘅苫小牧東部開發計劃[109]、以信息技術產業為主嘅札幌創業創出特區[110]等等產業特區政策,期待可以促進到北海道產業嘅自立。
生產方面:
北海道嘅礦業曾經都非常之發達,入面又以煤礦最為重要[55]。北海道嘅礦業由明治時代開始去到高度增長期,以石狩煤田同釧路煤田等等幾處煤田作為中心嘅石炭產業繁盛,煤礦挖掘亦興盛過一時[111]。但由於石油成為咗主要能源,加上日本國內煤礦開採成本好高搞到煤礦礦山喺1960年代之後陸續閂門[112]。北海道而家淨係得作為日本唯一坑內採煤事業嘅釧路煤田嘅有個煤礦仲喺度開採緊[113][114],而一度停產嘅石狩煤田亦因為入口煤越嚟越貴而恢復返露天開採。
由於北海道經濟曾經長期依賴公共工程,令到建設業喺北海道經濟入面亦都有一定嘅地位,佢喺北海道經濟入面嘅比重大幅高過日本嘅平均水準[115]。
服務業係北海道經濟嘅支柱產業。觀光產業喺北海道經濟入面中發揮咗重要嘅作用。北海道憑住嗰度比較原始嘅自然、涼爽嘅夏季同埋冬季嘅雪國景觀等等呢啲旅遊資源吸引咗一班嚟自日本國內外嘅遊客。北海道嘅外國遊客入面以台灣、韓國、香港同埋泰國最多[116],北海道嘅外國人遊客喺1997年嗰陣時嘅數量係12萬人。近年嚟去北海道旅遊嘅外國人遊客大幅咁增加,去到2005年嗰時,呢個數字增加去到208萬人。2015年時,嚟到北海道旅遊嘅遊客數量達到5,477萬人[116]。觀光客為北海道帶嚟咗大量嘅消費支出,亦促進咗交通、餐飲、住宿等等相關行業嘅發展。就住遊客到訪嘅地區嚟睇,以札幌同埋嗰度附近嘅道央地區最多,另外就係函館、旭川、道東亦吸引多啲遊客去到嗰度[8]:124-129。
喺商業同金融業方面,由於北海道係日本最早開始汽車社會化嘅地區,令到北海道因為咁亦都比日本其他地區仲早啲開始進入賣場嘅大型化同郊外化時代[8]:118。呢個亦都令到北海道早啲開始去面對市中心商業區衰退嘅問題。北海道政府而家試吓通過補助金同培育人才等等嘅措施去改善中心市區空洞化嘅問題[117]。北海道全年商品銷售額喺2013年有¥164,552億日元[118]。日本而家嘅大型商業企業入面,HOMAC[119]、宜得利家居[120]同埋Seicomart[121]都係喺北海道創業嘅企業。1997年北海道拓殖銀行嘅破產為北海道金融業帶嚟咗巨大嘅衝擊。北海道而家嘅兩大地方銀行係北洋銀行[122]同埋北海道銀行[123]。札幌仲設有札幌證券交易所嚟去幫當地嘅企業融資[124]。信息技術產業而家係北海道服務業裡面發展得比較快嘅產業。櫻花網路喺2010年宣佈嚟緊會喺石狩市起日本最大嘅數據中心[125]。札幌車站北口一帶聚集咗好多中小科技企業,令到嗰度有咗一個叫做「
北海道係日本旅遊觀光嘅熱點,嗰度廣闊嘅面積令到北海道唔同地區嘅旅遊資源有住相差很大嘅特徵。道南係北海道各個地區入面同埋嗰度啲人最早去到嘅地方,所以呢度亦都有耐啲嘅歷史同人文景觀。日本最北嘅地方係松前城,嗰度亦都係北海道唯一嘅日本式城堡[128]。渡島半島西海岸嘅江差町出名喺民俗文化同埋和歷史景觀[129]。函館係道南地區嘅觀光中心,作為日本最早對外開放嘅五個港口,函館以佢嘅西洋式建築而出名,代表作包括咗金森紅磚倉庫同埋舊函館區公會堂等等[130]。函館山嘅夜景被譽為世界三大夜景之一[131]。另外,函館郊外嘅大沼公園係道南出晒名嘅濕地。
道央地區係北海道觀光客最多嘅地區。札幌市有北海道廳舊本廳舍同埋札幌市鐘樓等等開拓時代嘅建築[132],而大通公園就係日本具代表性嘅都會型公園[133]。札幌附近嘅小樽曾經係北海道嘅玄關,嗰度出名嘅係小樽運河[134]、西洋式建築仲有玻璃工藝品[135]。新雪谷町地區就有北海道規模最大嘅滑雪場同度假區,戶外體育活動好興盛[136]。道央南海岸嘅登別溫泉[137]仲有洞爺湖[138]就係日本最具盛名嘅溫泉度假地點之一。
道東地區地廣人稀,觀光資源亦都以自然風景為主。釧路附近嘅釧路濕原係日本最大嘅濕地,亦都係日本最大嘅丹頂鶴棲息地[139]。釧路地區北部嘅阿寒摩周國立公園擁有好多湖泊,其中阿寒湖出晒名係毬藻[140]同埋溫泉,而摩周湖就係日本透明度最高嘅湖泊[141]。中標津町嘅開陽台就因為雄壯嘅眺望景色而成為咗電單車友嘅聖地[142]。野付半島被列入咗濕地公約,嗰度擁有人跡罕至嘅濕地[143]。知床係北海道唯一嘅世界自然遺產[144]。鄂荷次克海沿岸嘅網走同埋紋別係觀賞流冰嘅據點都市[145]。
道北地區南北嘅跨度大,觀光資源亦都好多樣化。位於道北南邊地區嘅富良野市、上富良野町、中富良野町仲有美瑛町出名嘅係薰衣草同埋花田,嗰度被評為「日本最靚農村」[146]。嗰度北側嘅旭川市最出名嘅景點就係旭山動物園[147]。北海道地勢最高嘅大雪山[148],仲有出晒名嘅飛瀑層雲峽同樣都係喺道北嘅南部地區。位於日本最北端嘅稚內地區就擁有佐呂別原野嘅濕地景觀[149],宗谷岬嘅日本最北端紀念碑亦都吸引咗好多觀光客到訪嗰度[150]。稚內市附近嘅利尻島擁有形狀近似對稱嘅利尻岳,喺夏季嗰陣有好多登山客[151]。禮文島有「花之浮島」之稱,嗰度生長咗好鬼多珍稀嘅高山植物[152]。
北海道四個地區同佢哋包含嘅旅遊重點:
北海道仲有好多原始森林:
阿伊努族係北海道嘅原住民,佢哋擁有極其獨特嘅文化,阿伊努文化嘅代表例子包括咗被叫做尤加拉嘅口述文學[153];阿伊努文化包括咗高腳屋嘅阿伊努式住宅,同埋被列入聯合國非物質文化遺產嘅古典阿伊努舞蹈[154],仲有用大量油脂嘅阿伊努料理等等[155]。阿伊努人喺古代唔論男女都有紋身[156],仲用二十進制[8]:20;呢個亦係佢哋同其他日本人相比嘅獨特之處。不過阿伊努文化喺江戶時代中後期開始被強制同化,加上阿伊努人嘅人口大幅減少,而且阿伊努人又無自己嘅文字,阿伊努文化受到嚴重衝擊,阿伊努文[157]都被列入去瀕危語言名單[158]。不過北海道好難抹走阿伊努文化嘅影響,例如而家北海道嘅絕大多數地名都係嚟自阿伊努語[159]。日本政府而家已經開始立法去保護阿伊努文化[160],民間復興阿伊努文化嘅運動亦都逐漸活躍。
日文裡面嘅北海道地區方言係北海道方言[161],係東日本方言嘅一種。北海道方言內部可以再分做沿海地區嘅海岸部方言(呢個又叫做濱言葉,其中又以函館地區特徵最強)同埋其他地區嘅內陸部方言[161],其中內陸部方言更加接近標準日語。由於北海道係移民社會,嚟自唔同地方嘅人喺溝通嗰陣時就需要用同一種語言,令到北海道方言係日文方言入面較為接近標準日語嘅方言。札幌市嘅方言甚至被認為係比東京地區嘅方言更加接近標準日語[162]:3,但係喺發音同用詞上面,北海道方言仍然同標準日語有啲唔同。不過由於近年大眾媒體嘅影響,加上擁有去道外讀書同工作經驗人口嘅增加,令到北海道方言而家逐漸走向接近標準日語。典型嘅北海道方言其中一個特徵係用以前嘅用語嚟表達尊敬,而呢一個特點甚至影響咗日本其他地區嘅日語[163]。北海道方言入面具代表性嘅詞彙包括咗原本係指一種馬,但而家係指北海道人嘅「道産子」、意思係創可貼嘅「サビオ」、意思係秋季宴會嘅「観楓会」,同埋意思係列車嘅「汽車」(日本其他地區好多時會用「電車」呢個詞語嚟表達)...等等[164]。
北海道係日本重要嘅農產地,豐富嘅食材亦都造就咗北海道多樣嘅飲食文化。北海道水產資源豐富,令到壽司、蟹肉料理等等各類海鮮料理成為咗北海道具代表性嘅高級料理。北海道嘅海鮮丼亦有幾個種類,裡面又以松前金槍魚三色丼[165]、函館嘅生魷魚丼[166]、釧路嘅勝手丼[167]等等最出名。北海道嘅肉食文化同日本其他地區好唔同。十勝地區嘅豚丼因為用咗帶甜味嘅豉油嚟煮令到豬肉嘅甜味勁啲,喺日本嘅豚丼入面獨具特色[168]。成吉思汗烤肉係北海道最出名嘅其中一種鄉土料理[169],戰後糧食緊拙嘅時期因為羊肉嘅價格平啲,令到北海道喺呢個時候好興烤羊肉,成吉思汗烤肉因為咁而普及咗,北海道亦都成為咗日本淨係得嗰度係大量食用羊肉嘅地區(另一度係沖繩縣)。雖然而家糧食充沛,北海道亦已經好少出產羊肉,但係成吉思汗烤肉就已經成為咗北海道最出名嘅其中一款料理。
北海道係日本拉麵文化其中一個最興盛嘅地區[170]。北海道拉麵入面,以醬油風味嘅旭川拉麵[171]、札幌拉麵[172]、函館拉麵[173]呢三種拉麵最具代表性。北海道作為而家日本拉麵文化最興盛嘅地區,札幌仲有拉麵共和國[170]同埋拉麵橫丁[174]等等呢啲聚集咗大量拉麵店嘅飲食街。
北海道亦都係日本最大嘅乳製品產業地區,而用牛奶整嘅各類甜品亦都係北海道飲食文化入面唔可以少嘅一部分。北海道出名嘅甜品企業包括咗石屋製菓(佢哋代表嘅產品係白色戀人[175])、Royce'[176]同埋六花亭[177]等等。北海道亦都係日本最早開始普及啤酒文化嘅地區,札幌啤酒係日本四大啤酒企業之一[178]。由於北海道喺以前物流網相對獨立,令到好多企業生產淨係喺北海道銷售嘅北海道限定品。有啲北海道限定品亦都已經成為北海道飲食文化嘅標誌,呢啲亦都係北海道人所鍾意嘅牌子,例如係瓜拉那飲料[179]同埋勝源[180]。
北海道最大嘅地方報章係北海道新聞,北海道新聞嘅前身係1887年開始發行嘅北海新聞。日本政府喺1942年下令整合北海道裡面嘅11份地方報紙,北海道新聞就隨住咁樣而誕生[181]。北海道新聞係日本其中一份規模最大嘅地方報紙,而家嘅日發行量接近107萬份[182]。北海道新聞唔單止喺北海道各地都設有支局,仲喺華盛頓、倫敦等等地方亦都派咗駐外記者[183],其中又以對俄羅斯遠東地區嘅新聞報導見長。除咗北海道新聞之外,北海道各地亦都有自己嘅地方報紙,其中主要嘅地方報紙包括咗苫小牧民報、室蘭民報、函館新聞、釧路新聞、十勝毎日新聞[184]。另外,讀賣新聞、朝日新聞、每日新聞、日本經濟新聞等等呢啲全國性報紙喺北海道亦都有發行。
喺電視方面,日本放送協會(NHK)喺北海道都有7個放送局[185],分別係NHK札幌、NHK函館、NHK旭川、NHK室蘭、NHK帶廣、NHK北見同埋NHK釧路。另外,北海道仲有屬於JNN聯播網嘅北海道放送(HBC)[186]、屬於NNN聯播網嘅札幌電視台(STV)[187]、屬於ANN聯播網嘅北海道電視台[188]、屬於FNN聯播網嘅北海道文化放送(UHB)[189],同埋屬於TXN聯播網嘅TV北海道(TVh)[190]呢五間電視台,其中北海道放送同埋札幌電視台亦有播出廣播節目。北海道憑住獨特嘅風情仲有雄大嘅自然成為咗好多電影同電視作品嘅故事舞台。喺北海道拍攝嘅出名日本電影同電視劇有《幸福的黃手絹》[191]、《北方的金絲雀》、《風之花園》、《來自北國》[192]、同埋《First Love 初戀》等等呢啲作品。
北海道嘅冬季氣候寒冷,為北海道發展冬季運動俾咗最佳條件。札幌市喺1972年舉辦咗冬季奧運會[193],呢個係日本第一次舉辦冬奧會,亦都可以睇得出北海道冬季體育嘅興盛程度。北海道係日本最多滑雪場嘅地區,仲因為嗰度優良嘅雪質吸引咗澳洲等等嘅外國滑雪愛好者[194]。北海道嘅冬季體育因為氣候差異而呈現出唔同嘅地區特徵,東部地區因為氣候乾燥落雪同少啲,令到滑冰同冰球等等嘅冰上運動有多啲參加者,而西部地區就因為落雪多啲,令到滑雪同跳臺滑雪等等呢啲雪上運動好興盛。日本有一班冬季運動選手都係出身自北海道,包括咗笠谷幸生[195]、原田雅彥[196]、船木和喜、齊藤浩哉、伊藤有希、高梨沙羅、橋本聖子[197]、長島圭一郎等等。北海道仲擁有日本製紙白鶴[198]同埋王子製紙老鷹[199]呢兩支職業冰球球隊,而比賽方面,亞洲冰球聯賽係比較出名嘅冰球比賽。
主場喺ES CON FIELD HOKKAIDO嘅北海道日本火腿鬥士係日本職棒—太平洋聯盟嘅球隊[200],嗰支球隊喺1945年11月6號成立,成立嗰時隊名叫做參議員隊,後嚟球隊先後轉售俾東急電鐵(後嚟改名做東急飛人隊,直到日本火腿接手之前幾次改名都係以飛人嚟做吉祥物)仲有日本火腿(日本火腿鬥士隊)。日本火腿鬥士隊喺2004年將佢哋嘅主場由東京轉移去到位於北海道地區新建完嘅札幌巨蛋,球隊嘅名稱亦都冠上咗「北海道」而成為而家嘅隊名,仲換咗吉祥物、球衣同埋隊徽。佢哋後嚟轉移主場去到自己起嘅北廣島市ES CON FIELD HOKKAIDO,仲分別喺1962年、2006年、2016年3度攞咗日本一[201],而家喺美國職業棒球大聯盟活躍嘅達比修有同大谷翔平就係出身自日本火腿鬥士。北海道喺高中棒球上面亦有一席位,駒澤大學附属苫小牧高等學校曾經次打咗入去甲子園幾次,仲培育出例如田中將大呢啲出名嘅棒球選手。足球方面,北海道札幌岡薩多[202]係北海道嘅唯一一支J聯賽球隊[203],而家佢哋參加J1聯賽嘅賽事。北海道亦都係盛行相撲嘅地方,出身橫綱嘅人數係日本裡面最多,昭和三大橫綱:大鵬、北之湖、千代富士都係喺北海道出身[204]。
北海道有好多唔同嘅大學,歷史比較悠久嘅係總部位於札幌市中心嘅北海道大學,佢前身係創建喺1876年嘅札幌農學校,佢喺1918年升格做北海道帝國大學,係日本本土嘅七個帝國大學之一,亦都係北海道教學研究水準最頂尖嘅高等學府[205]。北海道大學而家擁有札幌同函館兩個校區,夾埋有12個學院,本科學生超過11,000人,碩士同博士生超過6,000人[206]。2010年諾貝爾化學獎嘅得主鈴木章曾經喺北海道大學讀書仲喺嗰度教書,而家佢係北海道大學嘅名譽教授[207]。
除咗北海道大學之外,北海道仲有北海道教育大學、室蘭工業大學、小樽商科大學、帶廣畜產大學、旭川醫科大學同埋北見工業大學呢6間國立大學[208],仲有釧路公立大學等等5間公立大學[209]。
北海道亦有26間私立大學[210],其中規模大啲嘅有旭川大學、札幌大學、札幌學院大學、札幌國際大學、北海學園大學、北星學園大學、北海道科學大學同埋北海道醫療大學。
北海道各地亦有好多小學、初中同埋和高中,但係北海道嘅義務教育階段嘅學生平均學力略低於日本全國平均水準[211],北海道教育委員會對於呢樣嘢採取咗好多措施嚟試吓提高學生嘅學習能力同體力水準[212]。另外,由於適齡學生嘅數量大幅咁減少,北海道喺最近十年裡面已經陸續咁閂咗多到去451座道立嘅中小學[213],令到一啲學生家長同埋社會人士認為學生嘅受教育權因為咁受到影響,呢個決定就引起咗佢哋嘅不滿。
喺江戶時代,北海道同本州之間就通過北前船嚟進行貿易往來[214]。去到明治初期,郵船汽船三菱會社曾經一度壟斷咗北海道嘅海運市場。共同運輸會社喺1882年成立嚟去同三菱展開對抗,兩邊爭奪北海道嘅海運市場。日本政府喺1885年下令將兩間公司合併做日本郵船會社,北海道嘅海運市場再次進入去壟斷嘅狀態[8]:74。呢個時期仲開通咗由函館或小樽出發,去北海道各地嘅海路航線。喺進入咗大正時期之後,小樽、室蘭港、釧路港、根室港等港口亦開通咗唔經函館而直接去本州嘅航線[8]:74。日本政府喺戰後決定將室蘭港、苫小牧港、釧路港等等太平洋沿岸嘅港口作為開發重點,而函館港同埋小樽港嘅地位就相對下降[8]:77。同時隨住空運嘅發展,貨運取代咗客運成為海運嘅主要市場。北海道而家擁有苫小牧港同室蘭港兩個特定重要嘅港灣,仲有函館港、小樽港、釧路港等等10個重要港灣同埋24個地方港灣[215]。北海道同本州之間而家有15條定期嘅貨運航線[216]。就住貨物進出口量來看,苫小牧港是北海道最大港口,之後則依次是函館港、室蘭港、釧路港、小樽港[217]。
北海道喺客運方面,而家同本州之間有10條定期航線,其中有5條係由苫小牧港出發,有3條係由小樽港出發,有2條由函館港出發。渡輪都係北海道本島同離島之間重要嘅交通工具。國土交通省喺2011年指定咗國際散貨戰略港灣—釧路港,北海道同本州之間嘅渡輪有172.3萬人乘坐[216]。北海道本島而家同奧尻島、天賣島、燒尻島、利尻島同禮文島之間都有定期嘅渡輪航線。北海道本島同離島之間定期航線嘅乘客量喺2011年有68.3萬人[218]。喺國際航運方面,北海道同俄羅斯之間開設咗定期客運船程航線。2011年,北海道同俄羅斯之間嘅輪渡航線乘客量有3,629人次[219]。
北海道喺1870年嗰時已經有170公里長嘅公路[8]:74。北海道政府喺19世紀末曾經修建由札幌去到網走嘅公路。但係直到大正時代中期,鐵路因為成為咗北海道交通嘅主角,搞到公路建設唔被重視[8]:74。戰後隨住汽車開始普及,北海道亦急咁開始咗公路嘅建設。千歲市至北廣島市同埋札幌至小樽嘅高速公路通咗車,係北海道嘅第一條高速公路[8]:78。而家嘅公路係北海道交通嘅核心,承擔咗北海道80%以上嘅客運量[220]。目前北海道擁有咗道央自動車道、札樽自動車道同埋道東自動車道呢三條高速公路[221]。北海道喺2014年嗰陣時夾埋有1,015公里高規格幹線道路,其中高速公路有696公里[222]。北海道一般國道長度係6,722公里,都道府縣道嘅長度係11,783公里,市町村道嘅長度就係71,025公里,北海道嘅一般公路夾埋有有89,530公里。北海道嘅高速公路建設情況仲係同日本平均水準滯後得好遠。另外,除咗私家車之外,巴士亦都係北海道重要嘅都市之間穿梭嘅工具。北海道喺2012年夾埋有52條都市間嘅巴士路線,其中有39條係以札幌嚟做起點[223]。
北海道第一條鐵道線路係小樽市同札幌市之間嘅手宮線。呢條線路係日本第三條通車嘅鐵道路線,喺1880年通車[224],北海道鐵路事業自此之後就發展得好快。1904年,隨住小樽同函館之間嘅鐵路開業,北海道主要都市之間都已經由鐵路聯通咗[8]:75。同時日本郵船仲開闢咗青森至函館嘅鐵路輪渡航線[225],令到鐵路成為北海道同本州之間重要嘅交通手段。當時除咗國有鐵道之外,亦都有唔少私人企業,例如係定山溪鐵道[226]同埋北海道拓殖鐵道等呢啲公司經營鐵路業務。1930年代嗰陣時,北海道的鐵路線路網已基本完成[8]:75。戰後初期,北海道仍修建了湧網線、松前線同埋羽幌線等鐵路新線,仲開始進行鐵路電氣化。
喺1960年代之前,由於北海道係日本嘅主要煤炭產地,當時因為咁就修建咗好多將煤炭搬運出海嘅貨運鐵路。鐵路亦都喺北海道開拓歷史入面發揮住重要嘅作用。鐵路嘅修建令到沿線地區得到咗快速嘅發展,例如旭川市就係因為位處鐵路交通嘅連接點而得到開發,成為咗道北地區最大嘅都市[8]:75。但係喺1960年代之後,隨住汽車嘅逐漸普及、航空交通嘅發展、礦山相繼關閉、農村地區人口減少,北海道的鐵路事業陷入赤字。
喺1970年代之後,國鐵為咗改善財政狀況,佢哋以根北線嚟做開始,陸續廢止北海道嘅好多鐵路路線,即使係名寄本線咁樣嘅幹線亦都被廢除。國鐵喺1987年分割民營化,北海道絕大部分鐵路都係由北海道旅客鐵道(JR北海道)繼承嚟經營[227]。不過喺另一方面,青函隧道喺1988年通車,令到北海道同本州之間嘅交通狀況大幅改善[228]。不過由於人口稀少搞到除咗札幌附近地區之外嘅鐵路利用效率低,JR北海道嘅經營狀況長期嚴峻,去到1990年代之後都仲有赤字嘅鐵路線路被廢止咗。JR北海道而家總共運營有14條路線,夾埋有2,457.7公里嘅鐵路路線[229]。
去到2013年度,JR北海道嘅總乘客數達到134,106,000人[230],其中以札幌至旭川之間嘅列車乘客數量最多,其次就係札幌至函館、札幌至帶廣之間嘅列車[231]。札幌車站係北海道鐵路交通嘅核心,超級神威號、宗谷號、鄂荷次克號、北斗號、十勝號,同埋超級大空號等等JR北海道運行喺北海道各主要都市之間行駛嘅特急列車全部都以札幌嚟做起點同終點嘅端點站[8]:78。2013年,札幌站嘅日均乘客量達到93,152人[232]。除咗JR北海道之外,北海道仲有三間鐵路公司:太平洋煤礦銷售運輸喺釧路市經營緊一條運煤嘅貨運鐵路[233];函館市企業局交通部經營緊函館市路面電車嘅業務[234];札幌市交通局係經營札幌市營地下鐵嘅機構,而家札幌市營地下鐵包括咗南北綫、東西綫同埋東豐綫呢三條線路[235]。貫通日本本土嘅新幹線亦有開入去北海道,北海道新幹線喺2016年3月開通咗新青森站至新函館北斗站嘅區間[236],預計2030年尾喺新函館北斗延伸去到札幌[237]。
日本航空輸送喺1937年曾經開通札幌同羽田機場之間定期嘅航線,但係喺1940年嗰陣停飛[8]:77。日本航空喺1951年開設咗千歲機場同羽田機場之間嘅定期航線[238]。全日空跟住都喺1958年開通咗千歲—仙台—羽田嘅航線[238]。北海道內各地喺1950年代中期之後開始起機場,北海道逐漸起咗以千歲機場嚟做核心嘅道內航空網。新千歲機場喺1988年開張之後,北海道又陸續開通咗飛去海外嘅航線。由於直接由陸路嘅交通方式嚟去到北海道比較唔方便,空運因為咁就成為咗北海道同外界最重要嘅交通方式[239]。羽田機場同埋新千歲機場之間嘅航線喺2013年有8,838,667位乘客去搭,係日本國內乘客數最多嘅航線[240],而關西—新千歲同埋名古屋—新千歲嘅航線乘客數量亦都喺日本航線乘客數量排名入面位居頭幾位。北海道裡面而家夾埋有14座機場(其中禮文機場處於暫停使用嘅狀態)[241][242],其中新千歲、旭川同函館三個機場有定期國際航班運行緊[243]。北海道裡面嘅機場以新千歳機場嘅乘客數量最多。
新千歲機場喺2017年嘅乘客數量係日本乘客數量第四多嘅機場,達到22,717,980人。北海道旅客量比較多嘅機場,除咗新千歲機場之後,就係排喺後面嘅函館機場同埋旭川機場[244]。北海道裡面仲有AIRDO同埋北海道空中系統兩間航空公司。AIRDO主要經營由羽田機場去北海道各機場同埋嚟自新千歲機場去日本各地嘅航線[245];北海道空中系統就經營丘珠機場—利尻機場、釧路機場、函館機場、三澤機場同埋函館機場—奧尻機場同埋三澤機場嘅航線[246]。
亞洲主要地理 |