From Wikipedia, the free encyclopedia
中國朝代(粵拼:zung1 gwok3 ciu4 doi6)係指自禹響公元前2070年建立夏朝到公元1912年宣統帝退位清朝滅亡為止,喺中國史上由家族以君主制實施世襲統治嘅政權同相應嘅歷史時期。「中國朝代」唔單止係有漢族建立嘅政權,而係包埋其他民族嘅政權喺入面[1]。
漢文嘅「朝」字原本嘅意思係「早晨」、「今日」,喺政治上引申成為當政者政權噉解,同佢相反嘅字係「野」。「朝代」係指「劃時代」政權執政嘅時代,喺史學上可以用嚟對一個期間所發生嘅事件、趨勢、人物、文物等進行論述[2]。將中國史進行斷代分期係史學家常用嘅學術方法[3]。
中國史上有好多通過世襲統治嘅君主制政權,有啲時期得一個大一統王朝統治緊中國,而其他時期就有多個王朝同時存在。著名嘅中國王朝有秦朝、漢朝、唐朝、宋朝、明朝、清朝等。延續時間最耐嘅中國王朝係周朝,一共存在咗789年,不過喺史學上分成西周同東周[4]。統治疆域最遼闊嘅中國王朝係元朝或者清朝,根據唔同嘅材料得到唔同嘅領土面積[5][6][7][8][9]。實行共和制嘅中華民國同埋中華人民共和國唔係王朝,所以喺嚴格意義上嚟講唔可以算得係朝代[10]。
以下係中國史學常見嘅詞彙:
禹係中國史上第一個王朝夏朝嘅建立者,所以佢通常畀史學家睇成係中國世襲統治嘅創立者[13]。理論上,中國君主係中國政權嘅至高統治權力者,通過世襲傳承,形成「家天下」嘅局面[14]。喺政治權力開明嘅時候就叫做「與士大夫共天下」。夏朝之前,君主一般以禪讓嘅形式移交統治權,所以稱為「公天下」[14][15]。
朝代更替,又叫「改朝換代」,係中國史入便嘅一個特徵。有一啲史學家嘗試以君主嘅德行嚟解釋王朝嘅興衰,然而其他嘅史學家則將呢種歷史發展歸咎於有形嘅方面[16]。其中,朝代循環係用嚟解釋中國朝代更迭嘅一個重要嘅理論[16][17][18]。
中國嘅朝代更替主要係通過兩種方式完成:武力征服同埋篡位[19]。通過武力征服嚟完成改朝換代嘅有遼朝同金朝嘅更替、元朝滅咗幾個王朝而統一中國。通過篡位進行王朝更迭嘅有東漢同曹魏嘅更替、南齊同梁朝嘅更替。篡位建國者通常通過「接受」前者嘅「禪讓」嚟取得佢統治嘅正統性[20]。
雖然有一啲歷史年表為咗簡化內容而將朝代更迭顯示為平穩嘅政權過渡,但係事實一般都唔係噉嘅。新成立嘅王朝通常喺仲未推翻現有嘅王朝之前就已經建立咗[21]。例如:公元1644年一般睇成係清朝取代咗明朝法統嘅嗰一年,不過清朝響公元1636年就已經立國,而喺公元1616年創立嘅後金係清朝嘅前身;明朝皇室則繼續佔有同埋統治緊中國嘅南方直到公元1662年為止,史稱「南明」;明朝嘅殘餘勢力東寧喺南明滅亡之後重繼續抵抗清朝,一直到公元1683年先至畀清朝擊敗[22][23][24]。喺同樣嘅時期,其他勢力亦都喺明清易代嗰陣割據建國,好似李自成同張獻忠分別建立嘅大順同大西[25][26][27]。清朝喺取代明朝之後用咗二十年左右先完成咗中國本部嘅統一。由呢個例子可見,朝代更替其實係複雜而且漫長嘅歷史發展。
同樣嘅,喺先前嘅隋唐易代亦都出現咗好多割據政權。呢個時期嘅勢力有李密嘅魏、薛舉嘅秦、高曇晟嘅齊、宇文化及嘅許、沈法興嘅梁、梁師都嘅梁、竇建德嘅夏、王世充嘅鄭、朱粲嘅楚、林士弘嘅楚、高開道嘅燕、輔公祏嘅宋等。最尾取代咗隋朝嘅唐朝一共用咗十年左右統一中國本部[28]。
中國世襲君主制統治喺公元1912年辛亥革命成功之後結束,中華民國取代咗清朝嘅法統[30][31]。民國成立之後,雖然亦都有幾個試圖恢復世襲君主制嘅事件發生,但係所有呢種類型嘅政權最尾都以失敗告終。所以,史學家一般以公元1912年2月12日宣統帝愛新覺羅溥儀退位作為中國世襲君主制統治嘅終結。中國世襲君主制統治一共存在咗大概四千年[30]。
中國史上嘅分裂時期係多個王朝同時存在嘅時期,每一個王朝亦都有各自嘅朝廷同埋政治體系。中國嘅分裂時期有三國、十六國、南北朝、五代十國等。
喺分裂時期,王朝同王朝之間嘅關係通常關乎政權嘅正統性,而正統性則係嚟自天命[32]。分裂時期嗰陣,漢族建立嘅王朝通常用華夷之辨嚟加強自身嘅正統性,同時拒絕接受其他民族創建嘅王朝係正統嘅政權。非漢族嘅王朝則自稱係中華文化同中國史嘅傳承者,亦都自稱係正統。喺中國傳統史學入面,「朝」同埋「國」嘅意思同用法係有唔同嘅:淨係正統嘅政權可以稱為「朝」,非正統嘅政權無論係唔係世襲都係叫做「國」[33]。而家嘅史學家對於一啲王朝嘅正統地位重有異議。
以下係喺史上或者今日存有正統爭論嘅歷史時期:
雖然喺分裂時期多個王朝並立嘅局面引起咗朝廷官員同史學家嘅正統之爭,北宋政治人歐陽脩就話響分裂時期無一個王朝係正統[52]。如果係噉睇,宋朝嘅正統地位係嚟自佢結束五代十國亂局嘅能力,唔係嚟自後周。同樣嘅,歐陽修認為三國、十六國同南北朝等分裂時期亦都無正統王朝[52]。
因為中國歷史典籍通常係以單線繼承作為中國史入便正統嘅傳承規則,所以任何時期淨係可以得一個王朝係中華嘅正統[41]。而家嘅歷史材料一般都遵守以下嘅正統繼承順序:夏朝 → 商朝 → 西周 → 東周 → 秦朝 → 西漢 → 東漢 → 曹魏 → 西晉 → 東晉 → 劉宋 → 南齊 → 梁朝 → 陳朝 → 隋朝 → 唐朝 → 後梁 → 後唐 → 後晉 → 後漢 → 後周 → 北宋 → 南宋 → 元朝 → 明朝 → 清朝[41]。
中國史上有幾個王朝係出自同一個家族,但係因為國號唔同或者政權發生咗一啲根本性嘅變化等原因而畀後世嘅史學家以唔同嘅名嚟區分。另外,亦都有王朝自稱係某個先前王朝嘅後裔嚟得到或者加強佢統治嘅合法性同正統性。
以下係得到大部分史學家承認嘅同宗王朝:
中原響黃河嘅中下游地區,係中華文明嘅發祥地[57]。「中原王朝」係指定都喺中原嘅王朝,無論建立王朝嘅民族係邊個都好[57]。
「大一統王朝」係指完成咗中國本部統一嘅王朝,無論建立王朝嘅民族係邊個都好。「中國本部」,又叫「中國本土」,係漢族嘅傳統聚居地,同「中國」唔係一樣嘅概念。完成咗中國本部統一而且君主稱號係皇帝嘅王朝可以叫做「中華帝國」[58]。
「大一統」呢個概念第一次出現喺公羊高嘅《公羊傳》入便[59][60][61]。其他著名嘅人物好似孔子同孟子亦都喺佢哋嘅作品入便提到過呢個概念[62][63]。
大部分嘅史學家將呢啲王朝歸類成大一統王朝:秦朝、西漢、新朝、東漢、西晉、隋朝、唐朝、武周、北宋、元朝、明朝、清朝[64][65]。但係,北宋大一統王朝嘅地位唔係全部史學家都接受嘅,原因係燕雲十六州嘅一部分地區係遼朝嘅領土,而且河套嘅一部分地區係由西夏統治緊;所以,北宋從未完全控制到中國本部[64][66]。
「征服王朝」同埋「滲透王朝」都係非漢族建立嘅中國王朝,按佢哋入去中國本部統治嘅方式分別歸類成兩種類別[67]。「征服王朝」係指嗰啲吸收漢文化嘅同時特登保留住自身文化嘅非漢族王朝,好似元朝、清朝等;「滲透王朝」係指嗰啲最後被徹底漢化咗嘅非漢族王朝,好似後秦、北魏等。呢兩個概念都係由美國史學家魏復古提出嘅,而且畀支持以多民族、多元文化嘅角度嚟分析中國史嘅史學家爭議[68]。
中國歷朝嘅開國君主喺立國之初都會確立政權嘅正式名稱,即係國號[69][70]。喺王朝統治期間,國號係代表文明正統嘅政權嘅官方名稱,象徵新嘅政權取得咗舊統治者嘅合法地位。中國亦都有喺王朝統治期間國號出現變更嘅案例,例如:南漢原本定嘅國號係「越」,之後改成「漢」[71]。
國號大概有五種源頭:
中國史上有幾個王朝嘅國號係有個「大」字。朱國楨嘅《湧幢小品》指出第一個帶有「大」字嘅國號係元朝嘅「大元」[78][79]。不過,其他嘅歷史材料,如同脫脫編修嘅《遼史》同《金史》,記錄咗喺元朝之前亦都有王朝嘅國號入便有「大」字,好似遼朝嘅「大遼」同金朝嘅「大金」[80][81]。
官員、百姓、朝貢國亦都會喺稱呼中國王朝嗰陣喺國號前面加埋個「大」字嚟表示尊崇,即使王朝嘅國號入便係無「大」字嘅[79]。例如:《日本書紀》入便叫唐朝做「大唐」,但係唐朝嘅國號淨係得「唐」一個字。
國號嘅使用同埋佢嘅重要性亦都畀中國以外嘅其他中華文化圈政權接受。其中,響越南同朝鮮半島嘅王朝都有各自嘅國號。
因為中國史上出現過好多重複使用嘅國號,史學家需要喺名稱前面加埋前綴嚟區分唔同嘅政權[2][82][83]。一般會用到嘅前綴有:
一個王朝可能有多個史學稱呼,但係一啲稱呼通常會得到更加廣泛嘅使用。例如:西漢又叫「前漢」、楊吳亦都可以叫做「南吳」[84][85]。
如果一個王朝嘅統治發生咗一啲根本性嘅變化,史學家一般都會用唔同嘅名號嚟區分。例如:宋朝分北宋同南宋,以靖康之變做兩者嘅分界點,用嚟區分由宋太祖趙匡胤成立嘅「宋」同宋高宗趙構復興之後嘅「宋」[86]。呢種情況之下,原本嘅政權已經覆滅咗,但係之後得到重建同埋聲稱延續先前政權嘅法統,所以史學界需要區分名號嚟反映政權變化嘅歷史事實。例外嘅有西秦同唐朝,佢哋嘅統治曾經畀後秦同武周分別打斷過[87][88]。
中文材料通常唔會喺有前綴嘅王朝史學稱呼加埋個「朝」字。例如:北周因為有個「北」字前綴而好少被叫做「北周朝」;「北周」、「北周王朝」呢種叫法就相對嚟講比較常見。
呢個表淨係顯示通常喺歷史年表入便可以搵得到嘅主要嘅中國王朝。中國史上重有好多世襲君主制政權唔喺入便。
呢個表淨係顯示主要嘅中國王朝。不過,中國歷史地理學劃定嘅地理範圍入面重有好多唔喺呢個表入便嘅世襲君主制政權,例如[195]:
根據中國歷史地理學嘅劃定,清朝響公元1750年代到公元1840年代為止,第一次鴉片戰爭爆發之前嘅極盛領土範圍都係中國史嘅一部分,而呢個地區入面全部民族建立嘅政權都係中國史上嘅政權[196][197][198]。清朝鼎盛時期嘅疆域面積超過1300萬平方公里,涵蓋以下嘅地區[199][200][201]:
曾經喺一啲歷史時期由中國政權統治嘅其他地區(好似朝鮮半島嘅部分區域、今日越南嘅中部同北部、中亞嘅部分地區等)則涵蓋喺相應嘅中國政權嘅歷史入便。響「中國」之外地區但係有中國血統嘅王朝(如同越南嘅前李朝、暹羅嘅吞武里王朝等)都唔包埋喺呢個表入便[208][209][210][211]。另外,曾經統治過響「中國」之外嘅中華朝貢國嘅王朝(例如琉球群島嘅第一尚氏王朝、越南嘅阮朝等)亦都被排除喺呢個表之外[212][213]。
淺黃色底色係影響力比較大嘅政權
灰色底色係主要嘅歷史時期(亦都係多個政權嘅統稱)
左邊嗰行橙色底色係包埋喺「三國」入便嘅政權
左邊嗰行藍色底色係包埋喺「十六國」入便嘅政權
左邊嗰行綠色底色係包埋喺「南北朝」入便嘅「北朝」政權
左邊嗰行紫色底色係包埋喺「南北朝」入便嘅「南朝」政權
左邊嗰行黃色底色係包埋喺「五代十國」入便嘅「五代」政權
左邊嗰行粉紅色底色係包埋喺「五代十國」入便嘅「十國」政權
呢個表顯示嘅王朝同「王朝一覽」入便嘅王朝係一樣嘅。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.