鶴山

鶴山喺中國廣東，家下係江門市下便一個縣級市，叫鶴山市。舊時鶴山係個縣，叫鶴山縣。大清時歸肇慶府管。

因為家下江門市下管舊時五個縣，所以鶴山加埋四邑，即係台山、新會、開平同恩平，就叫五邑。

地理

鶴山東北有崑崙山。西北有雲宿山^[1]。

西江由南海入鶴山，過縣東北境叫古勞河，又叫蘇海，夾埋古勞小河，向東過大雁山就入新會^[1]。

潭江出縣西馬耳山，東南去到鑼鼓潭，屈西錯入開平，到新會合埋恩平江^[1]。

官田水出東北嶂背山，東南同嵐洞水合，入新會叫橋亭水^[1]。

雙橋水出西北雲蓋村，西南流，到水坪墟叫水坪江，向西南過胡盧山入開平^[1]。

史

1731年，大清雍正九年，將廣州府新會縣大官田劃出來做鶴山縣，重加埋開平縣部份地。因為縣城有鶴山，所以就咁叫^[1]。

大清鶴山有雙橋、藥徑兩巡司^[1]。

1958年，高明同鶴山合併做高鶴縣。1981年12月7號，國務院批准撤銷高鶴縣，恢復高明同鶴山兩縣。1993年，鶴山縣改為縣級市，叫鶴山市。

註

1. 清史稿。志、地理、廣東

出面網頁

• 〈鹤山信息网〉。
• 〈鶴山文史〉。