四邑

四邑古稱岡州，喺廣東珠江三角洲以西，今日係江門市轄下四個地方。由東向西行，即係新會、台山、開平同𠹺恩平四地。

乾隆年間嘅四邑，新寧即係台山，而崖門係新會地方。四邑加埋鶴山先叫五邑，而六邑嘅赤溪，係晚清先分出來，所以地圖上無。

四邑一帶，同省城廣州交通無咁方便，所以就自成一角。呢帶講嘅廣東話，係四邑話，新會話同台山話係代表發音。四邑話口音同廣州話差好遠。

大清時，四邑同富庶啲嘅三邑南海、番禺、順德比差好遠。因爲同省城隔涉，清時係比較窮，唔少人出埠搵食。又因爲爭地，土人同客家人成日鬥。土客械鬥亦促成更多人要出埠搵食。皆因人多，喺外埠唐人街幾有影響力。四邑人因爲同聲同氣，所以中意搞同四邑同鄉組織。四邑嘅字都好常見。

共和國行市管縣之後，江門市管埋鶴山，所以四邑加鶴山，就合稱五邑。

史

四邑個名係大清嗰陣形成，係四個貼𠹺嘅縣，即係廣州府新會、新寧兩縣、同𠹺肇慶府開平、恩平兩縣。其中，新會、新寧同恩平係大明嗰陣就有，大清跟明制保留。

四邑之中，恩平縣同新會縣最古老，大明之前就有。大明弘治十一年（1498年），新會劃出西南便得行都同文章都，開新寧縣。

大明紹武元年（大清順治三年，1646年），清軍攻入廣東。十二月三十，清兵入新會城。大清順治六年（大明永曆三年，1649年），清軍響開平係開縣。開平縣係由肇慶府新興縣嘅開平屯，加上恩平同新會劃地而成。雍正九年，新會同開平各劃一窟來開鶴山縣，歸肇慶府管。同治七年，新寧分出赤溪。光緒三十二年，恩平脫離肇慶，改歸新開嘅陽江^[1]。

中華民國時嘅1914年，新寧改名做台山。

共和國時，區界變得好快，同大清時比，都幾唔同。1951年1月12號，江門脫離新會，成立江門市，係省轄市。1953年，赤溪併返入台山。1958年11月，開平、恩平合做開恩縣，後尾又改名開平縣。1961年3月16號，開平同恩平又分返開兩縣。

1983年6月1號，實行市管縣，新會縣倒轉頭屬江門市，江門市就係地級市。

1992年，台山縣轉成縣級市，改名台山市。1992年10月8號，新會縣轉成縣級市，改名新會市。1993年3月28號，開平縣變成縣級市，改稱開平市。1994年，恩平縣變成縣級市，改叫恩平市。

2002年9月1號，新會市變做新會區。新會人從來唔認爲自己係江門人，本土意識非常強烈^{[未記出處或冇根據]}。

五邑、六邑

五邑加鶴山，加𠹺赤溪就係六邑。

大姓

張、陳、林、周、謝、關、李、麥、黃、趙、梅、馮、鄺、司徒

名人

• 羅蒙正：大元詩人，臺山大江鎮人
• 陳獻章：大明理學家，新會人
• 李江：大明詩人，廣東開平沙塘鎮人
• 梁啓超：學者
• 吳尚時：地理學家
• 黃慶雲：研究辛亥革命嘅歷史學家，新會人
• 司徒華：香港泛民主派元老
• 司徒宏沛：廣州中山醫學院腫瘤醫院創辦人之一
• 司徒展：美籍唐人，外科醫生
• 伍錫洪：香港私立宏恩學院心理系教授
• 關德興：香港藝人
• 伍舜德、伍沾德兄弟：美心食品開山鼻祖
• 麥嘉：香港藝人

睇埋

• 三邑

攷

1. 清史稿，廣東